ବେଙ୍ଗାଲୁରୁ,୦୩/୧୧: ରବିବାର ଘରୋଇ ଭାରତ ଓ ଅଷ୍ଟ୍ରେଲିଆ ମଧ୍ୟରେ ପଞ୍ଚମ ଟି-ଟ୍ୱେଣ୍ଟି ଖେଳାଯିବ । ଭାରତ ଇତି ମଧ୍ୟରେ ୩-୧ରେ ସିରିଜ କବ୍ଜା କରିସାରିଛି । ତଥାପି ଅନ୍ତିମ ମ୍ୟାଚ୍କୁ ଜିତି ଦଳ ଆଗାମୀ ଦକ୍ଷିଣ ଆଫ୍ରିକା ଗସ୍ତ ପାଇଁ ମନୋବଳ ଦୃଢ କରିବାକୁ ପ୍ରୟାସ କରିବ । ୧୦ତାରିଖରୁ ଦକ୍ଷିଣ ଆଫ୍ରିକାରେ ଟି-ଟ୍ୱେଣ୍ଟି ସିରିଜ ଆରମ୍ଭ ହେବ । ଅଷ୍ଟ୍ରେଲିଆ ମଧ୍ୟ ସମ୍ମାନ ବଞ୍ଚାଇ ସ୍ୱଦେଶ ଫେରିବାକୁ ଯୋଜନା କରୁଛି । ଫଳରେ ରବିବାର ଚିନ୍ନାସ୍ୱାମୀ ଷ୍ଟାଡିୟମ୍ରେ ଏକ ସଂଘର୍ଷପୂର୍ଣ୍ଣ ମୁକାବିଲା ଦେଖିବାକୁ ମିଳିବ ।
ପ୍ରଥମ ୩ଟି ମ୍ୟାଚ୍ରୁ ଭାରତ ୨ଟି ଜିତିଥିଲେ ହେଁ ବୋଲିଂ ବିଭାଗର ପ୍ରଦର୍ଶନକୁ ନେଇ ଚିନ୍ତାରେ ରହିଥିଲା । ପ୍ରତି ମ୍ୟାଚ୍ରେ ପେସ୍ ବାହିନୀ ବ୍ୟୟବହୁଳ ସାବ୍ୟସ୍ତ ହେଉଥିଲେ। ମାତ୍ର ରାଏପୁରରେ ଅନୁଷ୍ଠିତ ଚତୁର୍ଥ ମ୍ୟାଚ୍ରେ ଭାରତ ବୋଲିଂ ଦୁର୍ବଳତାକୁ ସୁଧାରିଥିବା ଦେଖିବାକୁ ମିଳିଥିଲା । ଦକ୍ଷିଣ ଆଫ୍ରିକା ଗସ୍ତ ପୂର୍ବରୁ ସବୁ ଛୋଟ ମୋଟ ତ୍ରୁଟିକୁ ସୁଧାରିବା ଜରୁରି । ତେଣୁ ରବିବାର ଭାରତୀୟ ଦଳ ସବୁ ବିଭାଗରେ ଶ୍ରେଷ୍ଠ ପ୍ରଦର୍ଶନ ପାଇଁ ଅଣ୍ଟା ଭିଡ଼ିଛି ।
ଚତୁର୍ଥ ମ୍ୟାଚ୍ରେ ଅଷ୍ଟ୍ରେଲିଆ ବହୁ ଯୁବ ଖେଳାଳିଙ୍କୁ ସୁଯୋଗ ଦେଇଥିଲା । କିଛି ଖେଳାଳି ବେଶ୍ ଦକ୍ଷ ଥିବା ପ୍ରମାଣ କରିଥିଲେ । ବେନ ମାକଡର୍ମଟ୍, କ୍ରିସ ଗ୍ରୀନ, ବେନ ଡାର୍ସିୟସ ପ୍ରମୁଖ କ୍ରିକେଟ୍ ସମୀକ୍ଷକଙ୍କୁ ପ୍ରଭାବିତ କରିଥିଲେ । ରବିବାର ଘରୋଇ ଦଳକୁ କଡ଼ା ଟକ୍କର ଦେବାକୁ ଯୁବ ଅଷ୍ଟ୍ରେଲିଆ ଖେଳାଳିମାନେ ପ୍ରୟାସ କରିବେ ।
ରବିବାର ଯଶସ୍ୱୀ ଜୈସ୍ୱାଲଙ୍କ ଉପରେ ନଜର ରହିବ । ସେ ପ୍ରତି ମ୍ୟାଚ୍ରେ ବିସ୍ପୋରକ ବ୍ୟାଟିଂ କରୁଛନ୍ତି । ମାତ୍ର ବଡ଼ ଇନିଂସ ଖେଳିବାରେ ବିଫଳ ହୋଇଛନ୍ତି । ୪ଟି ମ୍ୟାଚ୍ରେ ସେ ୧୧୭ ରନ୍ ସଂଗ୍ରହ କରିଛନ୍ତି । ମାତ୍ର ତାଙ୍କ ଷ୍ଟ୍ରାଇକ ରେଟ୍ ୧୭୪.୬୨ ରହିଛି । ରବିବାର ତାଙ୍କ ବ୍ୟାଟ୍ରୁ ଆଉ ଏକ ଧୂଆଁଧାର ଇନିଂସ ଦେଖିବାକୁ ଦର୍ଶକ ଅପେକ୍ଷା କରିଛନ୍ତି । ଭାରତ ସିରିଜ ଜିତି ସାରିଥିବାରୁ ରବିବାର ବଳକା ଖେଳାଳିମାନଙ୍କୁ ସୁଯୋଗ ମିଳିପାରେ । ଅକ୍ଷର ପଟେଲଙ୍କ ସ୍ଥାନରେ ୱାସିଂଟନ ସୁନ୍ଦରଙ୍କୁ ଖେଳିବାକୁ ସୁଯୋଗ ମିଳିବ ।
ରିଙ୍କୁ ସିଂହ ଟି-ଟ୍ୱେଣ୍ଟି ଫର୍ମାଟ୍ର ସ୍ଥାୟୀ ସଦସ୍ୟ ହୋଇଯାଇଛନ୍ତି । ଡେଥ୍ ଓଭର ଗୁଡ଼ିକରେ ତାଙ୍କ ବିସ୍ଫୋରକ ବ୍ୟାଟିଂ ଭାରତ ପାଇଁ ବେଶ୍ ସହାୟକ ହୋଇଛି । ସେ ଡେଥ୍ ଓଭର ଗୁଡ଼ିକରେ ୨୪୫ ଷ୍ଟ୍ରାଇକ ରେଟ୍ରେ ରନ ସଂଗ୍ରହ କରିଛନ୍ତି । ଭାରତୀୟ ଦଳକୁ ରବିବାର ଜାସନ ବେହରନଡର୍ଫଙ୍କ ପ୍ରତି ସତର୍କ ରହିବାକୁ ହେବ । ସେ ପ୍ରତି ମ୍ୟାଚ୍ରେ ଶୃଙ୍ଖଳିତ ବୋଲିଂ ଜାରି ରଖିଛନ୍ତି । ୪ଟି ମ୍ୟାଚ୍ରେ ତାଙ୍କ ଇକୋନୋମି ୫.୭୫ ରହିଛି ।
ଚିନ୍ନାସ୍ୱାମୀରେ ରନ୍ ପର୍ବ: ଚିନ୍ନାସ୍ୱାମୀ ଷ୍ଟାଡିୟମ୍ର ପିଚ ବ୍ୟାଟିଂ ପାଇଁ ବେଶ୍ ଅନୁକୂଳ । ଛୋଟ ବାଉଣ୍ଡାରୀ ଓ ଦ୍ରୁତ ଆଉଟ୍ ଫିଲ୍ଡ୍ରେ ରନ ବର୍ଷା ହେବ । ଫଳରେ ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ । ଦ୍ୱିତୀୟ ଭାଗରେ କାକର ପ୍ରଭାବ ପକାଇବ । ଓଦା ବଲ୍ରେ ବ୍ୟାଟିଂ ସହଜ ହୋଇଯିବ ।
ସମ୍ଭାବ୍ୟ ଦଳ
ଭାରତ: ଯଶସ୍ୱୀ ଜୈସ୍ୱାଲ୍, ଋତୁରାଜ ଗାଏକୱାଡ୍, ଇଶାନ କିଷନ, ସୂର୍ଯ୍ୟକୁମାର ଯାଦବ(ଅଧିନାୟକ), ତିଳକ ବର୍ମା,ରିଙ୍କୁ ସିଂହ, ଅକ୍ଷର ପଟେଲ/ୱାସିଂଟନ ସୁନ୍ଦର, ରବି ବିଷ୍ଣୋଇ, ଦୀପକ ଚହର, ପ୍ରସିଦ୍ଧ କ୍ରିଷ୍ଣା, ମୁକେଶ କୁମାର ।
ଅଷ୍ଟ୍ରେଲିଆ: ଜୋସ ଫିଲିପ, ଟ୍ରେଭିସ୍ ହେଡ୍, ବେନ ମାକଡର୍ମଟ୍, ଆରନ ହାର୍ଡି, ଟିମ ଡେଭିଡ୍, ମାଥ୍ୟୁ ସର୍ଟ, ମାଥ୍ୟୁ ୱେଡ୍(ଅଧିନାୟକ), ବେନ ଡାର୍ସିୟସ, କ୍ରିସ ଗ୍ରୀନ, ଜାସନ ବେହରନଡର୍ଫ, ତନବୀର ସାଙ୍ଘା/ନାଥାନ ଏଲିସ/କେନ ରିଚାର୍ଡସନ ।