ଜେରୁସାଲେମ: ଇସ୍ରାଏଲ ଏବଂ ହମାସ ମଧ୍ୟରେ ଲଢ଼େଇ ଜାରି ରହିଛି । ଦୀର୍ଘ ଦିନ ଧରି ଜାରି ରହିଥିବା ଏହି ଯୁଦ୍ଧରେ ଏବେ ସୁଦ୍ଧା ପ୍ରାୟ ୧୨ ହଜାର ଜୀବନ ଗଲାଣି । ସେପଟେ ଉତ୍ତର ଗାଜାରେ ଇସ୍ରାଏଲ ଆକ୍ରମଣ କରୁଥିବା ବେଳେ ଏବେ ଦକ୍ଷିଣ ଗାଜକୁ ବି ତ୍ରାହି ନାହିଁ । ସେଫ୍ ଜୋନ୍ କୁହାଯାଉଥିବା ଦକ୍ଷିଣ ଗାଜାରେ ଇସ୍ରାଏଲ ସେନା ପକ୍ଷରୁ ରକେଟ ମାଡ ହେଉଥିବା ଜଣାପଡ଼ିଛି । ଏହା ପୂର୍ବରୁ ଉତ୍ତର ଗାଜା ଛାଡ଼ି ଦକ୍ଷିଣ ଗାଜାକୁ ଚାଲିଯିବା ପାଇଁ ଲୋକମାନଙ୍କୁ ଇସ୍ରାଏଲ ପକ୍ଷରୁ କୁହାଯାଇଥିଲା । ହେଲେ ଦକ୍ଷିଣ ଗାଜା ବି ଏବେ ସୁରକ୍ଷିତ ନାହିଁ ।
ଦକ୍ଷିଣ ଗାଜାର ଖାନ ୟୁନିସ ଅଞ୍ଚଳରେ ଇସ୍ରାଏଲ ସେନା ଲଗାତାର ରକେଟ ମାଡ କରୁଛି । ଏହି ଆକ୍ରମଣରେ ଅନେକ ଲୋକଙ୍କ ଜୀବନ ଯାଇଥିବା ବେଳେ ଅନେକ ଆହତ ହୋଇଛନ୍ତି । ସେପଟେ ହିସ୍ପିଟାଲରେ ଇସ୍ରାଏଲ କରିଥିବା ଆକ୍ରମଣକୁ ଯୁଦ୍ଧ ଅପରାଧ ଢଙ୍ଗରେ ଯାଞ୍ଚ କରାଯିବା ଦରକାର ବୋଲି ମାନବାଧିକାର ସଂଗଠନ ପକ୍ଷରୁ ଦାବି ହୋଇଛି । ପାଲେଷ୍ଟାଇନ୍ ଶରଣାର୍ଥୀଙ୍କ ଲାଗି କାର୍ଯ୍ୟ କରୁଥିବା ଜାତିସଂଘର ଏକ ଏଜେନ୍ସି କହିଛି ଯେ, ବୁଧବାର ସୁଦ୍ଧା ଗାଜାକୁ ଇନ୍ଧନ ଦେବା ଲାଗି ଅନୁମତି ନମିଳିଲେ ଏହାର ସମସ୍ତ କାର୍ଯ୍ୟ ଠପ ହୋଇଯିବ ।
ଅକ୍ଟୋବର ୭ରେ ଗାଜାରୁ ପରିଚାଳିତ ହମାସ ଆତଙ୍କବାଦୀ ସଂଗଠନ ଦକ୍ଷିଣ ଇସ୍ରାଏଲ ଉପରେ ଆକ୍ରମଣ କରିଥିଲା । ଏହା ପରେ ଉଭୟ ପକ୍ଷ ମଧ୍ୟରେ ଯୁଦ୍ଧ ଜାରି ରହିଛି । ଅଲଜଜୀରା ରିପୋର୍ଟ ଅନୁସାରେ, ଇସ୍ରାଏଲ ପଟୁ ହେଉଥିବା ଆକ୍ରମଣରେ ଗାଜାରେ ଏବେ ସୁଦ୍ଧା ୧୧ ହଜାର ୨୦୦ ପାଲେଷ୍ଟାଇନ୍ ନାଗରିକଙ୍କ ମୃତ୍ୟୁ ହୋଇଛି । ସେପଟେ ହମାସ ଆକ୍ରମଣରେ ୧୨ ଶହରୁ ଅଧିକ ଇସ୍ରାଏଲ ନାଗରିକ ପ୍ରାଣ ହରାଇଛନ୍ତି ।
ସେପଟେ ଇସ୍ରାଏଲ ନିଜର ଆକ୍ରମଣ ଜୋରଦାର କରିବା ପରେ ଗତ ୧୦ ଦିନ ମଧ୍ୟରେ ଉତ୍ତର ଗାଜାରୁ ୨ ଲକ୍ଷ ଲୋକ ପଳାୟନ କରିଛନ୍ତି । ଏବେ ଉତ୍ତର ଗାଜାରେ କେବଳ ଗୋଟିଏ ହସ୍ପିଟାଲ ହିଁ କାର୍ଯ୍ୟକ୍ଷମ ଅଛି । ଯେଉଁଠି ଆହତଙ୍କୁ ଚିକିତ୍ସା କରାଯାଉଛି । ଆକ୍ରମଣ ଯୋଗୁଁ ଅନ୍ୟ ହସ୍ପିଟାଲଗୁଡ଼ିକରେ ବିଜୁଳୀ ଯୋଗାଣ ବାଧାପ୍ରାପ୍ତ ହୋଇଥିବାରୁ ଶିଶୁ ଏବଂ ମହିଳା ରୋଗୀମାନେ ବିଶେଷ ପ୍ରଭାବିତ ହୋଇଛନ୍ତି ବୋଲି ଜାତିସଂଘର ମାନବାଧିକାର କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି ।
ଅନ୍ୟପଟେ ଗାଜାର ସବୁଠୁ ବଡ଼ ହସ୍ପିଟାଲ ଅଲ-ଶିଫା ହସ୍ପିଟାଲ ଏକ ଶ୍ମଶାନରେ ପରିଣତ ହୋଇଥିବା କୁହାଯାଉଛି । ବିବିସିର ଏକ ରିପୋର୍ଟ ଅନୁସାରେ, ହସ୍ପିଟାଲ ବାହାରେ ଏବଂ ଭିତରେ ପ୍ରାୟ ୧୭୦ ଶବ ଏବେ ବି ପଡ଼ିରହିଛି । ଏଭଳି ସମୟରେ ଆମେରିକା ରାଷ୍ଟ୍ରପତି ଜୋ ବାଇଡେନ୍ ଅଲ-ଶିଫା ହସ୍ପିଟାଲକୁ ସୁରକ୍ଷା ଦେବା ପାଇଁ ଆଗ୍ରହ କରିବା ସହ ଏହି ଅଞ୍ଚଳରେ ଆକ୍ରମଣ ବନ୍ଦ କରିବା ଲାଗି ଅପିଲ କରିଛନ୍ତି । ବାଇଡେନ୍ଙ୍କ ପୂର୍ବରୁ ବ୍ରିଟେନ୍ ପ୍ରଧାନମନ୍ତ୍ରୀ ଋଷି ସୁନକ ଗାଜାରେ ସାଧାରଣ ନାଗରିକଙ୍କୁ ସୁରକ୍ଷା ଦେବାକୁ କହିବା ସହ ଯଥାସମ୍ଭବ ଯୁଦ୍ଧ ବିରାମ ପାଇଁ ଅପିଲ କରିଥିଲେ । ସେପଟେ କୌଣସି ହସ୍ପିଟାଲକୁ ଟାର୍ଗେଟ କରୁନାହୁଁ ବୋଲି କହିବା ସହ ଅଲ-ଶିଫା ହସ୍ପିଟାଲ ନିକଟରେ ଆକ୍ରମଣ ଜାରି ରହିଛି ବୋଲି ଇସ୍ରାଏଲ ସେନା ସ୍ବୀକାର କରିଛି ।
