କଟକ,୦୨/୧୨: ଗତ ଚାରିବର୍ଷ ହେଲାଣି ବାରବାଟୀ ଷ୍ଟାଡିୟମ୍ରେ କୌଣସି ଅନ୍ତର୍ଜାତୀୟ ଦିନିକିଆ ମ୍ୟାଚ ଖେଳାଯାଇ ନାହିଁ । ବର୍ଷେ ତଳେ ଭାରତ- ଦକ୍ଷିଣ ଆଫ୍ରିକା ମଧ୍ୟରେ କେବଳ ଗୋଟିଏ ଟି-ଟ୍ୱେଣ୍ଟି ଖେଳାଯାଇଥିଲା । ଯେଉଁଠି ଭାରତର ଅନ୍ୟ ରାଜ୍ୟରେ ଲଗାତାର ମ୍ୟାଚ୍ ଆୟୋଜିତ ହେଉଛି, ସେଠାରେ ବର୍ଷକରେ ଓଡ଼ିଶାକୁ ଗୋଟିଏ ବି ମ୍ୟାଚ୍ ମିଳୁ ନାହିଁ । ବିସିସିଆଇର ଏଭଳି ପାତର ଅନ୍ତର ନୀତିକୁ ନେଇ ଓଡ଼ିଶା କ୍ରିକେଟ୍ପ୍ରେମୀ ଘୋର ଅସନ୍ତୋଷ ପ୍ରକାଶ କରିଛନ୍ତି । ନିକଟରେ ଶେଷ ହୋଇଥିବା ଦିନିକିଆ ବିଶ୍ୱକପ୍ରେ ବାରବାଟୀର ଭାଗ କଟିବା ପରେ ଭାରତର ଆଗାମୀ ୩ଟି ଘରୋଇ ସିରିଜ୍ରେ ଓଡ଼ିଶାକୁ ଅଣଦେଖା କରାଯାଇଛି ।
ଗୁରୁତ୍ୱପୂର୍ଣ୍ଣ କଥା ହେଉଛି, ଭାରତ-ଅଷ୍ଟ୍ରେଲିଆ ଚତୁର୍ଥ ଟି-ଟ୍ୱେଣ୍ଟି ଶୁକ୍ରବାର ରାୟପୁରର ସହିଦ ବୀରନାରାୟଣ ସିଂ ଷ୍ଟାଡିୟମ୍ରେ ଖେଳାଯାଇଥିଲା । ଷ୍ଟାଡିୟମର ବିଦ୍ୟୁତ୍ ଦେୟ ଦେଇନଥିବାରୁ ମ୍ୟାଚ୍ ଆୟୋଜନ ନେଇ ଆଶଙ୍କା ପ୍ରକାଶ ପାଇଥିଲା । ୩ କୋଟିରୁ ଅଧିକ ଟଙ୍କା ବାକି ଥିବାରୁ ଷ୍ଟାଡିୟମ୍ରେ ଗତ ୫ବର୍ଷ ଧରି ବିଦ୍ୟୁତ୍ ସଂଯୋଗ ନଥିଲା । ତାହା ପରେ ବି ବିସିସିଆଇ ରାୟପୁରକୁ ମ୍ୟାଚ୍ ଦେବାକୁ କୌଣସି କୁଣ୍ଠାବୋଧ କଲାନି । କିନ୍ତୁ ବାରବାଟୀ ଷ୍ଟାଡିୟମ୍ରେ ସବୁ ସୁବିଧା ଥାଇ ମଧ୍ୟ ମ୍ୟାଚ୍ ନମିଳିବା କ୍ରିକେଟ ପ୍ରେମୀଙ୍କୁ ଆଶ୍ଚର୍ଯ୍ୟ କରିଛି।
କଟକରେ ଶେଷଥର ପାଇଁ ୨୦୧୯ ଡିସେମ୍ବର ୨୨ରେ ଭାରତ ଓ ୱେଷ୍ଟଇଣ୍ଡିଜ୍ ମଧ୍ୟରେ ଦିନିକିଆ ମ୍ୟାଚ୍ ଖେଳାଯାଇଥିଲା । ପରେ କରୋନା ଯୋଗୁଁ ଦୁଇବର୍ଷ କ୍ରିକେଟ ପ୍ରଭାବିତ ହୋଇଥିଲା । ୨୦୨୨ରେ ଭାରତ-ଦକ୍ଷିଣ ଆଫ୍ରିକା ଟି-ଟ୍ୱେଣ୍ଟି ବାରବାଟୀରେ ଆୟୋଜିତ ହୋଇଥିଲା । ଏହାପରେ ଭାରତୀୟ ଦଳ ଅନେକ ଘରୋଇ ସିରିଜ ଖେଳିଥିଲେ ମଧ୍ୟ ବାରବାଟୀକୁ ବିସିସିଆଇ ଦୃଷ୍ଟି ଦେଇନି । ଦୁର୍ଭାଗ୍ୟକୁ ଗତ ଦିନିକିଆ ବିଶ୍ୱକପ୍ର କୌଣସି ଗୋଟିଏ ମ୍ୟାଚ୍ ମିଳିବା ତ’ ଦୂରର କଥା ଅଭ୍ୟାସ ମ୍ୟାଚ ଗୋଟିଏ ବି ମିଳିଲା ନାହିଁ ।
ବାରବାଟୀରେ ଅନ୍ତର୍ଜାତୀୟ କ୍ରିକେଟ ଇତିହାସ ଦେଖିଲେ ପୂର୍ବାଞ୍ଚଳର ଇଡେନ୍ ଗାର୍ଡେନସ ପରେ ଦ୍ୱିତୀୟ ସର୍ବବୃହତ ଦର୍ଶକ ଧାରଣ କ୍ଷମତା ରଖିଥିବା ଷ୍ଟାଡିୟମ୍ । ତେଣୁ ବିଶ୍ୱକପ୍ରେ ମ୍ୟାଚ୍ ପାଇବାକୁ ଦାବିଦାର ଥିଲା । କିନ୍ତୁ ଓସିଏ ମ୍ୟାଚ୍ ଆଣିବାକୁ ଫେଲ୍ ମାରିଲା । ଅନ୍ତର୍ଜାତୀୟ ମ୍ୟାଚ ଆୟୋଜନ କରିବାକୁ ଓସିଏ ସବୁବେଳେ ପ୍ରାୟ ପ୍ରସ୍ତୁତ ରହୁଛି । ନାଲି ମାଟି ପିଚ୍ ସହିତ ଗ୍ୟାଲେରୀ ଗୁଡିକର ସୁରକ୍ଷା ପାଇଁ ମଧ୍ୟ ନିୟମିତ ବ୍ୟବଧାନରେ ଯାଞ୍ଚ୍ କରାଯାଉଛି । କିନ୍ତୁ ଏହା ସତ୍ତେ୍ୱ ବାରବାଟୀକୁ ମ୍ୟାଚ୍ ନମିଳିବା ଚିନ୍ତାର ବିଷୟ ।
ଯାହା ଆଶା କରାଯାଉଛି, ବିସିସିଆଇ ସ୍ତରରେ ଓସିଏ ମ୍ୟାଚ୍ ପାଇଁ ସ୍ୱର ଉଠାଇବାରେ ଅବହେଳା କରୁଛି । ଟେଷ୍ଟ୍ ମ୍ୟାଚ୍ ଆୟୋଜନ ଆଶା ବାନ୍ଧି ବର୍ଷ ବର୍ଷ ଧରି ଓସିଏର ସ୍ୱପ୍ନ କେବେ ପୂରଣ ହେବ ତାହା ମଧ୍ୟ ଏବେ ଦ୍ୱନ୍ଦ୍ୱରେ । ବିଶ୍ୱକପ୍ ଆୟୋଜନ କରିନଥିବା ଷ୍ଟାଡିୟମ୍ ଗୁଡିକୁ ଆସନ୍ତା ଦିନରେ ଇଂଲଣ୍ଡ ଟେଷ୍ଟ ସିରିଜ୍ରେ ମ୍ୟାଚ୍ ଦିଆଯାଇଛି । ରାଜକୋଟ, ରାଞ୍ଚି ଭଳି ଷ୍ଟାଡିୟମ୍ ଏଥିରେ ଅନ୍ତର୍ଭୁକ୍ତ ରହିଥିବା ବେଳେ ଓଡ଼ିଶା ସ୍ଥାନ ପାଇନାହିଁ । ଯଦିଓ ଜାନୁୟାରୀରେ ହେବାକୁ ଥିବା ଆଫଗାନିସ୍ତାନ ସିରିଜ୍ରେ ଓଡ଼ିଶାକୁ ଏକ ମ୍ୟାଚ୍ ଦେବା ନେଇ ଓସିଏକୁ ଅଫର୍ ଆସିଥିଲା କିନ୍ତୁ ଓସିଏ ଏଥିରେ ରାଜି ହୋଇନଥିବା ଜଣାପଡିଛି । ତେଣୁ ବାରବାଟୀକୁ କେବେ ଅନ୍ତର୍ଜାତୀୟ ମ୍ୟାଚ୍ ଫେରୁଛି ତାହାକୁ କ୍ରିକେଟ ପ୍ରେମୀ ଅପେକ୍ଷା କରିଛନ୍ତି ।
