ନୂଆଦିଲ୍ଲୀ, ୦୪/୧୧: ମହାଦେବ ଅନ୍ଲାଇନ ବେଟିଂ ଆପ୍ ସିଣ୍ଡିକେଟର ତଦନ୍ତ କରୁଥିବା ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ବଡ଼ ଦାବି କରିଛି। ଆପ୍ ପ୍ରମୋଟର ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବଘେଲଙ୍କୁ ୫୦୮ କୋଟି ଟଙ୍କା ଦେଇଥିବା ଇଡି କହିଛି । ଗୁରୁବାର ଇଡି ଏକ ସର୍ଚ୍ଚ ଅପରେଶନରେ କ୍ୟାଶ୍ କୋରିୟର ଅସୀମ ଦାସଙ୍କୁ ଗିରଫ କରିବା ସହ ୫.୩୯ କୋଟି ନଗଦ ଟଙ୍କା ଜବତ କରିବା ପରେ ଏହି ଦାବି କରିଛି ।
ଗତ ୨ ତାରିଖରେ ଇଡିକୁ ସୂଚନା ମିଳିଥିଲା ଯେ, ନଭେମ୍ବର ୭ ଏବଂ ୧୭ରେ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ମହାଦେବ ଆପ୍ ପ୍ରମୋଟରଙ୍କ ଦ୍ୱାରା ବିପୁଳ ନଗଦ ଟଙ୍କା ଅଣାଯାଉଛି । ଇଡି ହୋଟେଲ ଟାଇଟନ ଏବଂ ଅନ୍ୟ ଏକ ଜାଗାରେ ଚଢ଼ାଉ କରିଥିଲା । ଶାସକ କଂଗ୍ରେସ ପାର୍ଟିକୁ ନିର୍ବାଚନୀ ଖର୍ଚ୍ଚ ପାଇଁ ବିପୁଳ ନଗଦ ରାଶି ପହଞ୍ଚାଇବା ଲାଗି ବିଶେଷ କରି ୟୁଏଇରୁ ପଠାଯାଇଥିବା କ୍ୟାଶ କୋରିୟର ଅସୀମ ଦାସଙ୍କୁ ଗିରଫ କରାଯାଇଥିଲା । ଜବତ ଟଙ୍କା ନିର୍ବାଚନୀ ଖର୍ଚ୍ଚ ପାଇଁ ବଘେଲଙ୍କୁ ମହାଦେବ ପ୍ରମୋଟରଙ୍କ ଦ୍ୱାରା ଦିଆଯିବାକୁ ଥିବା ବୋଲି ଅସୀମ ସ୍ୱୀକାର କରିଥିବା ଇଡି କହିଛି । ଏହି ମାମଲାରେ ଅସୀମ ଏବଂ କନଷ୍ଟେବଳ ଭୀମ ସିଂ ଯାଦବଙ୍କୁ ଏକ ସ୍ୱତନ୍ତ୍ର ପିଏମ୍ଏଲ୍ଏ ଅଦାଲତ ୭ ଦିନିଆ ଇଡି ରିମାଣ୍ଡକୁ ପଠାଇଛନ୍ତି । ଅସୀମଙ୍କ ଫୋନ୍ରୁ ଇଡି ଏକ ଅଡିଓ ହାସଲ କରିଛି । ଏଥିରେ ଜଣେ ଶୁଭମ ସୋନି ଏବଂ ଅସୀମଙ୍କ ମଧ୍ୟରେ କଥାବାର୍ତ୍ତା ହୋଇଛି । ଶୁଭମଙ୍କୁ ଅସୀମ ଶୀଘ୍ର ଛତିଶଗଡ଼ ଆସି ବଘେଲଙ୍କ ନିକଟରେ ନିର୍ବାଚନ ଟଙ୍କା ପହଞ୍ଚାଇଦେବାକୁ କହୁଥିବା ଏଥିରେ ଶୁଣିବାକୁ ମିଳିଛି ।
ଏ ନେଇ ବଘେଲ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ମିଶି ଛତିଶଗଡ଼ରେ କଂଗ୍ରେସର ସାମ୍ନା କରିପାରୁନାହାନ୍ତି । ସେଥିପାଇଁ ସେମାନେ ତଦନ୍ତକାରୀ ଏଜେନ୍ସିକୁ ଲଗାଇଦେଇଛନ୍ତି । ଆମକୁ ଡରାଇବାକୁ ଉଦ୍ୟମ ହେଉଛି । କିନ୍ତୁ କଂଗ୍ରେସର ପ୍ରତ୍ୟେକ କର୍ମୀ ଏହାର ମୁକାବିଲା କରିବାକୁ ପ୍ରସ୍ତୁତ । ଆମେ ଲଢ଼ିବୁ ଏବଂ ଜିତିବୁ ।
ଛତିଶଗଡ଼ ଉପମୁଖ୍ୟମନ୍ତ୍ରୀ ଟି.ଏସ୍ ସିଂଦେଓ କହିଛନ୍ତି, ବିଜେପି ନିର୍ବାଚନ ପୂର୍ବରୁ ଏପରି କିଛି କରିବ ବୋଲି ଆଗରୁ ଜଣାଥିଲା । କାରଣ ମୋଦି ସରକାର ଇଡିକୁ ନିଜ ରାଜନୈତିକ ସ୍ୱାର୍ଥ ହାସଲ ପାଇଁ ବ୍ୟବହାର କରୁଛନ୍ତି । ତେଣୁ ଏବେ କାହା ବିରୋଧରେ ବି ମାମଲା ରୁଜୁ କରାଯାଇପାରିବ । ଏହା କେବଳ ଅଭିଯୋଗ । ଯଦି ବଘେଲ ଏହି ଟଙ୍କା ଆଣିଛନ୍ତି ତେବେ ବିଜେପି ଲୋକଙ୍କୁ କହୁ ଯେ, ସେହି ୫୦୦ କୋଟି ଟଙ୍କା ନଗଦ କୁଆଡ଼େ ଗଲା ।
