ନୂଆଦିଲ୍ଲୀ, ୧୭/୯ : ବକ୍ସ ଅଫିସରେ ଗୋଟିଏ ପରେ ଗୋଟିଏ ରେକର୍ଡ଼ କରୁଛି ଏବଂ ଧ୍ବଂସ କରୁଛି ସ୍ତ୍ରୀ ୨ । ଏବେ ପୁଣି ଏକ ବଡ଼ ରେକର୍ଡ଼ ଭାଙ୍ଗିଛି । ଶ୍ରଦ୍ଧା କପୁର ଏବଂ ରାଜକୁମାର ରାଓ୍ବଙ୍କ ଫିଲ୍ମ ମଙ୍ଗଳବାର କଲେକ୍ସନ ସହ ପୁଣି ଏକ ବଡ଼ ରେକର୍ଡ଼ ନିଜ ନାଁରେ କରି ନେଇଛି ।  ପ୍ରକାଶ ଯେ, ୧୫ଅଗଷ୍ଟରେ ରିଲିଜ ହୋଇଥିବା ଶ୍ରଦ୍ଧା କୁପର ଏବଂ ରାଜକୁମାର ରାଓ୍ବଙ୍କ ଏହି ହରର କମେଡ଼ି ଫିଲ୍ମ ଗୋଟିଏ ମାସ ପରେ ବି ଲୋକଙ୍କ ହୃଦୟ ଜିତୁଛି । ଫିଲ୍ମ ନିଜର ୩୪ଦିନର କଲେକ୍ସନ ସହ ଏବେ ଶାହରୁଖ ଖାନଙ୍କ ଫିଲ୍ମ ‘ଜଓ୍ବାନ’ର ବଡ଼ ରେକର୍ଡ଼ ଭାଙ୍ଗି ଇତିହାସ ରଚିଛି । 

ଫିଲ୍ମ କ୍ରିଟିକ୍ସ ତରଣ ଆଦର୍ଶଙ୍କ ଦ୍ବାରା ଜାରି କରାଯାଇଥିବା ସଂଖ୍ୟା ମୁତାବକ ସୋମବାର ପର୍ଯ୍ୟନ୍ତ ସ୍ତ୍ରୀ ୨ର ଟୋଟାଲ କଲେକ୍ସନ ୫୮୩.୩୫କୋଟି ଟଙ୍କା ହୋଇଥିଲା । ସେହିଭଳି ସ୍ୟାକନିଲ୍କର ରିପୋର୍ଟ ଅନୁସାରେ ସ୍ତ୍ରୀ ୨ ନିଜ ୩୪ତମ ଦିନ ସନ୍ଧ୍ୟା ୫ଟା ସୁଦ୍ଧା ୧କୋଟି ଟଙ୍କା କଲେକ୍ସନ କରି ନେଇଛି । ଏହା ସହ ସ୍ତ୍ରୀ ୨ର ଟୋଟାଲ କଲେକ୍ସନ ୫୮୪.୩୫କୋଟି ଟଙ୍କା ହୋଇସାରିଛି ।

ପ୍ରକାଶ ଯେ, ଶାହରୁଖ ଖାନଙ୍କ ଜଓ୍ବାନ ଏବେ ପର୍ଯ୍ୟନ୍ତ ହିନ୍ଦୀ ଭର୍ସନର ଘରୋଇ ବକ୍ସ ଅଫିସରେ ସବୁଠାରୁ ଅଧିକ କଲେକ୍ସନ କରିଥିବା ଫିଲ୍ମ ଥିଲା । ସେହିଭଳି ଏବେ ସ୍ତ୍ରୀ ୨ର ନାଁ ଯୋଡ଼ି ହୋଇଛି । ଜଓ୍ବାନର ହିନ୍ଦୀ ଭର୍ସନ ୫୮୪କୋଟି ଟଙ୍କା କଲେକ୍ସନ କରିଥିଲା । ଯାହାକି ଏବେ ଏହି ସଂଖ୍ୟାକୁ ପାର୍ କରି ଶ୍ରଦ୍ଧା କପୁର ଏବଂ ରାଜକୁମାର ରାଓ୍ବଙ୍କ ଫିଲ୍ମ ନମ୍ବର ୧ ହିନ୍ଦୀ ଫିଲ୍ମ ହୋଇଯାଇଛି ।