ମାଲକାନଗିରି : ନିର୍ବାଚନକୁ ଶାନ୍ତି ଶୃଙ୍ଖଳା ସହ ଅବାଧ ଏବଂ ନିରପେକ୍ଷ କରିବା ଲାଗି ସୁରକ୍ଷା ବ୍ୟବସ୍ଥା ଉପରେ ବିଶେଷ ଗୁରୁତ୍ଵ ଦିଆଯାଇଛି। ମାଲକାନଗିରି ଜିଲ୍ଲାରେ କିପରି ନିର୍ବାଚନ କାର୍ଯ୍ୟକ୍ରମ ସୁରୁଖୁରୁରେ ହେବ ସେନେଇ ପୋଲିସ ବିଭାଗ ତତ୍ପର ରହିଥିବା ସହ ଆଜି ଜିଲ୍ଲା ପୁଲିସ, ସୀମା ସୁରକ୍ଷା ବାହିନୀ ଓ ଏସଏସବିଏନ ପକ୍ଷରୁ ମିଳିତ ଭାବେ ସହରରେ ଫ୍ଲାଗ ମାର୍ଚ୍ଚ କରାଯାଇଛି। 

ମାଲକାନଗିରି ଏସପି ନିତେଶ ୱାଧୱାନିଙ୍କ ନିର୍ଦ୍ଦେଶ କ୍ରମେ ଏସଡିପିଓ ସଚିନ ପଟେଲଙ୍କ ନେତୃତ୍ୱରେ ଜିଲ୍ଲା ସଦରରେ ପୋଲିସ କର୍ମଚାରୀ ଓ ବିଏସଏଫ ଓ ଏସଏସବିଏନର ଯବାନମାନେ ମିଳିତ ଭାବେ ଫ୍ଲାଗ ମାର୍ଚ୍ଚ କରି ସହର ପରିକ୍ରମା କରିଥିଲେ। ନିର୍ବାଚନକୁ ଶାନ୍ତି ଶୃଙ୍ଖଳାର ସହ କରିବା ଏବଂ ପୋଲିସ ଉପରେ ଲୋକଙ୍କ ବିଶ୍ୱାସନୀୟତାକୁ ବଢାଇବା ଏହି ଫ୍ଲାଗ ମାର୍ଚ୍ଚର ମୁଖ୍ୟ ଉଦ୍ଦେଶ୍ୟ ବୋଲି ଏସଡିପିଓ ଶ୍ରୀ ପଟେଲ ପ୍ରକାଶ କରିଥିଲେ। 

ଏହା ବ୍ୟତୀତ ନିର୍ବାଚନକୁ ଦୃଷ୍ଟିରେ ରଖି ଆନ୍ଧ୍ର ଓ ଛତିଶଗଡକୁ ଲାଗି ରହି ଥିବା ଜିଲ୍ଲାର ସୀମାବର୍ତ୍ତୀ ଅଞ୍ଚଳରେ ୨୪ ଘଣ୍ଟିଆ ଯାଞ୍ଚ ବ୍ୟବସ୍ଥା ଏବଂ ଦୁର୍ଗମ ଅଞ୍ଚଳରେ ତଲାସି ଅଭିଯାନକୁ ଜୋରଦାର କରାଯାଉଥିବା ସେ ପ୍ରକାଶ କରିଥିଲେ। ଚଳିତ ଲୋକସଭା ଓ ବିଧାନସଭା ନିର୍ବାଚନ ଆସନ୍ତା ମେ୧୩ରେ ଆରମ୍ଭ ହେବାକୁ ଯାଉଥିବା ବେଳେ ,କିପରି ସୁରୁଖୁରୁରେ ନିର୍ବାଚନ ହୋଇ ପାରିବ ଏବଂ ସାଧାରଣ ଜନତା ନିଜ ନିଜର ମତ ବିନା କୌଣସି ବାଧା ବିଘ୍ନରେ ଦେଇ ପାରିବେ ସେ ଦିଗରେ ପୋଲିସ ପ୍ରଶାସନ ସମ୍ପୂର୍ଣ୍ଣ ଦୃଷ୍ଟି ରଖିଥିବା ମଧ୍ୟ ଶ୍ରୀ ପଟେଲ ମତ ରଖିଛନ୍ତି।