ନୂଆଦିଲ୍ଲୀ,୧୦।୨: କର୍ମଚାରୀ ଭବିଷ୍ୟ ନିଧି ସଂଗଠନ(ଇପିଏଫ୍ଓ) ନିବେଶକଙ୍କ ପାଇଁ ଖୁସି ଖବର। ସେଣ୍ଟ୍ରାଲ ବୋର୍ଡ ଅଫ୍ ଟ୍ରଷ୍ଟି (ସିବିଟି) ପିଏଫ୍ ଉପରେ ମିଳୁଥିବା ସୁଧ ହାର ବଢାଇବାର ନିଷ୍ପତ୍ତି ନେଇଛି। ନିଷ୍ପତ୍ତି ଅନୁସାରେ, ୨୦୨୩-୨୪ ସୁଧ ହାର ୮.୨୫% ହେବ। ଏହା ପୂର୍ବ ବର୍ଷରେ ୮.୧୫% ଥିଲା। ଉଲ୍ଲେଖନୀୟ ଯେ, ଗତ ୩ ବର୍ଷରେ ଏହା ସବୁଠାରୁ ଅଧିକ ସୁଧ ହାର।
୨୦୨୧-୨୨ରେ ସୁଧହାର ୮.୧ ପ୍ରତିଶତ ଥିବା ବେଳେ ୨୦୨୨-୨୩ରେ ୮.୧୫ ପ୍ରତିଶତ ଓ ୨୦୨୩-୨୪ରେ ଏହାକୁ ବୃଦ୍ଧି କରି ୮.୨୫ ପ୍ରତିଶତ କରାଯାଇଛି। ପିଟିଆଇର ରିପୋର୍ଟ ଅନୁସାରେ, ଶନିବାର ସିବିଟି ପକ୍ଷରୁ ହୋଇଥିବା ବୈଠକରେ ୨୦୨୩-୨୪ ପାଇଁ ଇପିଏଫ୍ଓ ଜମା ଉପରେ ସୁଧ ହାର ବୃଦ୍ଧି ସହମତି ପାଇଁ ଅର୍ଥମନ୍ତ୍ରଣାଳୟକୁ ପଠାଯିବ। ସେଠାରେ ଏହା ଅନୁମୋଦନ ଲାଭ କରିବା ପରେ ଲାଗୁ କରାଯିବ। ଫଳରେ ୬ କୋଟିରୁ ଅଧିକ କର୍ମଚାରୀ ଲାଭବାନ ହେବେ।
