ରାୟପୁର : ଲୋକସଭା ନିର୍ବାଚନରେ ଭୋଟିଂ ମଧ୍ୟରେ ବସ୍ତର ଲୋକସଭା ସିଟ୍ରୁ ଆଶ୍ଚର୍ଯ୍ୟ କରିବା ଭଳି ଖବର ଆସିଛି ସାମନାକୁ। ବସ୍ତର ଲୋକସଭା ସିଟ୍ରେ ଏକ ଏମିତି ପୋଲିଂ ବୁଥ୍ ଅଛି, ଯେଉଁଠି ଆଜି ଦ୍ୱିପ୍ରହର ୩ଟାରେ ନିର୍ବାଚନ ଶେଷ ହେବା ଯାଏ ଗୋଟିଏ ବି ଭୋଟ ଦିଆଯାଇ ନାହିଁ। ଛତିଶଗଡ଼ର ନକ୍ସଲ ପ୍ରଭାବିତ ଅଞ୍ଚଳ ବସ୍ତରରେ କଡ଼ା ସୁରକ୍ଷା ମଧ୍ୟରେ ମତଦାନ କରାଯାଉଛି। ନିର୍ବାଚନ ଆୟୋଗ ମତଦାନକୁ ନେଇ ଯେଉଁ ତଥ୍ୟ ଜାରି କରିଛି ଏହି ଅନୁସାରେ , ଏବେସୁଦ୍ଧା ୫୮.୧୮ ପ୍ରତିଶତ ମତଦାନ ହୋଇଛି। ଏହାସହ ଖବର ଆସିଛି କି ବସ୍ତରରେ ଗୋଟିଏ ମତଦାନ କେନ୍ଦ୍ର ଏମିତି ହିଁ ଅଛି ଯେଉଁଠି ଦ୍ୱିପ୍ରହର ୩ଟା ଯାଏ ଗୋଟିଏ ବି ଭୋଟ ଦିଆଯାଇ ନାହିଁ ।
ଛତିଶଗଡ଼ର ବସ୍ତର ଲୋକସଭା ଅଞ୍ଚଳର ସୁକମା ଜିଲ୍ଲାରେ ପୂରା ଅଞ୍ଚଳର ଦୁର୍ଦ୍ଦାନ୍ତ ଓ ଚର୍ଚ୍ଚିତ ନକ୍ସଲି ହିଡମାର ପୂବର୍ତ୍ତି ଗାଁକୁ ସୁରକ୍ଷା ପାଇଁ ସବୁଠୁ ସମ୍ୱେଦନଶୀଳ ଭାବେ ଜଣାଯାଏ। ଏହି କାରଣରୁ ପ୍ରଶାସନ ଏଠାର ବୁଥ୍କୁ ଅନ୍ୟ ଅଞ୍ଚଳକୁ ସିଫ୍ଟ କରି ଦେଇଛି। ସିଲଗେରରେ ପୂବର୍ତ୍ତିର ପୋଲିଂକୁ ସିଫ୍ଟ କରି ଏଠାର ସୁରକ୍ଷାର କଡ଼ା ବନ୍ଦୋବସ୍ତ ମଧ୍ୟରେ ଭୋଟିଂ କରାଯାଇଛି। ସୁରକ୍ଷାର ବନ୍ଦୋବସ୍ତ ହେବା ପରେ ମଧ୍ୟ ପୂବର୍ତ୍ତି ଗାଁର ଗୋଟିଏ ବି ଭୋଟର ନିଜ ମତାଧିକାର ସାବ୍ୟସ୍ତ କରି ନାହାନ୍ତି।
ଉଲ୍ଲେଖନୀୟ ଯେ, ସୁକମା ଜିଲ୍ଲା ଅନ୍ତର୍ଗତ ପୂବର୍ତ୍ତି ଗାଁକୁ ନେଇ କୁହାଯାଏ କି, ଗତ ୩ ଦଶକରୁ ଏହି ଗାଁର ଲୋକେ ମତଦାନରେ ଭାଗ ନେଇ ନାହାନ୍ତି। ଏହା ପଛର କାରଣ ନକ୍ସଲଙ୍କ ଆତଙ୍କରାଜ। କୁହାଯାଉଛି କି ଏଠାରେ ନକ୍ସଲମାନେ ଭୋଟ ଦେଉଥିବା ଲୋକଙ୍କ ଆଙ୍ଗୁଠିକୁ କାଟି ଦିଅନ୍ତି। ଏହି ଡ଼ର ଆଜି ବି ଏଠାରେ ଲୋକଙ୍କ ମନରେ ଭୟ ସଞ୍ଚାର କରିଛି।
ଖବର ଅନୁସାରେ ଭୋଟ ଦେବା ପରେ ଏଠାରେ ଲୋକଙ୍କ ଆଙ୍ଗୁଠିରେ ସ୍ୟାହି ନଲଗେଇବାକୁ ବି ନିର୍ଦ୍ଦେଶ ଦିଆଯାଇ ଥିଲା, ଏହା ସତ୍ତ୍ୱେ ଏଠାରେ ଗାଁର ଜଣେ ବି ମତଦାତା ଭୋଟ୍ ଦେଇ ନାହାନ୍ତି।