ନୂଆଦିଲ୍ଲୀ,୨୩।୯: ମଣିଷ ପାଇଁ ବିପଦ ପାଲଟିଛି ମାଇକ୍ରୋପ୍ଲାଷ୍ଟିକ୍। ନିକଟରେ ହୋଇଥିବା ରିସର୍ଚ୍ଚରୁ ଜଣାପଡିଛି ସାଂଘାତିକ ତଥ୍ୟ। ପ୍ରାୟ ୭ ହଜାର ରିସର୍ଚ୍ଚ ପରେ କରାଯାଇଥିବା ଏହି ବିଶ୍ଲେଷଣ ବଢାଇଲା ଚିନ୍ତା । ସାଇନ୍ସ ମାଗାଜିନ୍ର ଏକ ରିସର୍ଚ୍ଚ ଅନୁସାରେ, ବିଗତ ୨୦ ବର୍ଷ ମଧ୍ୟରେ ବଢିଛି ମାଇକ୍ରୋପ୍ଲାଷ୍ଟିକର ଉପସ୍ଥିତି। ଜଙ୍ଗଲି ଜନ୍ତୁ ଏବଂ ମଣିଷ ଶରୀରରେ ଦେଖିବାକୁ ମିଳିଛି ମାଇକ୍ରୋପ୍ଲାଷ୍ଟିକ୍ର କଣିକା। ଖାଦ୍ୟ ଏବଂ ପାନୀୟ ମାଧ୍ୟମରେ ଏହା ମଣିଷ ଶରୀରକୁ ପ୍ରବେଶ କରୁଛି।
ରିସର୍ଚ୍ଚରୁ ଜଣାପଡିଛି ଯେ, ମାନବ ଶରୀରର ପ୍ରତ୍ୟେକ ଅଙ୍ଗରେ ମାଇକ୍ରୋପ୍ଲାଷ୍ଟିକ୍ର ଉପସ୍ଥିତି ଦେଖିବାକୁ ମିଳିଛି। ଏହାର ଖରାପ ପ୍ରଭାବ ବିଷୟରେ ମଧ୍ୟ ଅନେକ ପ୍ରମାଣ ରହିଛି। ମାଇକ୍ରୋପ୍ଲାଷ୍ଟିକ୍ସର ସମସ୍ୟା ଯଦିଓ ଅଧିକ ଗମ୍ଭୀର ହୋଇନାହିଁ, କିନ୍ତୁ ଏହାର ମୁକାବିଲା ପାଇଁ ସାମୂହିକ ବିଶ୍ୱସ୍ତରୀୟ କାର୍ଯ୍ୟ ଜରୁରୀ । ତେବେ ଆସନ୍ତୁ ଜାଣିବା ଏ ମାଇକ୍ରୋ ପ୍ଲାଷ୍ଟିକ୍ କ’ଣ ? ପ୍ଲାଷ୍ଟିକର ବହୁତ ଛୋଟ ଖଣ୍ଡକୁ ମାଇକ୍ରୋପ୍ଲାଷ୍ଟିକ୍ କୁହାଯାଏ, ଏହାର ଲମ୍ବ ପାଞ୍ଚ ମିଲିମିଟର କିମ୍ବା ତା’ଠାରୁ କମ୍ ହୋଇଥାଏ। ଏମିତିକି କିଛି ପ୍ରଡକ୍ଟରେ ମାଇକ୍ରୋପ୍ଲାଷ୍ଟିକ୍ ଜାଣିଶୁଣି ମଧ୍ୟ ମିଶାଯାଇଥାଏ। ଏଇ ଯେପରି ମୁହଁରେ ଲଗାଯାଇଥିବା ସାବୁନରେ ମାଇକ୍ରୋବିଡ୍ ବ୍ୟବହାର କରାଯାଏ।
ଷ୍ଟଡି ଓ ରିସର୍ଚ୍ଚରୁ ମାଇକ୍ରୋପ୍ଲାଷ୍ଟିକ୍ର ସୋର୍ସ ବିଷୟରେ ଜଣାପଡିଛି। କସମେଟିକ୍ କ୍ଲିଞ୍ଜର, ସିନ୍ଥେଟିକ୍ କପଡା, ଗାଡିର ଟାୟର, ମାଛ ଧରିବାକୁ ବ୍ୟବହାର ରଶି ଏବଂ ଜାଲ ଭଳି ଜିନିଷ। ତେବେ ପ୍ଲାଷ୍ଟିକ୍ର ବଡ କଣିକା କେଉଁ ଭଳି ଭାଙ୍ଗି ମାଇକ୍ରୋପ୍ଲାଷ୍ଟିକ୍ ହୁଏ ତାହା ବିଜ୍ଞାନ ବି ଏପର୍ଯ୍ୟନ୍ତ ଆକଳନ କରିପାରିନି। ୨୦୨୦ ରେ ହୋଇଥିବା ରିସର୍ଚ୍ଚରୁ ଜଣାପଡିଛି ସମୁଦ୍ରରେ ପ୍ରତି ବର୍ଷ ୩୦ ଲକ୍ଷ ଟନ୍ରୁ ଅଧିକ ମାଇକ୍ରୋପ୍ଲାଷ୍ଟିକ୍ ପହଁଞ୍ଚିଥାଏ। ସମୁଦ୍ର ତୁଳନାରେ ଆମ ବାୟୁମଣ୍ଡଳରେ ୩ ରୁ ୧୦ ଗୁଣା ଅଧିକ ମାଇକ୍ରୋ ପ୍ଲାଷ୍ଟିକ୍ ଥିବାର ଜଣାପଡିଛି।
ଚିନ୍ତାର କାରଣ ଏହା ଯେ, ୨୦୪୦ ପର୍ଯ୍ୟନ୍ତ ମାଇକ୍ରୋପ୍ଲାଷ୍ଟିକ୍ ଏକାଠି ହେବାର ଆଶଙ୍କା ଦୁଇଗୁଣ ବଢିଯିବ।ବର୍ତ୍ତମାନ ସୁଦ୍ଧା ମାଛଠାରୁ ନେଇ ପକ୍ଷୀ ଏବଂ ପୋକ ସହିତ ୧୩୦୦ରୁ ଅଧିକ ଜୀବ-ଜନ୍ତୁଙ୍କ ମଧ୍ୟରେ ମାଇକ୍ରୋ ପ୍ଲାଷ୍ଟିକ୍ ଥିବାର ଜଣାପଡିଛି। ମଣିଷ ଶରୀରରେ ମଧ୍ୟ ମାଇକ୍ରୋପ୍ଲାଷ୍ଟିକ୍ ମିଳିଛି। ବାୟୁମଣ୍ଡଳରେ ନିଶ୍ବାସ-ପ୍ରଶ୍ବାସ ନେବାଠାରୁ ନେଇ ଖାଦ୍ୟ, ଲୁଣ, ମହୁ, ଚିନି ବିୟର ଏବଂ ଚା’ରେ ମାଇକ୍ରୋପ୍ଲାଷ୍ଟିକ୍ କଣିକା ମିଳିଛି। ମଣିଷ ଶରୀରର ଫୁସଫୁସ୍, ଲିଭର, କିଡନୀ, ରକ୍ତ ଓ ପ୍ରଜନନ ଅଙ୍ଗରେ ମାଇକ୍ରୋ ପ୍ଲାଷ୍ଟିକ୍ ମିଳିଛି। ଏହି ଟୁକୁଡା ଧିରେ ଧିରେ ଆମ ମସ୍ତିଷ୍କ ଓ ହାର୍ଟରେ ମଧ୍ୟ ମିଳିଛି। ତେବେ ମାଇକ୍ରୋପ୍ଲାଷ୍ଟିକ୍ ୟୁରିନ୍ ଜରିଆରେ ଆମ ଶରୀରରୁ ବାହାରି ଯାଇଥାଏ, କିନ୍ତୁ ଦୀର୍ଘ ସମୟ ପର୍ଯ୍ୟନ୍ତ ରହିବେ ମଣିଷର ଅନ୍ତନଳୀ ପାଇଁ ବିପଦ ହୋଇପାରେ।
