ଭୁବନେଶ୍ୱର,୦୭/୦୬: ବିଜେପିର ମୁଖ୍ୟମନ୍ତ୍ରୀ କିଏ ହେବ ତାହା ଏଯାଏ ସ୍ପଷ୍ଟ ହୋଇନି । ୨୪ ବର୍ଷ ପରେ ରାଜ୍ୟ ନୂଆ ମୁଖ୍ୟମନ୍ତ୍ରୀ ପାଇବାକୁ ଯାଉଥିଲାବେଳେ କାହା ମୁଣ୍ଡରେ ଦଳ ମୁକୁଟ ପିନ୍ଧାଇବ ତା’ ଉପରେ ସମସ୍ତଙ୍କ ଆଖି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କଠାରୁ ଆରମ୍ଭ କରି ବୈଜୟନ୍ତ ପଣ୍ଡା, କନକ ବର୍ଦ୍ଧନ ସିଂହଦେଓ, ଜୟନାରାୟଣ ମିଶ୍ର, ସୁରେଶ ପୂଜାରୀ ଓ ପ୍ରତାପ ଷଡ଼ଙ୍ଗୀଙ୍କ ନାଁକୁ ନେଇ ଚର୍ଚ୍ଚା ଜୋର ଧରିଛି । ମାତ୍ର ସବୁକିଛି ନିର୍ଭର କରୁଛି ବିଜେପି ସଂସଦୀୟ ବୋର୍ଡ ଉପରେ । ଏପଟେ କିନ୍ତୁ ବିଜେପି ମନ୍ତ୍ରିମଣ୍ଡଳରେ କିଏ ସ୍ଥାନ ପାଇବ ତା’କୁ ନେଇ ଆରମ୍ଭ ହୋଇଛି ଲବି ।
ଦିଲ୍ଲୀ ସୂତ୍ରରୁ ମିଳିଥିବା ସୂଚନା ଅନୁସାରେ, ଓଡ଼ିଶାରେ ସରକାର ଗଠନ ନେଇ ବିଜେପି ପ୍ରକ୍ରିୟା ଆରମ୍ଭ କରିଛି । ଶୁକ୍ରବାର କିମ୍ବା ଶନିବାର ବିଜେପି ସଂସଦୀୟ ବୋର୍ଡରେ ନୂଆ ମୁଖ୍ୟମନ୍ତ୍ରୀ ସମ୍ପର୍କରେ ଆଲୋଚନା ହେବ । ଏ ବୈଠକରେ ଓଡ଼ିଶା ବିଜେପି ବିଧାୟକ ଦଳ ବୈଠକର ତାରିଖ ଏବଂ ପର୍ଯ୍ୟବେକ୍ଷକଙ୍କ ନାମ ସ୍ଥିର କରାଯିବ । ଏହି ପର୍ଯ୍ୟବେକ୍ଷକଙ୍କ ସହ ଦଳର ଓଡ଼ିଶା ପ୍ରଭାରୀ ବିଜୟପାଲ୍ ସିଂହ ତୋମାର ଭୁବନେଶ୍ୱର ଆସିବାକୁ ସ୍ଥିର ହୋଇଛି । ଆପାତତଃ ୮ କିମ୍ବା ୯ରେ ବିଧାୟକ ଦଳ ବୈଠକ ବସି ବିଧାୟକ ଦଳ ନେତା ଚୟନ କରାଯିବ । ଅନ୍ୟପକ୍ଷରେ ଆଜି ରାଜ୍ୟର ନବନିର୍ବାଚିତ ବିଜେପି ଏମ୍ପିମାନେ ଦିଲ୍ଲୀରେ ପହଞ୍ଚିଛନ୍ତି ।
ବିଜେପି ସରକାର କରିବାକୁ ଯାଉଥିବାରୁ ମନ୍ତ୍ରୀପଦ ଉପରେ ବହୁ ହେଭିୱେଟ୍ଙ୍କ ଆଖି ରହିଛି । ପ୍ରାୟ ୩୦ରୁ ଅଧିକ ବିଧାୟକ ମନ୍ତ୍ରିମଣ୍ଡଳରେ ସ୍ଥାନ ପାଇବାକୁ ଉଦ୍ୟମ କରୁଛନ୍ତି । ଦଳ କେଉଁ ଆଧାରରେ ମନ୍ତ୍ରୀପଦ ବାଣ୍ଟିବ ତାହା ସ୍ପଷ୍ଟ ହୋଇନି । ସବୁ ଜିଲ୍ଲାକୁ ମନ୍ତ୍ରିମଣ୍ଡଳରେ ପ୍ରତିନିଧିତ୍ୱ ମିଳିପାରିବ ନାହିଁ । ମାତ୍ର ଆଦିବାସୀ, ଯୁବ ଓ ମହିଳା ବର୍ଗର ପ୍ରତିନିଧିତ୍ୱ ନିଶ୍ଚୟ ରହିବ । ଏହାକୁ ଦୃଷ୍ଟିରେ ରଖି କିଛି ବିଧାୟକ ନିଜ ଦିଲ୍ଲୀ ଲବିକୁ ତେଜିଛନ୍ତି ।
ଏମିତିରେ ଦେଖିଲେ ଦଳରେ ବହୁ ଅଭିଜ୍ଞ ବିଧାୟକ ଅଛନ୍ତି । ବିଜେଡିରୁ ବହୁ ଅଭିଜ୍ଞ ଓ ପୁରୁଖା ଲୋକ ମଧ୍ୟ ବିଜେପିକୁ ଆସି ଏଥର ବିଜୟୀ ହୋଇଛନ୍ତି । ମୁଖ୍ୟମନ୍ତ୍ରୀ ରେସରେ ଥିବା ଚେହେରାକୁ ଛାଡ଼ିଦେଲେ ମୋହନ ଚରଣ ମାଝୀ, ରବିନାରାୟଣ ନାୟକ, ସନାତନ ବିଜୁଳି, ପଦ୍ମଲୋଚନ ପଣ୍ଡା, ପୃଥ୍ୱୀରାଜ ହରିଚନ୍ଦନ, କୃଷ୍ଣଚନ୍ଦ୍ର ପାତ୍ର, ମୁକେଶ ମହାଲିଙ୍ଗ, ଭାସ୍କର ମଢ଼େଇ ପ୍ରମୁଖ ମନ୍ତ୍ରୀପଦ ପାଇଁ ଦାବିଦାର ଅଛନ୍ତି । ନବୀନଙ୍କୁ ହରାଇ ଜାଏଣ୍ଟ କିଲର ପାଲଟିଥିବା ଲକ୍ଷ୍ମଣ ବାଗ, ସୂର୍ଯ୍ୟବଂଶୀ ସୁରଜ, ବାବୁ ସିଂ ମଧ୍ୟ ଚର୍ଚ୍ଚାରେ ଅଛନ୍ତି ।
ବିଜେଡିରୁ ଆସି ବିଜେତା ହୋଇଥିବା ପ୍ରଶାନ୍ତ ଜଗଦ୍ଦେବ, ସିଦ୍ଧାନ୍ତ ମହାପାତ୍ର, ପୂର୍ଣ୍ଣଚନ୍ଦ୍ର ସେଠୀ ମଧ୍ୟ ଦୌଡ଼ରେ ଅଛନ୍ତି । ଦଳର ମହିଳା ବିଧାୟିକା ଭାବେ ଭେଟେରାନ ସୁରମା ପାଢ଼ୀ, ଉପାସନା ମହାପାତ୍ର, ପ୍ରଭାତି ପରିଡ଼ା, ସୀମାରାଣୀ ନାୟକ ଓ ଆଦିବାସୀ ମୁହଁ ସଞ୍ଜଳି ମୁର୍ମୁ ମଧ୍ୟ ମନ୍ତ୍ରୀ ଲଡ଼ୁ ଖାଇବାକୁ ଅପେକ୍ଷା କରିଛନ୍ତି । ଦଳ କିନ୍ତୁ କେଉଁମାନଙ୍କୁ ବାଛିବ ତାହାର କେହି ଟେର୍ ପାଉନାହାନ୍ତି । ଏହାକୁ ଛାଡ଼ି ଦଳ ଦୁଇ ଜଣ ଅଭିଜ୍ଞ ବିଧାୟକଙ୍କୁ ବାଚସ୍ପତି ଓ ମୁଖ୍ୟ ସଚେତକ ପଦ ପାଇଁ ବାଛିବ । ବିରୋଧୀଙ୍କ ସଂଖ୍ୟା ବେଶ ଓଜନିଆ ଥିବାରୁ ଦଳ ଏ ଦୁଇ ପଦ ପାଇଁ ସବୁ ଦିଗକୁ ବିଚାର କରି ଚେହେରା ଚୟନ କରିବ ।
ବିଜେପି ସଭାପତି ମନମୋହନ ସାମଲ ସୂଚନା ଦେଇଛନ୍ତି, ଖୁବଶୀଘ୍ର ମୁଖ୍ୟମନ୍ତ୍ରୀ ନାଁ ଘୋଷଣା କରାଯିବ । ଆଗାମୀ ୧୦ ତାରିଖରେ ନୂଆ ମୁଖ୍ୟମନ୍ତ୍ରୀ ଶପଥ ଗ୍ରହଣ କରିବେ । ଜଣେ ଓଡ଼ିଆ ହିଁ ମୁଖ୍ୟମନ୍ତ୍ରୀ ହେବେ