କୋରାପୁଟ,୨୮/୦୯: କୋରାପୁଟ ଜିଲ୍ଲା ସେମିଳିଗୁଡ଼ା ବ୍ଲକ୍ର ଦୁଧାରୀ ଓ ପଟ୍ଟାଙ୍ଗି ବ୍ଲକ୍ର ଥୁରିଆ ଅଞ୍ଚଳରେ ବାହାରୁଛି ମୂଲ୍ୟବାନ ରତ୍ନପଥର । ଏହାକୁ ନେଇ ସ୍ଥାନୀୟ ଅଞ୍ଚଳରେ ଜୋର୍ଦାର୍ ଚର୍ଚ୍ଚା । ଏହାକୁ ଆଧାର କରି ଅଞ୍ଚଳରେ ଆନ୍ଧ୍ର ଦଲାଲ ସକ୍ରିୟ ହୋଇଛନ୍ତି । ସ୍ଥାନୀୟ ଲୋକଙ୍କ ଜରିଆରେ ମାଟି ଖୋଳୁଛନ୍ତି । ସେଠାରୁ ମିଳୁଥିବା ବିଭିନ୍ନ ପ୍ରକାର ପଥର ସଂଗ୍ରହ କରୁଛନ୍ତି । ବଦଳରେ ସ୍ଥାନୀୟ ଲୋକଙ୍କୁ କିଛି ଟଙ୍କା ଦେଉଛନ୍ତି । ଉପରୋକ୍ତ ଦୁଇ ଅଞ୍ଚଳ ପାହାଡ଼ ପାଦଦେଶରେ ଥିବାରୁ ଖଣିଜ ସମ୍ପଦ ଥିବା ଚର୍ଚ୍ଚାକୁ ଏଡ଼ାଇ ଦେଇ ହେବ ନାହିଁ । କାରଣ ଆଗରୁ ଥୁରିଆ ଅଞ୍ଚଳରୁ ପ୍ରବଳ ମୂଲ୍ୟବାନ ପଥର ମିଳିଥିବା ନଜିର୍ ରହିଛି ।
ଏହାକୁ ଅଞ୍ଚଳବାସୀ ଗମ୍ଭୀରତାର ସହ ନେଇଛନ୍ତି । ଗାଁର ପିଲାଠୁ ବୁଢ଼ା ସଭିଏଁ ପାହାଡ଼ରେ ଘୂରି ବୁଲୁଛନ୍ତି । ବିଭିନ୍ନ ସ୍ଥାନ ଚିହ୍ନଟ କରି ମାଟି ଖୋଳୁଛନ୍ତି । ପାହାଡ଼ରୁ ଆସିଥିବା ଛୋଟଛୋଟ ଝରଣାର ବାଲିଆ ମାଟି ସଂଗ୍ରହ କରି ସେଠାରୁ ରତ୍ନ ଓ ଅନ୍ୟାନ୍ୟ ପଥର ଖୋଜୁଛନ୍ତି । ଆଖପାଖ ଗାଁ ଲୋକେ ବି ଏହି ଅଞ୍ଚଳକୁ ଆସି ପଥର ଖୋଜିବାରେ ଲାଗି ପଡ଼ିଛନ୍ତି । ପ୍ରାୟ ମାସେ ହେବ ଏଭଳି ସ୍ଥିତି ଲାଗି ରହିଛି । ଅଥଚ ଜିଲ୍ଲା କିମ୍ବା ସ୍ଥାନୀୟ ପ୍ରଶାସନ ପାଖରେ ଏ ସମ୍ପର୍କରେ କୌଣସି ଖବର ନାହିଁ । ଏହା କେବଳ ଏକ ଚର୍ଚ୍ଚା ନା’ ପଛରେ କିଛି ସତ୍ୟତା ରହିଛି, ପ୍ରଶାସନ ତୁରନ୍ତ ଦୃଷ୍ଟି ଦେବା ଆବଶ୍ୟକ ବୋଲି ବୁଦ୍ଧିଜୀବୀମାନେ କହିଛନ୍ତି ।
ଥୁରିଆ ଅଞ୍ଚଳର ମନ ପାଙ୍ଗି କହିଛନ୍ତି, ପୂର୍ବରୁ ଏହି ଅଞ୍ଚଳରୁ ବିଭିନ୍ନ ପ୍ରକାର ମୂଲ୍ୟବାନ ପଥର ମିଳିଛି । ଲୋକେ ପାଇଛନ୍ତି ମଧ୍ୟ । ତେଣୁ ଏହି ଚର୍ଚ୍ଚାକୁ ମିଛ ବୋଲି କହିହେବନି । ଏଥିପାଇଁ ଲୋକେ ଏହା ପଛରେ ପଡ଼ିଛନ୍ତି । ଆନ୍ଧ୍ର ଅଞ୍ଚଳରୁ କିଛି ଲୋକ ଏଠାକୁ ନିୟମିତ ଆସୁଛନ୍ତି । ସ୍ଥାନୀୟ ଅଞ୍ଚଳବାସୀଙ୍କ ସହ ଜଙ୍ଗଲକୁ ଯାଉଛନ୍ତି । ସେଠାରେ ମାଟି ହାଣି ବାହାରୁଥିବା ବିଭିନ୍ନ ପଥରକୁ ମେସିନ୍ ଲଗାଇ ପରୀକ୍ଷା ନିରୀକ୍ଷା କରୁଛନ୍ତି । ପ୍ରଶାସନ ଏହି ସ୍ଥାନଗୁଡ଼ିକରେ ପରୀକ୍ଷା କରି ନିଜ ଅକ୍ତିଆରକୁ ନେଲେ ବାସ୍ତବ ତଥ୍ୟ ଜଣାପଡ଼ିବ ।
ଦୁଧାରୀ ଅଞ୍ଚଳର ମନୋଜ ନାଏକ କହିଛନ୍ତି, କୋରାପୁଟ ହେଉଛି ରତ୍ନଗର୍ଭା । ନିକଟରେ ଏଠାରେ ସୁନା ଖଣି ଥିବା ସରକାର କହିଛନ୍ତି । ଲୋକଙ୍କ କହିବା ଅନୁସାରେ, ଆନ୍ଧ୍ର ଅଞ୍ଚଳରୁ କେତେକ ଲୋକ ଏଠାକୁ ବୁଲିବାକୁ ଆସିଥିଲେ । ଏଠାରୁ କିଛି ପଥର କିଣି ନେଇ ଏହା ମୂଲ୍ୟବାନ ବୋଲି କହିଥିଲେ । ସେବେଠୁ ଲୋକେ ପାହାଡ଼କୁ ଯାଇ ଏଭଳି ପଥର ସଂଗ୍ରହ କରୁଛନ୍ତି । ଅଞ୍ଚଳବାସୀଙ୍କୁ ସଚେତନ କରିବାର ଆବଶ୍ୟକତା ରହିଛି । ଏଥିସହ ଦଲାଲଙ୍କୁ ଏହି ଅଞ୍ଚଳରେ ପ୍ରବେଶ ନିଷେଧ କରିବା ଜରୁରି ।
ଏ ସମ୍ପର୍କରେ କୋରାପୁଟ ଉପଜିଲ୍ଲାପାଳ ବେଣୁଧର ଶବରଙ୍କୁ ପଚାରିବାରୁ ଘଟଣା ସମ୍ପର୍କରେ ବୁଝିବେ ବୋଲି କହିଛନ୍ତି । ରାଜ୍ୟ ଖଣି ବିଭାଗ ଉପନିର୍ଦ୍ଦେଶକ ପ୍ରଦୀପ ନାୟକ କହିଛନ୍ତି, ମୂଲ୍ୟବାନ ପଥର ପାଇଁ ମାଟି ଖୋଳୁଛନ୍ତି ନା’ ଅନ୍ୟ କୌଣସି ଉଦ୍ଦେଶ୍ୟ ରହିଛି ତାହାର ତଦନ୍ତ କରାଯିବ । ଏ ଅଞ୍ଚଳରେ ସର୍ଭେ ପରେ ପ୍ରକୃତ ତଥ୍ୟ ଜଣାପଡ଼ିବ ।
ପ୍ରକାଶଥାଉ କି, ଏହି ଅଞ୍ଚଳରୁ ପୂର୍ବରୁ ବହୁ ମୂଲ୍ୟବାନ ପଥର ମିଲୁଥିଲା । ଯାହାକୁ ସଂଗ୍ରହ କରି ଅନେକ ଲୋକ ମାଲାମାଲ୍ ହୋଇଛନ୍ତି । ଏଭଳି ଉଦାହରଣ ରହିଥିବାରୁ ଲୋକେ ରତ୍ନପଥର ପଛରେ ଏକପ୍ରକାର ପାଗଳ ହୋଇଯାଇଛନ୍ତି । ଦିନରାତି ପାହାଡ଼ରେ ଘୂରି ବୁଲୁଛନ୍ତି ।
