ବୁଦାପେଷ୍ଟ,୨୩/୦୯: ହଙ୍ଗେରୀର ବୁଦାପେଷ୍ଟରେ ଆୟୋଜିତ ୪୫ତମ ଚେସ୍ ଅଲିମ୍ପିଆଡ୍ରେ ଭାରତୀୟ ପୁରୁଷ ଓ ମହିଳା ଦଳ ଚମତ୍କାର ପ୍ରଦର୍ଶନ କରି ଡବଲ ସ୍ୱର୍ଣ୍ଣ ଜିତି ଦେଶ ପାଇଁ ଇତିହାସ ରଚିଛନ୍ତି । ପ୍ରଥମ ଥର ଭାରତ ଅଲିମ୍ପିଆଡର ଉଭୟ ବର୍ଗରେ ସ୍ୱର୍ଣ୍ଣ ଜିତିଛି ।
ଜିଏମ୍ ଡି. ଗୁକେଶ, ଆର. ପ୍ରଜ୍ଞାନନନ୍ଦା, ଅର୍ଜୁନ ଏରିଗାଇସି, ବିଦିତ ଗୁଜରାଠୀ ଓ ପି. ହରିକ୍ରିଷ୍ଣାଙ୍କୁ ନେଇ ଭାରତୀୟ ଦଳ ୧୧ ତଥା ଫାଇନାଲ ରାଉଣ୍ଡରେ ୩.୫-୦.୫ରେ ସ୍ଲୋଭେନିଆକୁ ପରାଜିତ କରି ସର୍ବାଧିକ ୨୧ ପଏଣ୍ଟ ସହ ପ୍ରଥମ ସ୍ଥାନ ହାସଲ କରି ସ୍ୱର୍ଣ୍ଣ ପଦକ ଜିତିଥିଲେ । ଏହି ରାଉଣ୍ଡରେ ଗୁକେଶ ୧-୦ରେ ଭ୍ଲାଦିମିର ଫେଡୋସୀଭଙ୍କୁ ପ୍ରଜ୍ଞାନନନ୍ଦା ୧-୦ରେ ଆଣ୍ଟୋନ ଡେମଚେନକୋଙ୍କୁ ଏବଂ ଅର୍ଜୁନ ୧-୦ରେ ଜାନ ସୁବେଲଜିଙ୍କୁ ପରାଜିତ କରିଥିଲେ । କେବଳ ଗୁଜରାଠୀ ଓ ମାତେଜ ସେବେନିକଙ୍କ ମଧ୍ୟରେ ବାଜି ଡ୍ର’ ରହିଥିଲା । ମୋଟ୍ ୧୭ ପଏଣ୍ଟ ପାଇ ଆମେରିକା ରୌପ୍ୟ ଏବଂ ସମାନ ପଏଣ୍ଟ ସହ ଉଜବେକିସ୍ତାନ ବ୍ରୋଞ୍ଜ ପଦକ ଜିତିଛି ।
ସେହିପରି ଜିଏମ୍ ହାରିକା ଡ୍ରୋନାଭାଲି, ଆର. ବୈଶାଳୀ, ଆଇଏମ୍ ଦିବ୍ୟା ଦେଶମୁଖ, ତାନିଆ ସଚଦେବ ଓ ବନ୍ତିକା ଅଗ୍ରୱାଲଙ୍କୁ ନେଇ ଭାରତୀୟ ମହିଳା ଦଳ ଅନ୍ତିମ ରାଉଣ୍ଡରେ ୩.୫-୦.୫ରେ ଆଜରବାଇଜାନକୁ ପରାଜିତ କରି ୧୯ ପଏଣ୍ଟ ସହ ଶୀର୍ଷ ସ୍ଥାନ ହାସଲ କରି ସ୍ୱର୍ଣ୍ଣ ଜିତିଥିଲେ । କାଜାଖସ୍ତାନ ୧୮ ପଏଣ୍ଟ ପାଇ ରୌପ୍ୟ ଏବଂ ୧୭ ପଏଣ୍ଟ ସହ ଆମେରିକା ବ୍ରୋଞ୍ଜ ପଦକ ଜିତିଛି । ଅନ୍ତିମ ରାଉଣ୍ଡରେ କେବଳ ବୈଶାଳୀ ବାଜି ଡ୍ର’ ରଖିଥିବାବେଳେ ହାରିକା, ବନ୍ତିକା ଓ ଦିବ୍ୟା ବିଜୟୀ ହୋଇଥିଲେ ।
ପୁରୁଷ ବର୍ଗରେ ଭାରତୀୟ ଦଳ ମରକ୍କୋକୁ ପରାଜିତ କରି ଅଭିଯାନ ଆରମ୍ଭ କରିଥିଲା । ପରେ ଆଇସଲାଣ୍ଡ, ହଙ୍ଗେରୀ-ବି, ସର୍ବିଆ, ଆଜରବାଇଜାନ, ହଙ୍ଗେରୀ, ଚୀନ ଓ ଇରାନକୁ ପରାଜିତ କରିଥିଲା । ସେହିପରି ମହିଳା ଦଳ ପ୍ରଥମ ରାଉଣ୍ଡରେ ଜାମାଇକାକୁ ହରାଇଥିଲା। ପରେ ଚେକ୍ ଗଣରାଜ୍ୟ, ସ୍ୱିଜରଲାଣ୍ଡ, ଫ୍ରାନ୍ସ, କାଜାଖସ୍ତାନ, ଆର୍ମେନିଆ ଓ ଜର୍ଜିଆକୁ ହରାଇଥିଲା । ପୂର୍ବରୁ ୨୦୧୪ ଏବଂ ୨୦୨୨ରେ ପୁରୁଷ ଦଳ ବ୍ରୋଞ୍ଜ ଜିତିଥିଲା । ସେମିତି ମହିଳା ଦଳ ୨୦୨୨ରେ ବ୍ରୋଞ୍ଜ ପଦକ ହାସଲ କରିଥିଲା ।
୨୦୨୦ ଓ ୨୦୨୧ ଅଲିମ୍ପିଆଡ୍ କୋଭିଡ୍ ଯୋଗୁ ଭର୍ଚୁଆଲରେ ଆୟୋଜନ କରାଯାଇଥିଲା । ପୁରୁଷରେ ଭାରତ ଓ ରୁଷିଆ ମିଳିତ ଭାବେ ପ୍ରଥମ ସ୍ଥାନ ହାସଲ କରିଥିଲେ । କିନ୍ତୁ ଏହି ଦୁଇ ପ୍ରତିଯୋଗିତାକୁ କୌଣସି ସଂସ୍କରଣର ମାନ୍ୟତା ଦିଆଯାଇନଥିଲା । ୨୦୧୮ରେ ୪୩ତମ ଏବଂ ୨୦୨୨ରେ ଚେନ୍ନାଇରେ ୪୪ତମ ସଂସ୍କରଣ ଆୟୋଜନ କରାଯାଇଥିଲା । ଚେନ୍ନାଇରେ ଉଭୟ ପୁରୁଷ ଓ ମହିଳା ଦଳ ବ୍ରୋଞ୍ଜ ଜିତିଥିଲେ ।
ପୁରୁଷ ଓ ମହିଳା ଦଳର ଐତିହାସିକ ସଫଳତା ପରେ ୬ ଥର ବିଶ୍ୱ ବିଜେତା ଜିଏମ୍ ବିଶ୍ୱନାଥନ ଆନନ୍ଦ ଉଭୟ ଦଳର ଖେଳାଳିଙ୍କୁ ଶୁଭେଚ୍ଛା ଜଣାଇଛନ୍ତି । ଚେସ୍ ଅଲିମ୍ପିଆଡ୍ ଗତ ୧୧ରୁ ଆରମ୍ଭ ହୋଇ ଆଜି ଉଦ୍ଯାପିତ ହୋଇଥିଲା
