ନୂଆଦିଲ୍ଲୀ,୧୮/୦୯: ଦିଲ୍ଲୀ ମୁଖ୍ୟମନ୍ତ୍ରୀ ଗତକାଲି ପଦରୁ ଇସ୍ତଫା ଦେବା ପରେ କ୍ବାଟର ଛାଡ଼ିବାକୁ ଯାଉଛନ୍ତି ଅରବିନ୍ଦ କେଜ୍ରିଓ୍ବାଲ । ମୁଖ୍ୟମନ୍ତ୍ରୀ ଥିବାବେଳେ ତାଙ୍କୁ ଯେଉଁ ସରକାରୀ ସୁବିଧା ମିଳୁଥିଲା ଏବେ ସବୁକୁ ଛାଡ଼ିବାକୁ ଯାଉଛନ୍ତି । ତେବେ କ୍ବାଟର ଛାଡ଼ିବା ପରେ ସେ କେଉଁଠି ରହିବେ ସେ ନେଇ ସବୁଠି ଚର୍ଚ୍ଚା ଜୋର ଧରିଛି । ଏନେଇ ଆପ ନେତା ସଞ୍ଜୟ ସିଂ କହିଛନ୍ତି କି, ତାଙ୍କୁ ସୁରକ୍ଷା ଦିଆଯାଉ । ତାଙ୍କ ଜୀବନ ପ୍ରତି ବିପଦ ରହିଛି । ଅନ୍ୟପଟେ କେଜ୍ରିଓ୍ବାଲ କହିଛନ୍ତି ଯେ, ମୋତେ କେବଳ ଭଗବାନ ରକ୍ଷା କରିବେ । ଏତେଦିନ ଜେଲରେ ରହିଲି । ବହୁ ଗୁଣ୍ଡା ଶ୍ରେଣୀର ଲୋକଙ୍କ ସହ ରହିଛି ଏଣୁ ମୋର କାହାକୁ ଭୟ କରିବାର ନାହିଁ । ମୋତେ କେବଳ ଭଗବାନ ରକ୍ଷା କରିବେ ।

ତେବେ ପଦ ଛାଡିବା ପରେ ୫୨ କୋଟି ଟଙ୍କା ଖର୍ଚ୍ଚ କରି କେଜରିୱାଲ ନବୀକରଣ କରିଥିବା କ୍ୱାଟରକୁ ଛାଡିବାକୁ ନିଷ୍ପତ୍ତି ନେଇଛନ୍ତି । ଏହି କ୍ୱାଟର ଆସନ୍ତା ୧୫ ଦିନ ଭିତରେ କେଜରିୱାଲଙ୍କୁ ଛାଡିବାକୁ ହେବ । ମୁଖ୍ୟମନ୍ତ୍ରୀ ହେବା ପରେ ନିଜ ସରକାରୀ ବାସଭବନ ନବୀକରଣକୁ ନେଇ ବିବାଦୀୟ ହୋଇପଡିଥିଲେ କେଜରିୱାଲ । ନବୀକରଣରେ କୋଟି କୋଟି ଟଙ୍କା ଖର୍ଚ୍ଚ କରିବାକୁ ନେଇ ଘେରିଥିଲେ ବିରୋଧୀ । ବିଜେପି ଅଭିଯୋଗ କରିଥିଲା କି ଦେଶ ମହାମାରୀ କରୋନା ସହ ଲଢୁଥିବା ବେଳେ କେଜରିଓା୍ୱଲ କ୍ୱାଟରକୁ ବିଶାଳ ବଙ୍ଗଳାରେ ପରିଣତ କରିଥିଲେ । ଏଥିରେ ବିଭିନ୍ନ ଦେଶରୁ ମଗାଯାଇଥିବା ବହୁ ବିଳାଶସାମଗ୍ରୀ ଖଚିତ କରାଇଥିଲେ । ଆନା ହଜାରେଙ୍କ ସହ ଲୋକପାଳ ବିଲ ଆଣିବାକୁ ଆନ୍ଦୋଳନ କରିବା ସମୟରେ ଅରବିନ୍ଦ ଦେଇଥିବା ନିରାଡମ୍ବରପୂର୍ଣ୍ଣ ବୟାନକୁ ଉଜାଗର କରିଥିଲା ବିଜେପି । ଏଥିସହ କ୍ଷମତାକୁ ଆସିବା ପରେ କେମିତି ଅରବିନ୍ଦ ଜନତାର କଷ୍ଟକୁ ଅଣଦେଖା କରି ନିଜ ସ୍ୱାର୍ଥସାଧନ ଓ ଆଧିପତ୍ୟ ବିସ୍ତାରରେ ଲାଗିଥିଲେ ତାକୁ ଦେଖାଇ କାଜରିୱାଲଙ୍କୁ ଘେରିଥିଲା ବିଜେପି ।

ବିଜେପି ଲଗାତାର ଭାବେ କେଜ୍ରିଓ୍ବାଲଙ୍କୁ ବଦନାମ କରିବା ପାଇଁ ବିଭିନ୍ନ ଯୋଜନାମାନ କରୁଥିବାବେଳେ ତାଙ୍କୁ ଜେଲରେ ଭର୍ତ୍ତି କରିଥିଲା । ଯାହାକୁ ନେଇ ଆପ ନେତାମାନେ ନିନ୍ଦା କରିଛନ୍ତି । ଅନ୍ୟପଟେ କେଜ୍ରିଓ୍ବାଲ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାପରେ ଦିଲ୍ଲୀବାସୀ ବେଶ ଦୁଃଖ ପ୍ରକାଶ କରିଛନ୍ତି । ଯିଏ ସେମାନଙ୍କ ପାଇଁ ଏତେ କାମ କଲେ ଆଉ ଶେଷରେ ଜେଲ ମଧ୍ୟ ଗଲେ ଏମିତିକି ମୁଖ୍ୟମନ୍ତ୍ରୀ ପଦ ମଧ୍ୟ ଛାଡ଼ିବାକୁ ପଡ଼ିଲା । ମାଗଣା ଶିକ୍ଷା, ବିଜୁଳି ପ୍ରଦାନ କରୁଥିବା ମୁଖ୍ୟମନ୍ତ୍ରୀଙ୍କ ସହ ଏଭଳି ଆକ୍ରମଣାତ୍ମକ ରାଜନୀତି କରୁଥିବା ବିଜେପିକୁ  ଜନତା ନିନ୍ଦା କରୁଥିବା ଆପ୍ ନେତା କହିଛନ୍ତି।