ଭୁବନେଶ୍ୱର,୨୬/୦୮: ମଞ୍ଚ ପ୍ରବେଶ ପରେ ନିଜ ଚିରାଚରିତ ଶୈଳୀରେ ‘ନୀଳାଦ୍ରୌ ଶଙ୍ଖମଧ୍ୟେ ଶତଦଳ କମଳେ’ ଗୀତ ମାଧ୍ୟମରେ ପ୍ରଭୁ ଜଗନ୍ନାଥଙ୍କୁ ସ୍ମରଣ କରିଥିଲେ । ଏହାପରେ ସ୍ୱର୍ଗତ ଭିକାରୀ ବଳଙ୍କ ‘କୋଠ ଭୋଗଖିଆ ମୋ ଚକାଆଖିଆ..ଉଠହେ ପହଡ଼ ଭାଙ୍ଗି..’ ଗୀତ ପରିବେଷଣ କରିଥିଲେ । ଡିଡି ନାସନାଲ୍ରେ ପ୍ରସାରିତ ‘ଭାରତ କା ଅମୃତ କଳସ’ ରିୟଲିଟି ସୋ’ର ଫାଇନାଲରେ ପାଦ ଥାପିଥିବା ଓଡ଼ିଆ ଗାୟିକା ବର୍ଣ୍ଣାଳି ହୋତା ଏହି ଗୀତ ଗାଇ ନିଜ ଫାଇନାଲ ରାଉଣ୍ଡ ଆରମ୍ଭ କରିଥିଲେ । ହେଲେ ଅଳ୍ପକେ ସେ ବିଜେତା ଆଖ୍ୟାରୁ ବଞ୍ଚିତ ହୋଇଛନ୍ତି । ତାଙ୍କୁ ସେକେଣ୍ଡ ରନର୍ସଅପ୍ରେ ସନ୍ତୁଷ୍ଟ ହେବାକୁ ପଡିଛି । ଏଥିସହ ଦୀର୍ଘ ୬ ମାସ ଧରି ଚାଲିଥିବା ଏହି ପ୍ରଥମ ଲୋକସଙ୍ଗୀତ କାର୍ଯ୍ୟକ୍ରମ ରବିବାର ଶେଷ ହୋଇଛି । ରାଜସ୍ଥାନର ଅନୀତା ଡାଙ୍ଗୀ ଏଥିରେ ବିଜେତା ହୋଇଥିବା ବେଳେ ମହାରାଷ୍ଟ୍ରର ସିଦେ୍ଧଶ ଯାଦବ ପ୍ରଥମ ରନର୍ସଅପ୍ ହୋଇଛନ୍ତି ।
ସୋ’ରେ ଓଡ଼ିଶାର କାଳଜୟୀ ଲୋକସଙ୍ଗୀତ ଓ ଭଜନକୁ ନିଜସ୍ୱ ଢଙ୍ଗରେ ଗାଇ ଭାରତର ଅଗଣିତ ପ୍ରଶଂସକଙ୍କ ମନ ଜିଣିପାରିଛନ୍ତି ବର୍ଣ୍ଣାଳି। ଏ ଅବସରରେ ବର୍ଣ୍ଣାଳି କହିଛନ୍ତି, ମୋର ଏହି ଯାତ୍ରା ସମୟରେ ଅଦମ୍ୟ ସମର୍ଥନ ଏବଂ ସୀମାହୀନ ପ୍ରେମ ପାଇଁ ଓଡିଶାବାସୀଙ୍କୁ ଧନ୍ୟବାଦ । ଏକ ଜାତୀୟ ପ୍ଲାଟଫର୍ମରେ ଓଡ଼ିଶାର ସମୃଦ୍ଧ ତଥା ଜୀବନ୍ତ ଲୋକ ପରମ୍ପରାକୁ ପ୍ରତିନିଧିତ୍ୱ କରିବା ଏକ ଅବିଶ୍ୱସନୀୟ ସମ୍ମାନ। ମୁଁ ଆମ ଗୌରବମୟ ସଂସ୍କୃତିକୁ ପ୍ରତ୍ୟେକ ପର୍ଯ୍ୟାୟରେ ବହନ କରିଛି । ଶେଷରେ ସେ ‘ଭାରତ କା ଅମୃତ କଳସ’ର କର୍ମକର୍ତ୍ତାଙ୍କୁ ଧନ୍ୟବାଦ ଜଣାଇଥିଲେ ।
ପ୍ରକାଶଥାଉକି, ପ୍ରଥମ ଥର ପାଇଁ ଦେଶର ଲୋକସଙ୍ଗୀତଗୁଡିକୁ ନେଇ ଚଳିତବର୍ଷ ଫେବ୍ରୁଆରୀ ମାସରେ ଆରମ୍ଭ ହୋଇଥିଲା ‘ଭାରତ କା ଅମୃତ କଳସ’ ରିୟଲିଟି ସୋ’ । ଓଡ଼ିଶାରୁ ଗାୟିକା ଭାବେ ବର୍ଣ୍ଣାଳି ଏଥିରେ ଭାଗନେଇଥିଲେ । ପ୍ରାରମ୍ଭରେ ସେ ‘ହାଏ କୃଷ୍ଣ’ ଗୀତରୁ ନିଜ ଯାତ୍ରା ଆରମ୍ଭ କରିଥିଲେ । ତେବେ ବର୍ଣ୍ଣାଳିଙ୍କୁ ଅଧିକ ଲୋକପ୍ରିୟ କରାଇଥିଲା ‘ଉଠ କଙ୍କାଳ ଛିଡ଼ୁ ଶୃଙ୍ଖଳ’ ଗୀତ । ଏହି ଗୀତ ପରେ ସେ ସାମାଜିକ ଗଣମାଧ୍ୟମରେ ଅଜସ୍ର ପ୍ରଶଂସା ସାଉଁଟିଥିଲେ । ଏଥିସହ ସେ ‘ଫୁର କିନା ଉଡ଼ିଗଲା ବଣି’, ‘ବଜାରେ ବାଜାବାଲା’, ‘ଦେଖ ଲୋ ସଙ୍ଗାତ’ ସହ ‘କୋଠ ଭୋଗ ଖିଆ’ ଭଳି ଗୀତ ଗାଇଥିଲେ । ବିଭିନ୍ନ ସମୟରେ ମଞ୍ଚରେ ମହାଗୁରୁ ତଥା ଗାୟକ କୈଳାସ ଖେରଙ୍କ ସମେତ ବିଚାରକ ଦେବୋଜିତ୍ ସାହା, ଗାୟତ୍ରୀ ଅଶୋକନ ଓ ସ୍ନେହା ଖନାୱଲକର ବର୍ଣ୍ଣାଳିଙ୍କୁ ପ୍ରଶଂସା କରିଥିଲେ ।
