ଜଗତସିଂହପୁର,୧୭/୦୩: ଆନୁଷ୍ଠାନିକ ଭାବେ ବିଜେଡି ହାତ ଧରିବାକୁ ଯାଉଛନ୍ତି ପାରାଦୀପର ବିଶିଷ୍ଟ ଶ୍ରମିକ ନେତା ବାପି ସର୍ଖେଲ୍ଙ୍କ ପତ୍ନୀ ମୋନିଦୀପା ସର୍ଖେଲ । ରବିବାର ରାଜଧାନୀର ଶଙ୍ଖ ଭବନରେ ମହାମିଶ୍ରଣ ପର୍ବ ହେବାକୁ ଯାଉଛି । ଯେଉଁଠି ପାରାଦୀପ ନିର୍ବାଚନମଣ୍ଡଳୀର ପ୍ରାୟ ୩ ହଜାର କର୍ମୀ, ସମର୍ଥକ ଓ ଶୁଭେଚ୍ଛୁଙ୍କ ସହ ମୋନିଦୀପା ବିଜେଡିରେ ସାମିଲ ହେବେ ବୋଲି ବାପି ସ୍ପଷ୍ଟ କରିଛନ୍ତି ।
ମିଳିଥିବା ସୂଚନା ମୁତାବକ, ଏହି ମିଶ୍ରଣ ପର୍ବ ପରେ ଖୁବ୍ ଶୀଘ୍ର କୁଜଙ୍ଗ କିମ୍ବା ପାରାଦୀପରେ ଅନୁରୂପ କର୍ମୀ ସମାବେଶ କରାଯିବ । ସେଥିରେ ବାପିଙ୍କ ସମର୍ଥକ ତୃଣମୂଳ ସ୍ତରର କର୍ମୀମାନେ ବିଜେଡିରେ ଯୋଗଦେବେ । ରବିବାର ମିଶ୍ରଣ ଉତ୍ସବକୁ ନେଇ ପାରାଦୀପର ରାଜନୈତିକ ବାତାବରଣ ଚଳଚଞ୍ଚଳ ହୋଇଉଠିଛି । ହଜାର ହଜାର କର୍ମୀ ଓ ସମର୍ଥକ କିଭଳି ରାଜଧାନୀ ଶଙ୍ଖ ଭବନରେ ପହଞ୍ଚିବେ ସେନେଇ ପ୍ରସ୍ତୁତି ଚାଲିଛି । ଉଲ୍ଲେଖନୀୟ ବିଷୟ, ମୋନିଦୀପାଙ୍କ ସହ ଆମ ପାରାଦୀପ ଆମ ପ୍ରଗତିର ଅନେକ ପାରିଷଦ ମଧ୍ୟ ଶଙ୍ଖ ଭବନରେ ଉପସ୍ଥିତ ରହିବେ ।
ଏପଟେ ବାପିଙ୍କ ପତ୍ନୀ ବିଜେଡିରେ ଯୋଗଦେବା ପରେ ପାରାଦୀପ ନିର୍ବାଚନମଣ୍ଡଳୀରେ ଶଙ୍ଖ ଚିହ୍ନର ଶକ୍ତି ବଢ଼ିଯିବ ବୋଲି କୁହାଯାଉଛି । ଦୀର୍ଘ ବର୍ଷ ଧରି ଏହି ନିର୍ବାଚନମଣ୍ଡଳୀରେ କଂଗ୍ରେସ ସଂଗଠନର ମଙ୍ଗୁଆଳ ଥିଲେ ବାପି । ଦୁଇ ଥର ସେ ବିଧାୟକ ଭାବେ ଲଢ଼ି ପରାଜିତ ହୋଇଥିଲେ । ପ୍ରାୟ ୫୦ ହଜାର ଭୋଟରଙ୍କ ସମର୍ଥନ ପାଇଥିଲେ । କିନ୍ତୁ ବିଜେଡି ଏଠି ବିଜୟଧାରାକୁ ଅକ୍ଷୁଣ୍ଣ ରଖିଥିଲା । ଏଠାରେ ବିଜେଡିର ମୁଖ୍ୟ ପ୍ରତିଦ୍ୱନ୍ଦ୍ୱୀ ଥିଲା କଂଗ୍ରେସ ।
କଂଗ୍ରେସରେ ଥାଇ ସୁଦ୍ଧା ବାପି ଗତ ପୌର ଭୋଟରେ ଆମ ପାରାଦୀପ ଆମ ପ୍ରଗତି ନାଁରେ ସଙ୍ଗଠନ ଗଢ଼ି ପୌର ଉପାଧ୍ୟକ୍ଷ ଚୌକି ଅକ୍ତିଆର କରିଥିଲେ । ଫଳରେ କଂଗ୍ରେସ ସଙ୍ଗଠନ ଏକପ୍ରକାର ବାପିଙ୍କ ହାତମୁଠାରେ ରହିଥିବା ଅନୁଭବ ହୋଇଥିଲା । ଏବେ ବାପିଙ୍କ ପତ୍ନୀ ମୋନିଦୀପା ବିଜେଡିରେ ସାମିଲ ହେଉଥିବାରୁ ପାରାଦୀପ ନିର୍ବାଚନମଣ୍ଡଳୀରେ କଂଗ୍ରେସ ତା’ର ସତ୍ତା ବଞ୍ଚାଇବା କଷ୍ଟକର ହୋଇପଡ଼ିବ ଓ ବିଜେଡି ଶକ୍ତିଶାଳୀ ଦଳ ଭାବେ ଉଭା ହେବ ବୋଲି କୁହାଯାଉଛି । ଅନ୍ୟପଟେ ମୋନିଦୀପା କେବଳ ବିଜେଡିରେ ଯୋଗ ଦେବେ ବୋଲି କହି ନିଜ ଭବିଷ୍ୟତ ରଣନୀତିକୁ ଗୋପନ ରଖିଛନ୍ତି ବାପି ।