ବୀରମହାରଜପୁର, ୨୧/୧୧ : ବୀରମହାରାଜପୁର ଉପଖଣ୍ଡ ଉଲୁଣ୍ଡା ବ୍ଲକ ସ୍ଥିତ କୁମରକେଳି ଉଚ୍ଚ ପ୍ରାଥମିକ ବିଦ୍ୟାଳୟରେ ମଧ୍ୟାହ୍ନ ଭୋଜନରେ ଅନିୟମିତତା ଅଭିଯୋଗ। ସ୍କୁଲ ମୁଖ୍ୟ ଫାଟକରେ ତାଲା ପକାଇ ଧାରଣାରେ ବସିଲେ ଅବିଭାବକ ଓ ଛାତ୍ରଛାତ୍ରୀ l

ସୂଚନା ମୁତାବକ, କୁମରକେଳି ଉଚ୍ଚ ପ୍ରାଥମିକ ବିଦ୍ୟାଳୟରେ ମଧ୍ୟାହ୍ନ ଭୋଜନ ଅନିୟମିତତା ନେଇ ସ୍କୁଲ ପରିଚାଳନା କମିଟି ସ୍ଥାନୀୟ ବି. ଇ.ଓ , ଏ ବିଏଇଓ ଏବଂ ସିଆରସିସିଙ୍କୁ ଜଣାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିଲା। ବିଦ୍ୟାଳୟ ପ୍ରଧାନ ଶିକ୍ଷୟିତ୍ରୀଙ୍କ ମନମନି, ଆବଶ୍ୟକତାରୁ ବହୁ କମ୍ ପରିମାଣରେ ରାସନ ସାମଗ୍ରୀ ମଧ୍ୟାହ୍ନ ଭୋଜନ ପ୍ରସ୍ତୁତି ପାଇଁ ଦେବା, ପ୍ରଧାନ ଶିକ୍ଷୟିତ୍ରୀ କମ୍ ଛାତ୍ରକୁ ଅଧିକ ଦର୍ଶାଇବା ସହିତ ଆବଶ୍ୟକ ପରିମାଣ ଖାଦ୍ୟ ନଦେଇ ପିଲାଙ୍କ ପାଇଁ ଥିବା ମଧ୍ୟାହ୍ନ ଭୋଜନକୁ ଲୁଟ୍ କରୁଥିବା ଅଭିଯୋଗ ହୋଇଥିଲା। ହେଲେ ଶିକ୍ଷୟିତ୍ରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନଥିଲା। ଯାହାଫଳରେ ଆଜି ଅବିଭାବକ ଓ ଛାତ୍ରଛାତ୍ରୀ ସ୍କୁଲ ଗେଟ୍‌ରେ ତାଲା ପକାଇ ଧାରଣାରେ ବସିଛନ୍ତି।

ଏନେଇ କାର୍ଯ୍ୟରତ ପ୍ରଧାନ ଶିକ୍ଷୟତ୍ରୀ ଅମ୍ବିକା କୁଆଁରଙ୍କ ସହ ଯୋଗାଯୋଗ କରିଥିଲେ ମଧ୍ୟ ସେ କିଛି କହିବାକୁ ମନା କରିଥିଲେ l ଆନ୍ଦୋଳନ ସ୍ଥଳରେ ଉଲୁଣ୍ଡା ବ୍ଲକ ଅଧ୍ୟକ୍ଷା ଶାନ୍ତିଲତା ମିଶ୍ର ପହଞ୍ଚି ଥିବା ସୂଚନା ମିଳିଛି l ଖବର ଲେଖା ହେବା ପର୍ଯ୍ୟନ୍ତ କୌଣସି ଶିକ୍ଷା ଅଧିକାରୀ ପହଞ୍ଚି ନାହାଁନ୍ତି l