ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ନିର୍ବାଚନରେ ପ୍ରାର୍ଥୀ ହୋଇଥିବା କମଲା ହ୍ୟାରିସଙ୍କୁ ସମର୍ଥନ ଜଣାଇଲେ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ୍‌ । ଭ୍ଲାଦିଭୋଷ୍ଟକରେ ଆୟୋଜିତ ଇଷ୍ଟର୍ଣ୍ଣ ଇକୋନୋମିକ୍‌ ଫୋରମ୍‌ରେ ପୁଟିନ୍‌ ଡେମୋକ୍ରାଟିକ୍‌ ପ୍ରାର୍ଥୀ କମଲା ହ୍ୟାରିସଙ୍କ ପ୍ରଭାବଶାଳୀ ହସର ପ୍ରଶଂସା କରିଛନ୍ତି । ଏହା ପୂର୍ବରୁ ପୁଟିନ୍‌ ରାଷ୍ଟ୍ରପତି ପ୍ରାର୍ଥୀ ଜୋ ବାଇଡେନଙ୍କୁ ନିଜର ସମର୍ଥନ ଜଣାଇଥିଲେ ।  ସେ ବାଇଡେନଙ୍କୁ ଅଧିକ ଅଭିଜ୍ଞ, ପୂର୍ବାନୁମାନିତ ବ୍ୟକ୍ତି ଏବଂ ପୁରୁଣା ସ୍କୁଲର ରାଜନେତା ବୋଲି କହିଥିଲେ ।  ଏପରିକି ତାଙ୍କର ଉତ୍ତରାଧିକାରୀ ଭାବରେ କମଲା ହ୍ୟାରିସଙ୍କୁ ଚୟନ କରିବା ନେଇ ବାଇଡେନଙ୍କ ନିଷ୍ପତ୍ତିକୁ ପୁଟିନ୍‌ ସମ୍ମାନ ଜଣାଇଥିଲେ । 

ଋଷ ରାଷ୍ଟ୍ରପତି ଆହୁରି କହିଛନ୍ତି, ‘ କମଲା ହ୍ୟାରିସଙ୍କ ପ୍ରଭାବୀ ହସରୁ ଜଣାପଡ଼ୁଛି ସବୁ କିଛି ଠିକଠାକ୍‌ ଚାଲିଛି ।’ ବାଇଡେନ ରାଷ୍ଟ୍ରପତି ନିର୍ବାଚନରୁ ଓହରିବା ପରେ ସେ(ପୁଟିନ) କାହାକୁ ସମର୍ଥନ କରିବେ ବୋଲି ପ୍ରଶ୍ନରେ ପୁଟିନ କହିଛନ୍ତି, ଆମେରିକୀୟଙ୍କ ନିଷ୍ପତ୍ତି ଉପରେ ନିର୍ଭର କରେ । କିନ୍ତୁ ମୁଁ ବାଇଡେନଙ୍କୁ ନିଷ୍ପତ୍ତିକୁ ସମ୍ମାନ ଜଣାଉଛି ।  ସେ କହିଛନ୍ତି, କମଲା ହ୍ୟାରିସଙ୍କ ମିଜାଜରୁ ଏହା ଅନୁମାନ କରାଯାଇପାରେ ଯେ, ସେ ଋଷ ଉପରେ ପ୍ରତିବନ୍ଧକ ଲଗାଇବେ ନାହିଁ । ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅନ୍ୟ ରାଷ୍ଟ୍ରପତିଙ୍କ ତୁଳନାରେ ମସ୍କୋ ଉପରେ ଅଧିକ ପ୍ରତିବନ୍ଧକ ଲଗାଇଛନ୍ତି ବୋଲି ପୁଟିନ୍‌ କହିଛନ୍ତି । 

ସେପଟେ ଆମେରିକା ରାଷ୍ଟ୍ରପତି ନିର୍ବାଚନରେ ଅଯଥା  ହସ୍ତକ୍ଷେପ କରିବାକୁ ବାରଣ କରିଛନ୍ତି ଆମେରିକା ନ୍ୟାସନାଲ ସିକ୍ୟୁରିଟି କାଉନସିଲ୍‌ ପ୍ରବକ୍ତା ଜନ କିର୍ବି । ଆମେରିକାର ପରବର୍ତ୍ତୀ ରାଷ୍ଟ୍ରପତି କିଏ ହେବେ ତା ସଂପୂର୍ଣ୍ଣ ରୂପେ ଆମେରିକର ଲୋକମାନଙ୍କ ଉପରେ ନିର୍ଭର କରେ । ଯଦି ଏକଥାକୁ ପୁଟିନ ମାନୁଛନ୍ତି ତେବେ ତାଙ୍କର ମନ୍ତବ୍ୟ ସ୍ବାଗତଯୋଗ୍ୟ ବୋଲି ସେ କହିଛନ୍ତି । ୨୦୨୪ ରାଷ୍ଟ୍ରପତି ନିର୍ବାଚନ ପ୍ରଚାରରେ ଋଷକୁ ଆମେରିକା ଦୋଷୀ ବୋଲି ଅବିହିତ କରିବା ପୂର୍ବରୁ ପୁଟିନଙ୍କ ଉପରୋକ୍ତ ମନ୍ତବ୍ୟକୁ ନେଇ ଚର୍ଚ୍ଚା ଲାଗିରହିଛି ।