ନୂଆଦିଲ୍ଲୀ: ଭାରତର ୧୦ କମ୍ପାନୀଙ୍କ ଆପ୍କୁ ଗୁଗୁଲ ପ୍ଲେ ଷ୍ଟୋରରୁ ହଟାଇବାକୁ ଯୋଜନା କରୁଛି ଜଣାଶୁଣା ଟେକ୍ କମ୍ପାନୀ ଗୁଗଲ । ଏହି କମ୍ପାନୀ ମାନେ ସେବା ଶୁଳ୍କ ଦେଇନଥିବା କହିଛି ଗୁଗୁଲ୍ । ଏହାକୁ ନେଇ ସଂପୃକ୍ତ କମ୍ପାନୀ ମାନଙ୍କୁ ଚେତାବନୀ ଦେଇଛି ଗୁଗୁଲ୍ । ଏମାନେ କମ୍ପାନୀ ପଲିସିର ଅନୁପାଳନ କରିନଥିବା କହିଛି ଗୁଗୁଲ ।
ଏକ ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ସର୍ଚ୍ଚ ଇଂଜିନ୍ ଗୁଗୁଲର କହିବା କଥା ଯେ, ଏହା ପାଖରେ ଏହାର ଆପ୍ ଷ୍ଟୋର୍ ଗୁଗୁଲ ପ୍ଲେ ର ଉପଯୋଗ କରୁଥିବା ୨ ଲକ୍ଷରୁ ଅଧିକ ଭାରତୀୟ ଡେଭଲପର୍ସ ଅଛନ୍ତି, ଯେଉଁମାନେ ଆମର ପଲିସି ବା ନୀତିର ଅନୁପାଳନ କରୁଛନ୍ତି । ହେଲେ ଏହି ୧୦ କମ୍ପାନୀ ମାନେ ସେବା ଶୁଳ୍କ ପଇଠ କରିନଥିବା ବିକଳ୍ପ ଚୟନ କରିଛନ୍ତି । କମ୍ପାନୀ ଏବେ ଏହାର ଆପ୍ ଷ୍ଟୋର୍ ବିଲିଂ ପଲିସି ଆରମ୍ଭ କରିବାକୁ ଯାଉଛି । ଯାହାର ଅର୍ଥ ହେଉଛି ପଲିସିକୁ ଅନୁପାଳନ କରୁନଥିବା ଆପ୍ ଗୁଡିକୁ ପ୍ଲଲେ ଷ୍ଟୋରରୁ ହଟାଇ ଦିଆଯିବ ।
ଫେବୃଆରୀ ୯ ରେ ଗୁଗୁଲର ବିଲିଂ ନୀତି ବିରୋଧରେ ଅନେକ ଷ୍ଟାର୍ଟଅପ୍ ଆବେଦନ ଶୁଣାଣି କରିବାକୁ ସୁପ୍ରିମକୋର୍ଟ ରାଜି ହୋଇଥିଲେ। କିନ୍ତୁ ଭାରତର ପ୍ରଧାନ ବିଚାରପତି ଡି ଓ୍ବାଇ ଚନ୍ଦ୍ରଚୂଡଙ୍କ ନେତୃତ୍ବାଧିନ ଖଣ୍ଡପୀଠ ଏହା ଉପରେ ଅନ୍ତରୀଣ ରହିତାଦେଶ ଆଣିବାକୁ ମନା କରିଦେଇଥିଲେ ।
