ନୂଆଦିଲ୍ଲୀ, ୨୫/୦୬: କଳାବଜାରୀକୁ ରୋକିବା ଏବଂ ଦରଦାମ ନିୟନ୍ତ୍ରଣ ପାଇଁ କେନ୍ଦ୍ର ସରକାର ଗହମ ମହଜୁଦ ସୀମା ନିର୍ଦ୍ଧାରଣ କରିଛନ୍ତି । ଏହା ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳର ଟ୍ରେଡର୍ସ, ପାଇକାରୀ ବ୍ୟବସାୟୀ, ଖୁଚୁରା ବ୍ୟବସାୟୀ, ବଡ ଚେନ୍ ରିଟେଲର ଏବଂ ପ୍ରୋସେସରଙ୍କ ପାଇଁ ଲାଗୁ ହେବ । ୨୦୨୫ ମାର୍ଚ୍ଚ ୩୧ ଯାଏ ଏହା ବଳବତ୍ତର ରହିବ ।
କେନ୍ଦ୍ର ଖାଦ୍ୟ ସଚିବ ସଞ୍ଜୀବ ଚୋପ୍ରା କହିଛନ୍ତି, ପାଇକାରୀ ବ୍ୟବସାୟୀ ମାନେ ନିଜ ପାଖରେ ୩ ହଜାର ଟନ୍ ଗହମ ରଖିପାରିବେ । ସେହିଭଳି ପ୍ରୋସେସର ମାନେ ସେମାନଙ୍କ ପ୍ରୋସେସିଂ କ୍ଷମତାର ୭୦% ଯାଏ ଗହମ ରଖିପାରିବେ । ବିଗ୍ ଚେନ୍ ରିଟେଲର ମାନେ ଆଉଟଲେଟ ପିଛା ୧୦ଟନ୍ ଏବଂ ମୋଟ ସୀମା ୩ ହଜାର ଟନ୍ ରହିବ ।
ଏକକ ଖୁଚୁରା ବ୍ୟବସାୟୀଙ୍କ ପାଇଁ ଏହା ୧୦ ଟନ୍ ରହିବ । ଏକକ ରିଟେଲର, ବଡ ଚେନ ରିଟେଲର, ପ୍ରୋସେସର ଏବଂ ପାଇକାରୀ ବ୍ୟବସାୟୀ ମାନେ ପ୍ରତି ଶୁକ୍ରବାର ନିଜ ପାଖରେ ରଖିଥିବା ଗହମ ଗଛିତ ସୀମା ଉପରେ ସୂଚନା ଦେବେ । ଗହମ ରପ୍ତାନି ଉପରେ ଏବେ କୌଣସି କଟକଣା ନାହିଁ ।
ଗତ ବର୍ଷ ତୁଳନାରେ ଗହମ ଓ ଅଟାର କିଲୋପିଛା ଦର ୨ ଟଙ୍କା ବଢ଼ିଛି । ୨୦ ଜୁନ ସୁଦ୍ଧା ଗହମର ଖୁଚୁରା ମୂଲ୍ୟ ୩୦.୯୯ ଟଙ୍କା ରହିଛି । ଏହା ଗତ ବର୍ଷ ସମାନ ସମୟରେ ୨୮.୯୫ ଟଙ୍କା ଥିଲା । ସେହିଭଳି ଅଟାର କିଲୋପିଛା ଦର ୩୪.୨୯ ଟଙ୍କାରୁ ବୃଦ୍ଧି ହୋଇ ୩୬.୧୩ ଟଙ୍କା ଛୁଇଁଛି ।
୨୦୨୩ ଏପ୍ରିଲ ପହିଲାରେ ଦେଶରେ ପ୍ରାରମ୍ଭିକ ପର୍ଯ୍ୟାୟରେ ୮୨ ଲକ୍ଷ ଟନ୍ ଗହମ ଗଛିତ ଥିଲା । ସେହିଭଳି ୨୦୨୪ ଏପ୍ରିଲ ପହିଲାରେ ଏହା ୭୫ ଲକ୍ଷ ମେଟ୍ରିନ ଟନ୍ ଥିଲା । ଗତ ବର୍ଷ ସରକାର୨୬୬ ଲକ୍ଷ ମେଟ୍ରିକ ଟନ୍ ଗହମ କ୍ରୟ କରିଥିଲେ । ଚଳିତ ବର୍ଷ ୨୬୨ ଲକ୍ଷ ମେଟ୍ରିକ ଟନ୍ ଗହମ କିଣିବା ଯୋଜନା ରହିଛି ।
ଉଲ୍ଲେଖଯୋଗ୍ୟ, ବଜାର ଦରକୁ ନିୟନ୍ତ୍ରଣ କରିବା ଲାଗି ସରକାର ଡାଲି ଉପରେ ମଧ୍ୟ ଷ୍ଟକ ଲିମିଟ ଜାରି କରିଛନ୍ତି ।
