ଭଦ୍ରକ,୨୦।୩ : ଦୋକାନରୁ ସଉଦା କିଣିଲେ, ଦୋକାନୀକୁ ୪୦ ଟଙ୍କା କମ ଦେଲେ ଗ୍ରାହକ । ଦୋକାନୀ ମାଗିବାରୁ ଏହାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ହେଲା। ଶେଷରେ ଗ୍ରାହକଙ୍କ ମାଡ଼ରେ ଦୋକାନୀଙ୍କ ଜୀବନ ଚାଲିଗଲା। ଭଦ୍ରକ ସହରାଞ୍ଚଳ ଥାନା ଅଧିନ ଚରମ୍ପା ପଥରଆଡ଼ିରେ ଏହି ଘଟଣା ଘଟିଛି। ମୃତକ ଜଣକ ହେଲେ ଭଦ୍ରକ ଜିଲ୍ଲା ସାବରଙ୍ଗ ଥାନା ଅଧିନ ବଣିଆ ଗାଁର ବିଜୟ ପଣ୍ଡା ।

ଭଦ୍ରକ ଜିଲ୍ଲା ସାବରଙ୍ଗ ଥାନା ଅଧିନ ବଣିଆ ଗାଁର ବିଜୟ ପଣ୍ଡା ଭଦ୍ରକ ଟାଉନ ଥାନା ଅଧିନ ଚରମ୍ପା ପଥରଆଡ଼ି ଛକରେ ଏକ ତେଜରାତି ଦୋକାନ କରିଥିଲେ । ଦ୍ୱିପ୍ରହର ସମୟରେ ସେହି ଅଞ୍ଚଳର କାମେଶ ପରିଡା ବିଜୟଙ୍କ ଦୋକାନକୁ ଆସି ସଉଦା ନେଇଥିଲେ । ସମୁଦାୟ ୧୮୦ ଟଙ୍କା ହୋଇଥିବା ବେଳେ ସେ ଫୋନ ପେରେ ୧୪୦ ଟଙ୍କା ଦେଇ ପଳାଉଥିବା ବେଳେ ବିଜୟ ତାଙ୍କୁ ବଳକା ୪୦ ଟଙ୍କା ମାଗିଥିଲେ । ଏହାକୁ ନେଇ ବିଜୟ ଙ୍କ ସହ କାମେଶର ଯୁକ୍ତିତର୍କ ହୋଇଥିଲା। ପରେ କାମେଶଙ୍କ ଧକ୍କାରେ  ବିଜୟ ତଳେ ପଡିଯାଇଥିଲେ । ପରେ ସ୍ଥାନୀୟ ଲୋକେ ବିଜୟ ଙ୍କୁ ଦୋକାନ ରୁ ଉଦ୍ଧାର କରି ଭଦ୍ରକ ମେଡିକାଲ ରେ ଭର୍ତ୍ତି କରିଥିଲେ। ସେଠାରେ  ଡାକ୍ତର ମୃତ ଘୋଷଣା କରିଥିଲେ । ଏହାକୁ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ଦେଖାଦେଇଛି । ପୋଲିସ ଘଟଣା ର ତଦନ୍ତ ଆରମ୍ଭ କରିଛି । ମୃତକ ଙ୍କ ପରିବାର ଲୋକେ ଭଦ୍ରକ ସହରାଞ୍ଚଳ ଥାନା ରେ ଏତଲା ଦେଇଛନ୍ତି ।