ଭୁବନେଶ୍ୱର,୧୦/୧୧: ମହାପ୍ରଭୁ ଶ୍ରୀ ଲିଙ୍ଗରାଜଙ୍କ ଛଡାଫୁଲ, ବେଲପତ୍ର, ତୁଳସୀ ଆଦି ପରିବହନ କରିବା ପାଇଁ ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁ ଏକ ସ୍ୱତନ୍ତ୍ର ଗାଡ଼ି ପ୍ରଦାନ କରାଯାଇଛି । ଗାଡିର ନାମ ରଖାଯାଇଛି ଅର୍ପଣ । ମେୟର ସୁଲୋଚନା ଦାସ ଏହି ସ୍ୱତନ୍ତ୍ର ଗାଡ଼ିକୁ ଲୋକାର୍ପଣ କରିଛନ୍ତି ।
ଲିଙ୍ଗରାଜଙ୍କ ମନ୍ଦିରରୁ ଦୈନିକ ବାହାରୁ ଥିବା ଛଡାଫୁଲ, ଲାଗି ହୋଇଥିବା ବେଲ ଓ ତୁଳସୀ ପତ୍ର, ନଡିଆ କତା, କଦଳୀ ଚୋପା, ଧୂପ ଓ ଦୀପ ଆଦି ବର୍ଜ୍ୟକୁ ସ୍ୱତନ୍ତ୍ର ଗାଡ଼ିରେ ପରିବହନ କରିବା ପାଇଁ ପୂଜକମାନଙ୍କ ପକ୍ଷରୁ ଦୀର୍ଘ ଦିନରୁ ଦାବି ହୋଇଆସୁଥିଲା । ପୂଜକମାନଙ୍କର ଏହି ଦାବିକୁ ପୂରଣ କରିଛି ବିଏମ୍ସି । ବିଏମ୍ସି ପକ୍ଷରୁ ପ୍ରଦାନ କରାଯାଇଥିବା ଏହି ଗାଡି କେବଳ ମନ୍ଦିରରୁ ବାହାରୁଥିବା ବର୍ଜ୍ୟ ପରିବହନ କରିବ । ବୁଧବାର ପୂର୍ବାହ୍ନରେ ମେୟରଙ୍କ ସହ ଟିମ୍ ବିଏମ୍ସି ଲିଙ୍ଗରାଜଙ୍କ ମନ୍ଦିର ଭିତର ଓ ବାହାର ବୁଲି ଦେଖିବା ସହ ପରିମଳ ପରିଚାଳନା ସଂପର୍କରେ ସମୀକ୍ଷା କରିଥିଲେ ।
ସଂପ୍ରତି ଧର୍ମ ମାସ କାର୍ତ୍ତିକ ଚାଲିଥିବାରୁ, ଦୈନିକ ଏଠାକୁ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହେଉଛି । ଭୁବନେଶ୍ୱର ସମେତ ରାଜ୍ୟ ଓ ରାଜ୍ୟ ବାହାରୁ ଆସୁଥିବା ବହୁ ଶ୍ରଦ୍ଧାଳୁ ପୂଜା ସାମଗ୍ରୀ ଆଣୁଥିବା ପତ୍ର, ଠୁଙ୍ଗା ଆଦି ବାହାରେ ଫିଙ୍ଗିଦେଉଥିବା ବେଳେ ଠାକୁରଙ୍କ ନିକଟରେ ଲାଗି କରାଯାଉଥିବା ଭୋଗ, ଫୁଲ, ବେଲ ଓ ତୁଳସୀ ପତ୍ର ସହ କଦଳୀ ଚୋପା, ଛଡା ଫୁଲ, ଆଦି ବହୁ ପରିମାଣର ବାହାରୁଛି । ମନ୍ଦିର ଭିତରୁ ବାହାରୁ ଥିବା ବର୍ଜ୍ୟକୁ ଅନ୍ୟ ବର୍ଜ୍ୟ ପରିବହନ ଗାଡିରେ ନ ଦେବାକୁ ପୂଜକମାନେ ବହୁ ଦିନରୁ ଦାବି କରିଆସୁଥିଲେ । ଲିଙ୍ଗରାଜଙ୍କ ପାଇଁ ସ୍ୱତନ୍ତ୍ର ଗାଡି ବ୍ୟବସ୍ଥା କରାଯିବ ବୋଲି ପୂର୍ବରୁ ବିଏମ୍ସି ପକ୍ଷରୁ ପ୍ରତିଶ୍ରୁତି ଦିଆଯାଇଥିଲା । ସେହି ପ୍ରତିଶୃତି ବିଏମ୍ସି ପାଳନ କରିଥିବାରୁ ପୂଜକଙ୍କ ମଧ୍ୟରେ ଖୁସି ପ୍ରକାଶ ପାଇଛି ।
