ନୂଆଦିଲ୍ଲୀ,୦୨/୦୪: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ ଆଇପିଏଲ୍ ସମୟରେ ସାମ୍ନା କରୁଥିବା ସମସ୍ୟାଗୁଡ଼ିକ ପାଇଁ ଅନେକ ନିୟମ ତିଆରି କରିଛି। ବିଶେଷ କରି ସ୍ଳୋ ଓଭର୍ ରେଟ୍ ଅନେକ ବର୍ଷ ଧରି ଆଇପିଏଲ୍ ଆଗରେ ଅନେକ ସମସ୍ୟା ଠିଆ କରିଛି। ନିର୍ଦ୍ଧାରିତ ସମୟରେ ଓଭର ପୂରା କରିପାରୁନଥିବା ଟିମ୍ ଏବଂ ଏହାର ଅଧିନାୟକଙ୍କ ଉପରେ କଡ଼ା ନିୟମ ଲାଗୁ କରାଯାଉଛି। ଆଇପିଏଲ୍ ୨୦୨୪ କଥା ଯଦି କହିବା ସ୍ଳୋ ଓଭର ରେଟ୍ କାରଣରୁ ବର୍ତ୍ତମାନ ସୁଦ୍ଧା ଦିଲ୍ଲୀ କାପିଟାଲ୍ସର ଅଧିନାୟକ ଋଷଭ ପନ୍ତ ଏବଂ ଗୁଜରାଟ ଟାଇଟନ୍ସର ଅଧିନାୟକ ଶୁବମନ ଗିଲ୍ଙ୍କ ଉପରେ ୧୨ ଲକ୍ଷ ଟଙ୍କା ଲେଖାଏଁ ଜୋରିମାନା ଲାଗିଛି।
ଆଇପିଏଲ୍ ନିୟମ ଅନୁଯାୟୀ, ଗୋଟିଏ ଦଳକୁ ୯୦ ମିନିଟର ନିର୍ଦ୍ଧାରିତ ସମୟ ମଧ୍ୟରେ ୨୦ ଓଭର ପୂରଣ କରିବାକୁ ପଡ଼ିବ, ଯେଉଁଥିରେ ପ୍ରତ୍ୟେକ ଅଢ଼େଇ ମିନିଟର ୨ ଟି ଷ୍ଟ୍ରାଟେଜିକ୍ ଟାଇମ୍ ଆଉଟ୍ ମଧ୍ୟ ଅନ୍ତର୍ଭୁକ୍ତ। ଅନେକ ଥର ମ୍ୟାଚ୍ ମଝିରେ ଡିଆର୍ଏସ୍, ପାନୀୟ କିମ୍ବା ଖେଳାଳିଙ୍କ ଆଘାତ ହେତୁ ବିତିଥିବା ସମୟ ଏହି ୯୦ ମିନିଟ୍ ଭିତରେ ରହିନଥାଏ।
ଯଦି ଗୋଟିଏ ଦଳ ସିଜିନ୍ ଭିତରେ ଦ୍ୱିତୀୟ ଥର ପାଇଁ ନିର୍ଦ୍ଧାରିତ ସମୟ ମଧ୍ୟରେ ୨୦ ଓଭର ପୂରଣ କରିବାରେ ଅସମର୍ଥ ହୁଏ, ତେବେ ଅଧିନାୟକଙ୍କୁ ୨୪ ଲକ୍ଷ ଟଙ୍କା ଜୋରିମାନା ଏବଂ ଦଳର ଅନ୍ୟ ଖେଳାଳିଙ୍କୁ ୬ ଲକ୍ଷ ଟଙ୍କା କିମ୍ବା ୨୫ ପ୍ରତିଶତ ଜୋରିମାନା ଦେବାକୁ ପଡ଼ିବ। ଯଦି ସିଜନରେ ତୃତୀୟ ଥର ପାଇଁ ଏହା ଘଟେ, ତେବେ ଅଧିନାୟକଙ୍କୁ ୩୦ ଲକ୍ଷ ଟଙ୍କା ଜରିମାନା କରାଯିବ ଏବଂ ଗୋଟିଏ ମ୍ୟାଚ୍ରୁ ବାଦ୍ ପଡ଼ିବାକୁ ହେବ। ଏଥିରେ ଦଳର ଅନ୍ୟ ଖେଳାଳୀଙ୍କୁ ୬ ଲକ୍ଷ ଟଙ୍କା କିମ୍ବା ସେମାନଙ୍କ ମ୍ୟାଚ୍ ଫି ର ୫୦ ପ୍ରତିଶତ ଜରିମାନା ଦେବାକୁ ପଡ଼ିବ।
ବର୍ତ୍ତମାନ ସୁଦ୍ଧା ଆଇପିଏଲ୍ ୨୦୨୪ ରେ କେବଳ ୧୪ ଟି ମ୍ୟାଚ୍ ଖେଳାଯାଇଛି। କିନ୍ତୁ ସ୍ଳୋ ଓଭର୍ ରେଟ୍ କାରଣରୁ ଋଷଭ ପନ୍ତ ଓ ଶୁବମନ ଗିଲ୍ଙ୍କୁ ମୋଟା ଅଙ୍କର କ୍ଷତି ସହିବାକୁ ପଡ଼ିଛି। ଯଦି ନିୟମ ଗୁଡିକ ଏହିପରି କ୍ରମାଗତ ଭାବେ ଜାରି ରହେ, ତେବେ ଅନ୍ୟ ଅନେକ ଅଧିନାୟକ ଏବଂ ଦଳଙ୍କୁ ମଧ୍ୟ ଏହି ସିଜିନ୍ରେ ସ୍ଳୋ ଓଭର ରେଟ୍ ନିୟମର ଶିକାର ହେବାକୁ ପଡ଼ିପାରେ।
