ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ପୁଣି ସମନ କରିଛି ପ୍ରବର୍ତ୍ତନ ନର୍ଦ୍ଦେଶାଳୟ (ଇଡି) । ଅବକାରୀ ଦୁର୍ନୀତି ମାମଲାର କେଜ୍ରିଓ୍ବାଲଙ୍କୁ ଇଡି ଅଷ୍ଟମ ଥର ଲାଗି ସମନ୍ କରିଛି । ମାର୍ଚ୍ଚ ୪ରେ କେଜ୍ରିଓ୍ବାଲଙ୍କୁ ହାଜର ହେବାକୁ ତଦନ୍ତ ଏଜେନ୍ସି ପକ୍ଷରୁ କୁହାଯାଇଛି । ଏହା ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ସପ୍ତମ ସମନ ପଠାଇଥିଲା ଇଡି। ହେଲେ ଏହାକୁ ଅବୈଧ ବୋଲି କହିବା ସହ ହଜାର ହୋଇନଥିଲେ କେଜ୍ରିଓ୍ବାଲ । ଏହାରି ମଧ୍ୟରେ ଆଜି ପୁଣି ଥରେ ତାଙ୍କୁ ଇଡି ସମନ କରିଛି ।
ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ସିବିଆଇ ତଦନ୍ତ କରୁଛି । ଏହି ମାମଲା ସହ ଜଡ଼ିତ ମନି ଲଣ୍ଡରିଂ ବାବଦରେ ତଦନ୍ତ କରୁଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଏହି ମାମଲାରେ ଇଡି ଆପ୍ର ଦୁଇ ଜଣ ବଡ଼ ନେତା ମନୀଷ ସିସୋଦିଆ ଏବଂ ସଂଜୟ ସିଂହଙ୍କୁ ଗିରଫ କରିସାରିଛି । ଏହା ପୂର୍ବରୁ ଇଡି ଫେବୃଆରୀ ୨୨ରେ ଅରବିନ୍ଦ କେଜ୍ରିଓ୍ବାଲଙ୍କୁ ସପ୍ତମ ଥର ଲାଗି ସମନ ପଠାଇଥିଲା । ଏହା ସହ ଫେବୃଆରୀ ୨୬ରେ ହାଜର ହେବାକୁ କହିଥିଲା ତଦନ୍ତ ଏଜେନ୍ସି । ହେଲେ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିଓ୍ବାଲ ଇଡି କାର୍ଯ୍ୟାଳୟରେ ହାଜର ହୋଇନଥିଲେ ।
ସେପଟେ ଆମ୍ ଆଦମୀ ପାର୍ଟି ପକ୍ଷରୁ କୁହାଯାଇଛି ଯେ, ମାମଲାରେ କୋର୍ଟରେ ଚାଲିଛି ଏବଂ ଏହାର ଶୁଣାଣି ମାର୍ଚ୍ଚ ୧୬ରେ ହେବ । ତେଣୁ ପ୍ରତିଦିନ ସମନ ପଠାଇବା ପରିବର୍ତ୍ତେ ଇଡି କୋର୍ଟଙ୍କ ନିଷ୍ପତ୍ତି ଆସିବା ଯାଏଁ ଅପେକ୍ଷା କରିବା ଦରକାର ବୋଲି ସେ କହିଛନ୍ତି ।
