ନୂଆଦିଲ୍ଲୀ: ଭାରତୀୟ କ୍ରିକେଟ ଜଗତ ସହ ଜଡ଼ିତ ଏକ ବଡ଼ ଖବର ସାମ୍ନାକୁ ଆସିଛି । ଭାରତୀୟ ମହିଳା କ୍ରିକେଟ ଟିମ୍ର ପୂର୍ବତନ କୋଚ୍ ତୁଷାର ଅରୋଠେଙ୍କ ଅଡ଼ୁଆ ବଢ଼ିବାରେ ଲାଗିଛି । ଭଦୋଦରା ପୋଲିସର ଏକ ସ୍ବତନ୍ତ୍ର ଅପରେସନ୍ ଟିମ୍ ତୁଷାର ଅରୋଠେଙ୍କ ଘରେ ଚଢ଼ାଉ କରିଛି । ଏନେଇ ପୋଲସି ସାମ୍ବାଦିକ ସମ୍ମିଳନୀରେ ସୂଚନା ଦେଇଛି । ତୁଷାର ଅରୋଠା ଭଦୋଦରା ଲାଗି ଘରୋଇ ମ୍ୟାଚ୍ ଖେଳିଥିବା ବେଳେ ମ୍ୟାଚ୍ ଫିକ୍ସିଂ ନେଇ ତାଙ୍କ ଉପରେ ମଧ୍ୟ ଅଭିଯୋଗ ରହିଛି ।
ଭାରତୀୟ ମହିଳା କ୍ରିକେଟ ଟିମ୍ର ପୂର୍ବତନ ପ୍ରଶିକ୍ଷକ ତୁଷାର ଅରୋଠେଙ୍କ ବିରୁଦ୍ଧରେ ଭଦୋଦରା ପୋଲିସ ମାମଲା ରୁଜୁ କରିଛି । ତୁଷାରଙ୍କ ଘରୁ ପୋଲସି ନଗଦ ଏକ କୋଟି ଟଙ୍କା ମଧ୍ୟ ଜବତ କରିଛି । ତୁଷାର ଅରୋଠେଙ୍କ ଘରେ ବହୁ ମାତ୍ରାରେ ନଗଦ ଟଙ୍କା ଗଚ୍ଛିତ ରହିଛି ବୋଲି ପୋଲିସକୁ ସୂଚନା ମିଳିଥିଲା । ପରେ ପୋଲିସ ଟିମ ତାଙ୍କ ଘରେ ଚଢ଼ାଉ କରିଥିଲା । ଏହି ସମୟରେ ତାଙ୍କର ପ୍ରତାପଗଞ୍ଜସ୍ଥିତ ଘରୁ ବ୍ୟାଗରେ ଭର୍ତ୍ତି ହୋଇଥିବା ଏକ କୋଟି ଟଙ୍କା ପୋଲସ ହାତରେ ଲାଗିଛି । ଆଉ ଏହି ଟଙ୍କା ତାଙ୍କ ପୁଅ ଋଷିଙ୍କ ଆପାର୍ଟମେଣ୍ଟରୁ ଆସିଥିଲା ବୋଲି ପୋଲିସ କହିଛି ।
ସେପଟେ ଏନେଇ ପଚାରିବାରୁ ତୁଷାର କୌଣସି ସନ୍ତୋଷଜନକ ଉତ୍ତର ଦେଇପାରି ନାହାନ୍ତି । ଏବେ ତୁଷାର କୋର୍ଟରେ ହାଜର ହୋଇ ଏତେ ଟଙ୍କା କେଉଁଠୁ ଆସିଲା ସେନେଇ କହିବେ । ଏବେ ତୁଷାର କିମ୍ବା ତାଙ୍କ ପୁଅଙ୍କୁ ପୋଲିସ ଗିରଫ କରିନାହିଁ । ଏହା ପୂର୍ବରୁ ୨୦୧୯ରେ ଆଇପିଏଲ ମ୍ୟାଚ୍ ଫିକ୍ସିଂ ମାମଲାରେ ତୁଷାର ଅରୋଠେ ଗିରଫ ହୋଇଥିଲେ ।
ଏପ୍ରିଲ ୨୦୧୯ରେ ଭଦୋଦରା କ୍ରାଇମବ୍ରାଞ୍ଚ ତୁଷାରଙ୍କ ସେମତ ୧୯ ଜଣଙ୍କୁ ଗିରଫ କରିଥିଲା । ତୁଷାର ଅରୋଠେ ମହିଳା କ୍ରିକେଟ ଟିମ୍ର ମୁଖ୍ୟ କୋଚ୍ ଥିଲେ । ତାଙ୍କର ୨ ବର୍ଷ କାର୍ଯ୍ୟକାଳ ବିସ୍ତାର ହୋଇଥିଲେ ହେଁ ସେ ୨୦୧୮ରେ ଇସ୍ତଫା ଦେଇଥିଲେ । ସେ ୨୦୦୮ରୁ ୨୦୧୨ ମଧ୍ୟରେ କୋଚିଂ ଷ୍ଟାଫରେ ମଧ୍ୟ ସାମିଲ ଥିଲେ ।
