ଭୁବନେଶ୍ୱର,୨୧/୧୧: ହାଇକୋର୍ଟଙ୍କ ହସ୍ତକ୍ଷେପ ପରେ ୨୦୨୨ ମେ’ ମାସଠାରୁ ଘର କିଣାବିକା ସମ୍ପର୍କିତ ପଞ୍ଜୀକରଣରେ ରୋକ ଲାଗିଛି । ଆସୋସିଏସନ ଅଫ୍ ଆଲଟି ନେଇ ରାଜ୍ୟରେ ଚୂଡାନ୍ତ ଆଇନ ଲାଗୁ ହେବାରେ ବିଳମ୍ବ ହେଉଛି । ଫଳରେ ଗ୍ରାହକ ଫ୍ଲାଟର ପୋଜେସନ ବା ମାଲିକାନା ପାଇପାରୁନାହାନ୍ତି । ଗତ ୧୮ ମାସ ହେବ ରାଜ୍ୟରେ ଏଭଳି ପ୍ରାୟ ୫ ହଜାର ୟୁନିଟ ଘରର ପଞ୍ଜୀକରଣ ଅଟକିଛି । ଫଳରେ ଘର ପାଇବାକୁ ହଜାର ହଜାର ଗ୍ରାହକ ଅପେକ୍ଷା କରି ରହିଛନ୍ତି । ଫଳରେ ରାଜ୍ୟ ରାଜକୋଷକୁ ୧୦୦୦ରୁ ୧୨୦୦ କୋଟିର ରାଜସ୍ୱ ଆସିପାରିନି ବୋଲି ରିୟଲ ଇଷ୍ଟେଟ ଶିଳ୍ପ ପକ୍ଷରୁ ସୂଚନା ମିଳିଛି ।
ସମସ୍ୟା ସମାଧାନ ଲାଗି ରାଜ୍ୟ ସରକାର ଇତିମଧ୍ୟରେ ନୂତନ ନିୟମ ଆଣିବା ପ୍ରକ୍ରିୟା ଗ୍ରହଣ କରିଛନ୍ତି । ଓଡ଼ିଶା ଦେଶର ପ୍ରଥମ ରାଜ୍ୟ ଭାବେ ଆପାର୍ଟମେଣ୍ଟ ମାଲିକାନା ଓ ପରିଚାଳନା ଆଇନ ୨୦୨୩ କାର୍ଯ୍ୟକାରୀ କରାଇବାକୁ ଯାଉଛି । ରେରା ଆଇନ ଅନୁପାଳନ ପୂର୍ବକ ଆସୋସିଏସନ ଅଫ୍ ଆଲଟି ବ୍ୟବସ୍ଥାକୁ ଏଥିରେ ଗୁରୁତ୍ୱ ଦିଆଯାଇଛି । ରାଜ୍ୟ ବାସଗୃହ ଓ ସହରୀ ବିକାଶ ବିଭାଗ ପକ୍ଷରୁ ଅକ୍ଟୋବରରେ ଏ ନେଇ ଡ୍ରାଫ୍ଟ ନିୟମ ଜାରି କରାଯାଇଥିଲା । ନଭେମ୍ବର ୧୨ ଯାଏ ଅଂଶୀଦାରଙ୍କ ମତାମତ ଲୋଡ଼ାଯାଇଥିଲା । ଏହାର ଅବଧି ରବିବାର ଶେଷ ହୋଇଛି । ଚୂଡାନ୍ତ ଆଇନ ଉପରେ ଏବେ ସମସ୍ତଙ୍କ ନଜର । ନୂଆ ଆଇନ ଆସିଲା ପରେ ଆପାର୍ଟମେଣ୍ଟ ପଞ୍ଜୀକରଣ ପ୍ରକ୍ରିୟା ପୁଣିଥରେ ଆରମ୍ଭ ହେବ । ଫଳରେ ଲୋକେ ଘର ପାଇବା ସହଜ ହେବ ।
ନୂଆ ଆଇନରେ ସରକାର ଏ ନେଇ ନିୟାମକ କର୍ତ୍ତୃପକ୍ଷଙ୍କୁ ନିଯୁକ୍ତ କରିବେ । ସମ୍ପୂର୍ଣ୍ଣ ପ୍ରକ୍ରିୟା ସାରି ଆଇନ କାର୍ଯ୍ୟକାରୀ କରାଇବାକୁ ୩ରୁ ୪ ମାସ ସମୟ ଲାଗିପାରେ । ତେବେ ନୂଆ ଆଇନ ତ୍ୱରିତ କାର୍ଯ୍ୟକାରୀ ହେଉ ବୋଲି ଶିଳ୍ପ ବିଶେଷଜ୍ଞ କହିଛନ୍ତି । ଏହା ସହ ଆଇନର ବିଭିନ୍ନ ଦିଗକୁ ନେଇ ବିଶେଷଜ୍ଞମାନେ ଆଶଙ୍କା କରିଛନ୍ତି ।
ଆଗକୁ ସେଲ୍ଡିଡ ବେଳେ ରେରା ପଞ୍ଜୀକରଣ, ଅକ୍ୟୁପାନ୍ସି ପ୍ରମାଣପତ୍ର, ଆସୋସିଏସନ ଅଫ୍ ଆଲଟିର ପଞ୍ଜୀକରଣ ପ୍ରମାଣପତ୍ର, ନୂଆ ଆଇନ ଅନୁସାରେ ପ୍ରକଳ୍ପର ଘୋଷଣାପତ୍ର ଦେବା ବାଧ୍ୟତାମୂଳକ । ଏ କ୍ଷେତ୍ରରେ ଡେଭଲପରଙ୍କ ତ୍ରୁଟି ରହିଲେ ପଞ୍ଜୀକରଣ ହୋଇପାରିବନି । ଫଳରେ ଗ୍ରାହକ ଘର ପାଇବାରେ ସମସ୍ୟା ରହିବ । ଏହି ଦିଗକୁ ଗୁରୁତ୍ୱ ଦେବାକୁ କହିଛନ୍ତି ବିଶେଷଜ୍ଞ ।
ନୂଆ ନିୟମ ଅନୁସାରେ ରିୟଲ ଇଷ୍ଟେଟ ଓ ଆପାର୍ଟମେଣ୍ଟ ପ୍ରକଳ୍ପରେ ଆସୋସିଏସନ ଅଫ୍ ଆଲଟି ଗଠନ କରିବା ବାଧ୍ୟତାମୂଳକ । ଏହି ଆସୋସିଏସନ ଆପାର୍ଟମେଣ୍ଟ ପ୍ରକଳ୍ପ ଓ ସମ୍ପତ୍ତିର କମନ ଏରିଆ ଓ ସୁବିଧା ଦିଗରେ ଦେଖାଶୁଣା କରିବ । କୌଣସି ପ୍ରକଳ୍ପରେ ୭ଟି ଆପାର୍ଟମେଣ୍ଟ ବୁକିଂ କିମ୍ବା ୫୦% ଆପାର୍ଟମେଣ୍ଟ ହେବା ପରେ ଆସୋସିଏସନ ଗଠନ ହୋଇପାରିବ । ପ୍ରକଳ୍ପର ସମ୍ପୂର୍ଣ୍ଣ ଜମିକୁ କମନଏରିଆ ଭାବେ ବିଚାର କରାଯିବ । ଏହା ଆସୋସିଏସନ ନାମରେ ପଞ୍ଜୀକରଣ ହେବ । ଆସୋସିଏସନ ଅଫ୍ ଆଲଟିର ପଞ୍ଜୀକରଣ ନ ହେଲେ ଗ୍ରାହକଙ୍କୁ ଘର ଦେବା ପ୍ରକ୍ରିୟାରେ ରୋକ ଲାଗିବ ।
ଏହି ପରିପ୍ରେକ୍ଷୀରେ ରେରା କର୍ମୀ ବିମଳେନ୍ଦୁ ପ୍ରଧାନ କହିଛନ୍ତି, ନୂଆ ନିୟମ ଶୀଘ୍ର କାର୍ଯ୍ୟକାରୀ ହେଲେ ପଞ୍ଜୀକରଣ ଆରମ୍ଭ ହୋଇଯିବ । ଆଗକୁ ଆବଶ୍ୟକୀୟ ଦସ୍ତାବିଜ ଦେବା ବାଧ୍ୟତାମୂଳକ ରହିବ । ଏହି ନିୟମ ଦ୍ୱାରା କ୍ରେତା ସହ ଶିଳ୍ପ ମଧ୍ୟ ଲାଭବାନ ହେବ । ରିୟଲ ଇଷ୍ଟେଟ କମ୍ପାନି କ୍ୟାପଡିଲର ସହପ୍ରତିଷ୍ଠାତା ତଥା ସିଇଓ ଶକ୍ତି ମିଶ୍ର କହିଛନ୍ତି, ନୂଆ ନିୟମର କାର୍ଯ୍ୟକାରିତାକୁ ଅପେକ୍ଷା । ଏହା ଆସିଲେ ଘର ପୋଜେସନ ପାଇବା ନେଇ ପ୍ରକ୍ରିୟା ତ୍ୱରାନ୍ୱିତ ହେବ । ଏହା ରିୟଲ ଇଷ୍ଟେଟ କ୍ଷେତ୍ରର ଅଭିବୃଦ୍ଧିରେ ସହାୟକ ହେବ ବୋଲି ଆଶାବାଦୀ । କ୍ରେଡାଇ ଓଡ଼ିଶା ଫାଉଣ୍ଡେସନର ସାଧାରଣ ସମ୍ପାଦକ ଇଞ୍ଜିନିୟର ଉମେଶ ପଟ୍ଟନାୟକ କହିଛନ୍ତି, ନୂଆ ନିୟମ ଶୀଘ୍ର କାର୍ଯ୍ୟକାରୀ ହେବା ଆବଶ୍ୟକ । ଏ ନେଇ ନିୟାମକ କର୍ତ୍ତୃପକ୍ଷ ନିଯୁକ୍ତି ସହ ମଡେଲ ସେଲ ଡିଡ୍ ଫର୍ମାଟ ଆଣିବା ମଧ୍ୟ ଜରୁରୀ ।
