ବେଙ୍ଗାଲୁରୁ,୨୯/୦୩: ଚଳିତ ଆଇପିଏଲ୍ର ଦଶମ ଲିଗ୍ ମୁକାବିଲାରେ ଶୁକ୍ରବାର ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଓ କୋଲକାତା ନାଇଟ୍ ରାଇଡର୍ସ ପରସ୍ପରକୁ ଭେଟିବାକୁ ଯାଉଛନ୍ତି । ପ୍ରଥମ ମ୍ୟାଚ୍ରେ ସନରାଇଜର୍ସ ହାଇଦ୍ରାବାଦକୁ ହରାଇଥିବା ନାଇଟ୍ ରାଇଡର୍ସ ବିଜୟଧାରା ଜାରି ରଖିବାକୁ ଲକ୍ଷ୍ୟ ରଖିଛି । ରୟାଲ୍ ଚ୍ୟାଲେଞ୍ଜର୍ସ ମଧ୍ୟ ଘରୋଇ ସମର୍ଥକଙ୍କ ମନ ଜିଣିବାକୁ ପ୍ରସ୍ତୁତ । ଏହି ମ୍ୟାଚ୍କୁ ନେଇ ଉତ୍ସୁକତା ବଢିବାରେ ଲାଗିଛି । ବିଶେଷ କରି ବିରାଟ କୋହଲି ଓ ଗୌତମ ଗମ୍ଭୀର ଏହି ମ୍ୟାଚ୍ ଜରିଆରେ ପୁଣି ଥରେ ସାମ୍ନା ସାମ୍ନି ହେଉଥିବାରୁ ଦର୍ଶକ ଉଭୟଙ୍କ ଟକ୍କର ଦେଖିବାକୁ ଅପେକ୍ଷା କରିଛନ୍ତି । ଗମ୍ଭୀର ଅବସର ନେଇ ସାରିଥିଲେ ହେଁ ବର୍ତ୍ତମାନ ନାଇଟ୍ ରାଇଡର୍ସ ଦଳର ମେଣ୍ଟର ନିଯୁକ୍ତ ଅଛନ୍ତି ।
ଏହି ମ୍ୟାଚ୍କୁ ନେଇ ପୂର୍ବାନୁମାନ କରିବା କଷ୍ଟକର । ଉଭୟ ଦଳ ସମ୍ପ୍ରତି ଚମତ୍କାର ପ୍ରଦର୍ଶନ କରୁଛନ୍ତି । ପୂର୍ବ ରେକର୍ଡକୁ ଗଣନା କଲେ ନାଇଟ୍ ରାଇଡର୍ସର ପଲା ଭାରି ରହିବ । ଗତ ବର୍ଷ ନାଇଟ୍ ରାଇଡର୍ସ ଉଭୟ ମ୍ୟାଚ୍ ଜିତିଥିଲା । ଗତ ୧୬ଟି ସଂସ୍କରଣ ମଧ୍ୟରେ ଉଭୟ ଦଳ ପରସ୍ପରକୁ ୩୨ଥର ଭେଟିଛନ୍ତି । ଏଥିରୁ ନାଇଟ୍ ରାଇଡର୍ସ ୧୮ଟି ଓ ରୟାଲ୍ ଚ୍ୟାଲେଞ୍ଜର୍ସ ୧୪ଟି ମ୍ୟାଚ୍ ଜିତିଛନ୍ତି ।
ପୂର୍ବ ବର୍ଷ ତୁଳନାରେ ଏଥର ରୟାଲ୍ ଚ୍ୟାଲେଞ୍ଜର୍ସ ବେଶ୍ ସନ୍ତୁଳିତ ମନେ ହେଉଛି । ଫାଫ ଡୁ ପ୍ଲେସି ଓ ବିରାଟ କୋହଲିଙ୍କ ଉପରେ ଦଳ ନିର୍ଭର କରୁନାହିଁ । କାରଣ ମଧ୍ୟ କ୍ରମରେ କାମେରନ ଗ୍ରୀନ୍ ଓ ଦିନେଶ କାର୍ତ୍ତିକଙ୍କ ଭଳି ଖେଳାଳି ରହିଛନ୍ତି । ଏମାନେ ଏକୁଟିଆ ମ୍ୟାଚ୍ ଜିତାଇବାର କ୍ଷମତା ରଖିଛନ୍ତି । ପ୍ରଥମ ୨ଟି ଯାକ ମ୍ୟାଚ୍ରେ ଅନୁଜ ରାୱତ ଓ ମହିପାଲ୍ ଲୋମରର ଚମତ୍କାର ପ୍ରଦର୍ଶନ କରିଛନ୍ତି । ପଞ୍ଜାବ କିଙ୍ଗ୍ସ ବିପକ୍ଷରେ ଲୋମରରଙ୍କ ଦ୍ରୁତ ଇନିଂସ ବଳରେ ରୟାଲ ଚ୍ୟାଲେଞ୍ଜର୍ସ ବିଜୟ ହାସଲ କରିଥିଲା ।
ବୋଲିଂ ବିଭାଗ ମଧ୍ୟ ସୁଦୃଢ଼ । ମହମ୍ମଦ ସିରାଜ ଓ ଅଲ୍ଜାରୀ ଜୋଶେଫ ପେସ୍ ବୋଲିଂ ବିଭାଗ ସମ୍ଭାଳୁଛନ୍ତି । ସ୍ପିନ ବିଭାଗ ସାମାନ୍ୟ ଦୁର୍ବଳ ମନେ ହେଉଥିଲେ ହେଁ ଦଳ ନିକଟରେ ଯଥେଷ୍ଟ ବିକଳ୍ପ ରହିଛି । ନାଇଟ୍ ରାଇଡର୍ସ ପ୍ରଥମ ମ୍ୟାଚ୍ରେ ସନରାଇଜର୍ସକୁ ହରାଇଥିଲା । ଏହି ମ୍ୟାଚ୍ରେ ଆନ୍ଦ୍ରେ ରସେଲଙ୍କ ଅଲ୍ରାଉଣ୍ଡ ପ୍ରଦର୍ଶନ ପ୍ରମୁଖ ଭୂମିକା ଗ୍ରହଣ କରିଥିଲା । ମାତ୍ର ଶ୍ରେୟାସ ଆୟର ଫିଟ୍ ହୋଇ ଫେରିବା ଦଳ ପାଇଁ ବେଶ୍ ଶୁଭଙ୍କର ସାବ୍ୟସ୍ତ ହେବ ।
ଚିନ୍ନାସ୍ୱାମୀ ଷ୍ଟାଡ଼ିୟମ୍ର ପିଚ୍ ବ୍ୟାଟିଂ ପାଇଁ ବେଶ୍ ଅନୁକୂଳ । ଛୋଟ ବାଉଣ୍ଡାରୀ ସାଙ୍ଗକୁ ଦ୍ରୁତ ଆଉଟ୍ ଫିଲ୍ଡରେ ବିଶାଳ ସ୍କୋର ସଂଗୃହୀତ ହେବା ଏକ ପ୍ରକାର ନିଶ୍ଚିତ । ଫ୍ଲଡ୍ ଲାଇଟ୍ ତଳେ ବ୍ୟାଟିଂ ସହଜ ହୋଇଯିବ । ଫଳରେ ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ସ୍ୱାଭାବିକ ।
ସମ୍ଭାବ୍ୟ ଦଳ
ରୟାଲ୍ ଚ୍ୟାଲେଞ୍ଜର୍ସ ଏକାଦଶ: ଫାଫ ଡୁ ପ୍ଲେସି(ଅଧିନାୟକ), ବିରାଟ କୋହଲି, ରଜତ ପାତିଦାର, ଗ୍ଲେନ୍ ମ୍ୟାକ୍ସୱେଲ୍, କାମେରନ ଗ୍ରୀନ, ଅନୁଜ ରାୱତ, ଦିନେଶ କାର୍ତ୍ତିକ, ଅଲଜାରୀ ଜୋଶେଫ, ମୟଙ୍କ ଡଗର, ଆକାଶଦୀପ, ମହମ୍ମଦ ସିରାଜ ।
ନାଇଟ୍ ରାଇଡର୍ସ ଏକାଦଶ: ଭେଙ୍କଟେଶ ଆୟର, ଫିଲ ସଲ୍ଟ, ଶ୍ରେୟାସ ଆୟର(ଅଧିନାୟକ), ନିତିଶ ରାଣା, ରିଙ୍କୁ ସିଂହ, ଆନ୍ଦ୍ରେ ରସେଲ, ରମଣଦୀପ ସିଂହ, ସୁନିଲ ନରାଏନ, ମିଚେଲ ଷ୍ଟାର୍କ, ହର୍ଷିତ ରାଣା, ବରୁଣ ଚକ୍ରବର୍ତ୍ତୀ ।
