ଭୁବନେଶ୍ୱର,୦୭/୦୯: କ୍ୟାପିଟାଲ ହସ୍ପିଟାଲ୍ ଶିଶୁ ବିଭାଗରେ ସାଙ୍ଗାତିକ ପରିସ୍ଥିତି । ଶିଶୁଙ୍କ କାନ୍ଦ ବୋବାଳିରେ ଫାଟି ପଡ଼ୁଛି ପରିସର । ପାଦ ପକାଇବା ପାଇଁ ଜାଗା ନାହିଁ । ଦିନକୁ ଭାଇରାଲ ଫିଭରରେ ଆକ୍ରାନ୍ତ ୩୦୦ ଶିଶୁ ଚିକିତ୍ସା ପାଇଁ ଆସୁଛନ୍ତି । ଜ୍ୱରରେ ଥରୁଥିବା ପିଲାଙ୍କୁ କାଖରେ ଧରି ମା’ ମୁଣ୍ଡକୁ ଆଉଁସି ଦେଉଛି, ଥାପୁଡ଼ାଉଛି । ହେଲେ ଅବୁଝା ପିଲା ଯନ୍ତ୍ରଣାରେ ଛଟପଟ ହୋଇ କାନ୍ଦି ଚାଲିଛନ୍ତି । ଜ୍ୱର, କାଶ, ଝାଡ଼ା ଆଉ ନିଃଶ୍ୱାସରେ ନେବାରେ ଧଇଁସଇଁ ହେଉଛନ୍ତି । ଆଉଟ୍ ଡୋର ଓ ଇନ୍ଡୋର୍ରେ ପିଲା ଖୁନ୍ଦି ହେଉଛନ୍ତି । ଡାକ୍ତର, ନର୍ସଙ୍କୁ ଫୁର୍ସତ ମିଳୁନଥିବା ଦେଖିବାକୁ ମିଳିଛି ।
ସାଧାରଣ ୱାର୍ଡରେ ଯେତିକି ଶିଶୁ ଭର୍ତ୍ତି ହୋଇଛନ୍ତି, ତା’ଠାରୁ ଅଧିକ ଚଟାଣରେ ପଡ଼ିଛନ୍ତି। ସେଠାରେ ଯନ୍ତ୍ରଣାଦାୟକ ସ୍ଥିତି ସୃଷ୍ଟି ହେଉଛି । ବିଭାଗକୁ ଦୈନିକ ୪୦୦ ଶିଶୁ ଆସୁଛନ୍ତି । ସେମାନଙ୍କ ଭିତରୁ ୩୦୦ ହେବ ଶିଶୁ ଭାଇରାଲ ଫିଭରରେ ପୀଡ଼ିତ । ଶିଶୁ ୱାର୍ଡରେ ୭୦ ବେଡ୍ରେ ପୂର୍ଣ୍ଣ । ଏହାବ୍ୟତୀତ ଏସ୍ଏନ୍ସିୟୁ ଓ ପେଡିଆଟ୍ରିକ୍ କେୟାର ୟୁନିଟ୍ରେ ମଧ୍ୟ ଚିକିତ୍ସିତ ଅଛନ୍ତି । ଦୈନିକ ୨୦ ପାଖାପାଖି ଶିଶୁ ୱାର୍ଡରେ ଭର୍ତ୍ତି ହେଉଛନ୍ତି ।
ହସ୍ପିଟାଲ୍ କର୍ତ୍ତୃପକ୍ଷ କହିଛନ୍ତି, ପାଣିପାଗରେ ପରିବର୍ତ୍ତନ ହେଉଛି । ତେଣୁ ପିଲାମାନେ ଭାଇରାଲ ଫିଭରରେ ପୀଡ଼ିତ ହେଉଛନ୍ତି । ହସ୍ପିଟାଲକୁ ଆସୁଥିବା ପିଲାଙ୍କ ଭିତରୁ ଅଧିକାଂଶ କେବଳ ଭାରଇାଲ ଫିଭରରେ ପୀଡ଼ିତ । ପିଲାମାନେ ଯନ୍ତ୍ରଣା ଯୋଗୁଁ ଅତି ଉଚ୍ଚ ସ୍ୱରରେ କାନ୍ଦୁଛନ୍ତି । ପିତାମାତା ପିଲାଙ୍କ ରାହା ଧରି କାନ୍ଦିବା ଓ କଷ୍ଟ ଦେଖି ଚିନ୍ତିତ ହେଉଛନ୍ତି । ହେଲେ ଚିନ୍ତା କରିବାର କିଛି ନାହିଁ । ସୁସ୍ଥ ହେବାକୁ ୪ରୁ ୭ ଦିନ ଲାଗିବ ।
