କ୍ୱାଲାଲୁମ୍ପୁର,୧୦/୧୨: ଚଳିତ ଏଫ୍‌ଆଇଏଚ୍‌ ଜୁନିୟର ହକି  ବିଶ୍ୱକପ୍‌ରେ କାନାଡ଼ାକୁ ୧୦-୧  ଗୋଲ୍‌ରେ ହରାଇ ଭାରତ କ୍ୱାର୍ଟରଫାଇନାଲ୍‌ରେ ପ୍ରବେଶ କରିଛି । ଏହି  ବିଜୟ ସହ ଦଳ ପୁଲ୍‌-ସି’ର ଦ୍ୱିତୀୟ  ସ୍ଥାନରେ ରହି ନକ୍‌ ଆଉଟ୍‌ରେ ସ୍ଥାନ ପକ୍କା କରିଥିଲା । ଭାରତ ୩ଟି ମ୍ୟାଚ୍‌ରୁ  ୨ ବିଜୟ, ୧ ପରାଜୟ ସହ ୬ପଏଣ୍ଟ  ପାଇଛି । ଏହି ପୁଲ୍‌ରେ ସ୍ପେନ ହ୍ୟାଟ୍ରିକ୍‌  ବିଜୟ ସହ ୯ପଏଣ୍ଟ ପାଇ କ୍ୱାର୍ଟରରେ  ପ୍ରବେଶ କରିଥିଲା । 

ଭାରତୀୟ ଦଳ କ୍ୱାର୍ଟର  ଫାଇନାଲ୍‌ରେ ପ୍ରବେଶ କରିବା ପାଇଁ  କାନାଡ଼ାକୁ ବଡ଼ ବ୍ୟବଧାନରେ ହରାଇବା  ଜରୁରି ଥିଲା । ଦଳ ୪ଟି ଯାକ କ୍ୱାର୍ଟରରେ  ଆଧିପତ୍ୟ ବିସ୍ତାର କରି ଖେଳି ୧୦ଟି  ଗୋଲ୍‌ କରିଥିବାବେଳେ କାନାଡ଼ା  ମାତ୍ର ଗୋଟିଏ ଗୋଲ୍‌ ପରିଶୋଧ  କରିପାରିଥିଲା । ଭାରତ ପକ୍ଷରୁ ଆଦିତ୍ୟ  ଅର୍ଜୁନ ୨ଟି (ଅଷ୍ଟମ, ୪୩ମିନିଟ୍‌),  ରୋହିତ ୨ଟି (୧୨, ୫୫ମିନିଟ୍‌),  ଓଡ଼ିଆ ଖେଳାଳି ଅମନଦୀପ ଲାକ୍ରା  ୨ଟି (୨୩, ୫୨ମିନିଟ୍‌), ବିଷ୍ଣୁକାନ୍ତ  (୪୨ମିନିଟ୍‌), ରାଜିନ୍ଦର (୪୨ମିନିଟ୍‌),  ସୌରଭ ଆନନ୍ଦ (୫୧ମିନିଟ୍‌) ଓ ଉତ୍ତମ  ସିଂହ (୫୮ମିନିଟ୍‌) ଗୋଲ୍‌ କରିଥିଲେ ।