ଭୁବନେଶ୍ୱର,୧୪/୦୯: ପୁରାଣ ବିଶ୍ୱାସ  ଅନୁଯାୟୀ ଶ୍ରୀଗଣେଶଙ୍କ ପରି ସୁପୁତ୍ର ପ୍ରାପ୍ତି  ନିମନ୍ତେ ବୁଧବାର ଶିବ ଚତୁର୍ଦ୍ଦଶୀରେ ମା’ପାର୍ବତୀ ପାଳନ କରିଥିଲେ ସ୍ୱତନ୍ତ୍ର ଓଷା । ଏଥିପାଇଁ  ଶ୍ରୀଲିଙ୍ଗରାଜ ମନ୍ଦିରରେ ସେବାୟତ ମାନେ ଦ୍ୱିପହର ଧୂପ ପରଠୁ ସମସ୍ତ ପ୍ରସ୍ତୁତି କରିଥିଲେ । 

ବିଧି ମୁତାବକ ବିଷୋୟୀ ସେବାୟତ  ମାନେ ରାଶି,ହରଡ ଓ ବୁଟ ଭାଜି ପିଠା ତିଆରି  ଲାଗି ପୁର ତିଆରି କରିଥିଲେ । ସେହିପରି ମହାସୁଆରଙ୍କ ଦ୍ୱାରା ଗୁଡ,ଗୋଲମରିଚ,ଅଦା  ଓ ଅଟା ମିଶାଇ ପିଠା ପ୍ରସ୍ତୁତି କରାଯାଇଥିଲା ।  କୁମ୍ଭକାର ସେବାୟତମାନେ ପିଠା ପ୍ରସ୍ତୁତି ଲାଗି ପାତ୍ର ଯୋଗାଇବା ନିମନ୍ତେ ମନ୍ଦିରକୁ  ଶୋଭାଯାତ୍ରାରେ ଆସିଥିଲେ । ଶୋଭାଯାତ୍ରାରେ  ପାରମ୍ପରିକ ବାଦ୍ୟ,ମେଘ ଡମ୍ବରୁ,ଘଣ୍ଟ ଓ ଘଣ୍ଟା ଆଦି ଶ୍ରଦ୍ଧାଳୁଙ୍କୁ ମନ୍ତ୍ରମୁଗ୍ଧ କରିଥିଲା ।  ପରକରଣା ସେବାୟତମାନେ ମଧ୍ୟ ପରମ୍ପରା  ମୁତାବକ ନଡିଆ ବାଣ୍ଟି ଥିଲେ । ପିଠା ପ୍ରସ୍ତୁତି ପରେ ସନ୍ଧ୍ୟାଧୂପରେ ପୂଜାପଣ୍ଡା ସେବାୟତ  ରୂପା ଥାଳିରେ ମା’ଙ୍କ ଠାରେ ୭ଟି ପିଠା ଭୋଗ  ଲାଗି କରିଥିଲେ । ଏହା ସହିତ ଚତୁର୍ଦ୍ଦଶୀ ନିମନ୍ତେ ମହାଦୀପ ମଧ୍ୟ ଉଠିଥିଲା । ଶେଷରେ  ମନ୍ଦିରରେ ଅବଶିଷ୍ଟ ନୀତି ସମାପନ ପରେ ପହୁଡ  ପଡିଥିଲା । ଆଜି ଶ୍ରୀଜିଉଙ୍କ ସାତପୁରୀ ଅମାବାସ୍ୟା  ନୀତି ପାଳନ କରାଯିବ । ଏହି ନୀତି ନିମନ୍ତେ  ଅଷ୍ଟଚଣ୍ଡୀ ଓ ଅନ୍ୟାନ୍ୟ ଦେବାଦେବୀଙ୍କ ପୂଜାର୍ଚ୍ଚନା  କରାଯିବ । ସକାଳଧୂପ ଠାରୁ ପ୍ରାୟ ଅନ୍ୟାନ୍ୟ ସବୁ  ନୀତିରେ ସାତ ପ୍ରକାରର ପିଠା ଲାଗି କରାଯିବ ।