ନୂଆଦିଲ୍ଲୀ: ଗୋଗାମେଡି ହତ୍ୟାକାଣ୍ଡ ମାମଲାରେ ରାଜସ୍ଥାନ ପୋଲିସ ହରିୟାଣାର ଜଣେ ଯୁବକଙ୍କୁ ଗିରଫ କରିଛି । ପୋଲିସ ଏ ସମ୍ପର୍କରେ ସୂଚନା ଦେଇଛି । ଜୟପୁର ପୋଲିସ କମିଶନର ବିଜୁ ଜର୍ଜ ଜୋସେଫ କହିଛନ୍ତି ଯେ, ଗୋଗାମେଡି ହତ୍ୟା ମାମଲାର ଷଡଯନ୍ତ୍ରକାରୀଙ୍କ ମଧ୍ୟରୁ ଅଭିଯୁକ୍ତ ରାମବୀର ଜାଟଙ୍କୁ ଆଜି (ଶନିବାର) ଗିରଫ କରାଯାଇଛି । ସେ ହରିୟାଣାର ମହେନ୍ଦ୍ରଗଡ ଜିଲ୍ଲାର ସୁରେତି ପିଲାନିୟନ ଗାଁର ବାସିନ୍ଦା । 

ଶ୍ରୀ ରାଷ୍ଟ୍ରିୟ ରାଜପୁତ କରଣୀ ସେନାର ରାଷ୍ଟ୍ରୀୟ ଅଧ୍ୟକ୍ଷ ସୁଖଦେବ ସିଂ ଗୋଗାମେଡିଙ୍କୁ ମଙ୍ଗଳବାର ଦିନ ସୁଟର ନିତିନ ଫୌଜି ଏବଂ ରୋହିତ ରାଠୋଡ ଆଖିବୁଜା ଗୁଳିମାଡ କରି ହତ୍ୟା କରିଥିଲେ । ପୋଲିସର ସୂଚନାନୁସାରେ, ରାମବୀର ଜୟପୁରରେ ନିତିନ ଫୌଜିଙ୍କ ପାଇଁ ସମ୍ପୂର୍ଣ୍ଣ ବ୍ୟବସ୍ଥା କରିଥିଲେ । ସେ କହିଛନ୍ତି ଯେ ଦୁହେଁ ଭଲ ବନ୍ଧୁ । ଏହି ଘଟଣା ପରେ ରାମବୀର ଅଭିଯୁକ୍ତ ନିତିନ ଏବଂ ରୋହିତଙ୍କୁ ଏକ ମୋଟର ସାଇକେଲରେ ନେଇ ବାଗ୍ରୁ ଟୋଲ ପ୍ଲାଜା ଆଗକୁ ନେଇ  ରାଜସ୍ଥାନ ରୋଡୱେର ଏକ ବସ୍‌ରେ ବସାଇଥିଲେ । ପୋଲିସର ସୂଚନାନୁସାରେ, ଏହି ମାମଲାରେ ରାମବୀର ଏବଂ ଅନ୍ୟ ଜଣେ ଅଭିଯୁକ୍ତଙ୍କୁ ପଚରାଉଚରା କରାଯାଉଛି ।