ଖୋର୍ଦ୍ଧା, ୧୮/୦୩ : ଖୋର୍ଦ୍ଧା ଜେଲ୍ ଭିତରୁ ମୋବାଇଲ୍ ମିଳିବା ଘଟଣା ପରେ ଆସାମୀଙ୍କ ଭିତରେ କୁହୁଳୁଛି ଅଶାନ୍ତି। ଜେଲ୍ ଭିତରେ ଦୁଇ ଗୋଷ୍ଠି ମୁହାଁମହିଁ। ପୋଲିସ ଇନଫର୍ମର ସନ୍ଦେହରେ ଗତକାଲି ଜଣେ ଅନ୍ତେବାସୀଙ୍କୁ ଗୋଟିଏ ଗୋଷ୍ଠି ସଙ୍ଘବଦ୍ଧ ଭାବେ ଆକ୍ରମଣ କରିଛନ୍ତି। ଏନେଇ ଖୋର୍ଦ୍ଧା ଆଦର୍ଶ ଥାନାରେ ୭ ଜଣଙ୍କ ନାଁରେ ମାମଲା ରୁଜୁ ହୋଇଛି।
ଆକ୍ରମଣର ଶିକାର ହୋଇଛନ୍ତି ଆସାମୀ ପ୍ରକାଶ ନାୟକ। ସେ କୋରେକ୍ସ କଫ ସିରପ୍ ଚୋରା ବିକ୍ରି କରିବା ମାମଲାରେ ରିରଫ ହୋଇଥିଲା। ଜେଲରୁ ମୋବାଇଲ ମିଳିବା ଘଟଣାରେ ପୋଲିସକୁ ସୂଚନା ଦେଉଥିବା ସନ୍ଦେହ କରି ଆକ୍ରମଣ କରିଥିଲେ ଅନ୍ୟ କଏଦୀ। ପୂର୍ବରୁ ବ୍ରାଉନସୁଗର ଓ ହତ୍ୟା ଘଟଣାରେ ଜେଲରେ ଥିବା ଆସାମୀମାନଙ୍କ ଠାରୁ ମିଳିଥିଲା ୯ଟି ମୋବାଇଲ। ତେବେ ଜେଲ୍ ଭିତରକୁ କିପରି ମୋବାଇଲ ଆସିଲା ଏହାର ଖୋଳତାଡ କରୁଛି ପୋଲିସ। ଏଦିଗରେ ଅଧିକ ତଦନ୍ତ ଚାଲିଥିବା ବେଳେ ଗତକାଲି ଜେଲ ଭିତରେ ଦୁଇ ଗୋଷ୍ଠି ହାତାହାତି ହୋଇଛନ୍ତି। ଜେଲ ଭିତରେ ଖୋର୍ଦ୍ଧା ଏସଡିପିଓ, ଆଦର୍ଶ ଥାନା ଅଧିକାରୀ ତଦନ୍ତ କରୁଛନ୍ତି। ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଖୋର୍ଦ୍ଧା ଏସଡିପିଓ କହିଛନ୍ତି।
