ନୂଆଦିଲ୍ଲୀ: କଂଗ୍ରେସ ନେତୃତ୍ବାଧୀନ କର୍ଣ୍ଣାଟକ ସରକାରଙ୍କୁ ନିର୍ବାଚନ ଆୟୋଗ ନୋଟିସ୍ ପଠାଇଛନ୍ତି । ତେଲେଙ୍ଗାନାରେ ସରକାରୀ ବିଜ୍ଞାପନ ଦେଇ ନିର୍ବାଚନ ଆଚରଣ ବିଧି ଉଲ୍ଲଂଘନ ଅଭିଯୋଗରେ ସୋମବାର ନିର୍ବାଚନ ଆୟୋଗ ସିଦ୍ଧରମେୟା ସରକାରଙ୍କୁ ଏହି ନୋଟିସ୍ ଜାରି ହୋଇଛି ।
ନିର୍ବାଚନ ଆୟୋଗଙ୍କ ଅନୁସାରେ, ଭାରତୀୟ ଜନତା ପାର୍ଟି (ବିଜେପି) ଏବଂ ତେଲେଙ୍ଗାନାର ଶାସକ ଦଳ ଭାରତୀୟ ରାଷ୍ଟ୍ର ସମିତି (ବିଆରଏସ)ର ଅଭଯୋଗ କ୍ରମେ କର୍ଣ୍ଣାଟକ ସରକାରଙ୍କୁ ନୋଟିସ ହୋଇଛି । କର୍ଣ୍ଣାଟକ ସରକାର ତେଲେଙ୍ଗାନାର ହାଇଦ୍ରାବାଦ ଖବରକାଗଜ ସଂସ୍କରଣରେ ବିଜ୍ଞାପନ ପ୍ରକାଶ କରିଛନ୍ତି ବୋଲି ଉଭୟ ଦଳ ଇସିଙ୍କ ନିକଟରେ ଅଭିଯୋଗ କରିଥିଲେ ।
ସେପଟେ ନିର୍ବାଚନ ହେବାକୁ ଥିବା ତେଲେଙ୍ଗାନାରେ କର୍ଣ୍ଣାଟକ ସରକାର ନିଜର ଲୋକଭିମୁଖୀ ଯୋଜନା ସଂପର୍କରେ ବିଜ୍ଞାପନ ଦେଇଛନ୍ତି । କଂଗ୍ରସ ନେତୃତ୍ବାଧୀନ କର୍ଣ୍ଣାଟକ ସରକାରଙ୍କ ଏଭଳି ପଦକ୍ଷେପ ନିର୍ବାଚନ ଆଚରଣ ବିଧି ଉଲ୍ଲଂଘନ ବୋଲି ନିର୍ବାଚନ ଆୟୋଗଙ୍କ ପକ୍ଷରୁ କୁହାଯାଇଛି । ତେବେ ନିୟମ ଉଲ୍ଲଂଘନ କାହିଁକି କଲେ ବୋଲି କର୍ଣ୍ଣାଟକ ସରକାର ମଙ୍ଗଳବାର କାରଣ ଦର୍ଶାଇବେ । ଏନେଇ ଇସି ପକ୍ଷରୁ ସିଦ୍ଧରମେୟା ସରକାରଙ୍କୁ ନୋଟିସ ଦିଆଯାଇଛି ।
ଅନ୍ୟପଟେ ତଦନ୍ତରୁ ଜଣାପଡ଼ିଛି ଯେ, ବିଜ୍ଞାପନ ଦେବାକୁ କର୍ଣ୍ଣାଟକ କଂଗ୍ରେସ ସରକାରଙ୍କୁ କୌଣସି ଅନୁମତି ଦିଆଯାଇନଥିଲା କିମ୍ବା ଏଭଳି କୌଣସି ଆେବଦନ ହୋଇନାହିଁ ବୋଲି ନିର୍ବାଚନ କମିଶନଙ୍କ ପକ୍ଷରୁ କୁହାଯାଇଛି । ସେପଟେ ତେଲେଙ୍ଗାନାରେ ଆଗକୁ କୌଣସି ଯୋଜନାର ପ୍ରଚାର ପ୍ରସାର ନକରିବାକୁ କର୍ଣ୍ଣାଟକ ସରକାରଙ୍କୁ ଇସି ନିର୍ଦ୍ଦେଶ ଦେଇଛନ୍ତି ।
