ଚନ୍ଦ୍ରଶେଖରପୁର,୩୧/୦୩: ଦୁର୍ଘଟଣାପ୍ରବଣ ନାଲେ୍କା ଛକରେ ପୁଣି ଶନିବାର ରାତିରେ ଘଟିଛି ଏକ ଦୁର୍ଘଟଣା । ଏକ ଟ୍ରକକୁ ଧକ୍କା ଦେଇଛି ଏକ କାର୍ । ଫଳରେ କାର୍ରେ ବସିଥିବା ୩ ଯୁବତୀ ଓ ଚାଳକ ଆହତ ହୋଇଛନ୍ତି । ମୈତ୍ରୀବିହାର ଥାନା ପୁଲିସ ଆହତଙ୍କୁ ଡାକ୍ତରଖାନାକୁ ପଠାଇବା ସହ ଗାଡି ଦୁଇଟିକୁ ଜବତ କରିଛି । କାର୍ ଚାଳକଙ୍କ ଭୁଲ୍ ଥିବା ପ୍ରତ୍ୟକ୍ଷଦର୍ଶୀ କହିଛନ୍ତି ।
ସୂଚନା ମୁତାବିକ, ଶନିବାର ସମୟ ରାତି ପ୍ରାୟ ୧୧ଟା ହେବ । ଟାଟା ଅଲଟୋଜ୍ କାର୍ଟି ଜୟଦେବବିହାରରୁ ନନ୍ଦନକାନନ ଦିଗରେ ଯାଉଥିଲା । ନାଲ୍କୋ ଛକରେ ସମାନ ଦିଗରେ ଏକ ଟ୍ରକ୍ ମଧ୍ୟ ଯାଉଥିଲା । କାର୍ଟି ଟ୍ରାଫିକ୍ ଛକରେ ଟ୍ରକକୁ ଓଭରଟେକ୍ କରି ଆଗରୁ ଯିବା ସମୟରେ କଡ଼ରେ ଧକ୍କା ହୋଇ ଗାଡିଟି ବୁଲି ଯାଇଥିଲା । ଗାଡ଼ିର ବେଗ ଅଧିକ ଥିବାରୁ କାର୍ର ଆଗ ବନେଟ୍ ଚୁରମାର୍ ହୋଇଯାଇଥିଲା। ଦୁର୍ଘଟଣା ପରେ ଉକ୍ତ ଛକରେ ଉତ୍ତେଜନା ପ୍ରକାଶ ପାଇଥିଲା । କାର୍ରୁ ଯୁବତୀମାନେ ଓହ୍ଲାଇ ହୋହଲ୍ଲା କରିଥିଲେ । ଯାହାକୁ ନେଇ ଟ୍ରାଫିକ ସମସ୍ୟା ମଧ୍ୟ ଦେଖାଯାଇଥିଲା । ପୁଲିସ ପହଞ୍ଚି ଗାଡିଗୁଡିକୁ ରାସ୍ତାରୁ ହଟାଇଥିଲା । କିଛିଦିନ ପୂର୍ବରୁ ଏହି ଛକରେ ଦୁଇଟି କାର ମୁହାଁ ମୁହିଁ ଧକ୍କା ହୋଇଥିଲା । ରାତି ସମୟରେ ଟ୍ରାଫିକ୍ ସିଗନାଲ ବନ୍ଦ ରହୁଥିବାରୁ ଏମିତି ଦୁର୍ଘଟଣା ଘଟୁଥିବା ଲୋକେ ଅଭିଯୋଗ କରିଛନ୍ତି ।
