ନୂଆଦିଲ୍ଲୀ: ଗତକାଲି (ଶନିବାର) ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ବିଜେପି ଉପରେ ଘୋର ଆକ୍ରମଣ କରିଛନ୍ତି । କହିଛନ୍ତି ଯେ, ଚଳିତ ଲୋକସଭା ନିର୍ବାଚନରେ ଶାସକ ଦଳ ୨୨୦-୨୩୦ ରୁ ଅଧିକ ଆସନ ପାଇବ ନାହିଁ । ଅନ୍ତରୀଣ ଜାମିନରେ ଜେଲରୁ ବାହାରିବା ପରେ ଅରବିନ୍ଦ କେଜ୍ରିୱାଲ ଦିଲ୍ଲୀର ଆମ୍ ଆଦମୀ ପାର୍ଟି ମୁଖ୍ୟାଳୟରେ କହିଛନ୍ତି ଯେ, ଜେଲରୁ ମୁକୁଳିବା ପରେ ଗତ ୨୦ ଘଣ୍ଟା ମଧ୍ୟରେ ମୁଁ ନିର୍ବାଚନ ବିଶେଷଜ୍ଞ ଏବଂ ଲୋକଙ୍କ ସହ କଥା ହୋଇ ଜାଣିଲି ଯେ ବିଜେପି ସରକାର ଗଠନ କରିପାରିବ ନାହିଁ । 

କେଜ୍ରିୱାଲ କହିଛନ୍ତି ଯେ, ହରିୟାଣା, ରାଜସ୍ଥାନ, କର୍ଣ୍ଣାଟକ, ଦିଲ୍ଲୀ, ବିହାର, ମହାରାଷ୍ଟ୍ର, ପଶ୍ଚିମବଙ୍ଗ, ଝାଡଖଣ୍ଡ ଏବଂ ଉତ୍ତରପ୍ରଦେଶରେ ବିଜେପିର ଲୋକସଭା ଆସନ ହ୍ରାସ ପାଇବ । ସେ କହିଛନ୍ତି, “କୌଣସି ରାଜ୍ୟରେ ସେମାନଙ୍କର ଆସନ ବୃଦ୍ଧି ପାଇବ ନାହିଁ। ଏହା ମୋର ବିଶ୍ଳେଷଣ ଏବଂ ରାଜନୈତିକ ବିଶ୍ଳେଷକ ମାନେ ମଧ୍ୟ କହୁଛନ୍ତି ଯେ, ବିଜେପି ୨୨୦-୨୩୦ରୁ ଅଧିକ ଆସନ ପାଇବ ନାହିଁ । କେଜ୍ରିୱାଲ ଦାବି କରିଛନ୍ତି ଯେ ଜୁନ୍ ୪ରେ ମୋଦି ସରକାର ଗଠନ ହେଉନାହିଁ । ସେ ଆହୁରି ମଧ୍ୟ ପ୍ରତିଶୃତି ଦେଇଛନ୍ତି ଯେ ଯେତେବେଳେ ଇଣ୍ଡିଆ ମେଣ୍ଟର ସରକାର ଗଠନ ହେବ, ସେତେବେଳେ ଦିଲ୍ଲୀକୁ ପୂର୍ଣ୍ଣ ରାଜ୍ୟ ମାନ୍ୟତା ଦିଆଯିବ।

କେଜ୍ରିୱାଲଙ୍କ ଏହି ଦାବି ଉପରେ ବିଜେପି ପ୍ରତିକ୍ରିୟା ରଖିଛି। ବିଜେପି ମୁଖପାତ୍ର ସୁଧାଂଶୁ ତ୍ରିବେଦୀ କେଜ୍ରିୱାଲଙ୍କୁ ଜବାବ ଦେଇଛନ୍ତି । କହିଛନ୍ତି ଯେ କେଜ୍ରିୱାଲ ତାଙ୍କ ଦଳର (ବିଜେପି) ଉତ୍ତରାଧିକାରୀ ବିଷୟରେ କହୁଛନ୍ତି, କିନ୍ତୁ ଅର୍ଥ ହେରଫେର ଅଭିଯୋଗରେ ଜେଲରେ ଥାଇ ମଧ୍ୟ ସେ କୌଣସି AAP ସହଯୋଗୀଙ୍କୁ ବିଶ୍ବାସ କରୁନାହାଁନ୍ତି, ଯାହାକୁ ସେ ମୁଖ୍ୟମନ୍ତ୍ରୀ ଦାୟିତ୍ବ ଦେବେ ।

ତ୍ରିବେଦୀ କହିଛନ୍ତି ଯେ କେଜ୍ରିୱାଲ ପ୍ରଶାନ୍ତ ଭୂଷଣ, ଯୋଗେନ୍ଦ୍ର ଯାଦବ, କୁମାର ବିଶ୍ୱାସ ଏବଂ କିରଣ ବେଦୀଙ୍କ ଭଳି ସହକର୍ମୀଙ୍କୁ ଦଳରୁ ବହିଷ୍କାର କରିଛନ୍ତି ଏବଂ ରାଜନୀତିରେ ପ୍ରବେଶ କରିବା ସମୟରେ ସେ ଏମାନଙ୍କ ସମର୍ଥନ ଲୋଡିଥିଲେ । ଏ ବାବଦରେ ସେ କଣ କହିବେ ।