ମୁମ୍ବାଇ ୦୪/୦୨: ଅଭିନେତ୍ରୀ ଡଲି ସୋହି ଶୋ’ ‘ଝନକ’ରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଥିଲେ। ବର୍ତ୍ତମାନ ଡଲି ଏହି ଶୋ’କୁ ଛାଡିଛନ୍ତି। କାରଣ ସେ ଗର୍ଭାଶୟ କର୍କଟ ସହିତ ଲଢୁଛନ୍ତି। ଯେଉଁଥିପାଇଁ ସେ ତାଙ୍କ ସ୍ୱାସ୍ଥ୍ୟ ଉପରେ ଧ୍ୟାନ ଦେବାକୁ ନିଷ୍ପତ୍ତି ନେଇଛନ୍ତି। ବର୍ତ୍ତମାନ ତାଙ୍କର କେମୋଥେରାପି ସେସନ୍ ଚାଲିଛି।
ଏକ ଇଣ୍ଟରଭ୍ୟୁରେ ଡଲି ତାଙ୍କ ଅବସ୍ଥା ବିଷୟରେ ବର୍ଣ୍ଣନା କରି କହିଛନ୍ତି, ରେଡିଏସନ୍ ଯୋଗୁଁ ସେ ଦୁର୍ବଳ ଅନୁଭବ କରୁଛନ୍ତି ଏବଂ ଏହି କାରଣରୁ ସେ କାମ କରିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ସେ ସୁସ୍ଥ ହେଲାପରେ କାମକୁ ଫେରିବେ ବୋଲି କହିଛନ୍ତି।
ଏହା ବ୍ୟତୀତ ଡଲି ପୁନମ ପାଣ୍ଡେଙ୍କ ମିଛ ମୃତ୍ୟୁ ଖବରକୁ ନେଇ ମଧ୍ୟ ପ୍ରତିକ୍ରିୟା ଦେଇଛନ୍ତି।ସେ ପୁନମଙ୍କ ଉପରେ କ୍ରୋଧ ପ୍ରକାଶ କରି କହିଛନ୍ତି- “ମୁଁ ଏହି ସମୟରେ ବହୁତ ଇମୋସନାଲ୍। ପୁନମ ପାଣ୍ଡେଙ୍କ ପରି ଲୋକଙ୍କ ପାଇଁ ମୁଁ ଯେକୌଣସି ସମୟରେ କାନ୍ଦିପାରେ, ଯେଉଁମାନେ ଗର୍ଭାଶୟ କର୍କଟକୁ ପରିହାସ କରିଛନ୍ତି। ପବ୍ଲିସିଟି ପାଇଁ ଏହା ଏକ ଭଲ ଉପାୟ ନୁହେଁ। ଯେଉଁମାନେ ଏହା ସହ ଲଢୁଛନ୍ତି ସେମାନେ ଏହି ଯନ୍ତ୍ରଣାକୁ ଭୋଗୁଛନ୍ତି। ଏହାକୁ ହଜମ କରିବା କଷ୍ଟକର। ଯେତେବେଳେ ମୁଁ ପୁନମଙ୍କ ମୃତ୍ୟୁ ଖବର ଶୁଣିଲି ଡରିଯାଇଥିଲି। “
