ନୂଆଦିଲ୍ଲୀ ୨୩/୦୨: କାନାଡ଼ାର ଟିମ୍ ଚେନ୍ ନାମକ ଜଣେ ଛାତ୍ର ଟଙ୍କା ସଞ୍ଚୟ ଲାଗି କଲେଜକୁ ବିମାନରେ ଯାଉଛନ୍ତି । ସେ ବ୍ରିଟିଶ କଲମ୍ବିଆ ବିଶ୍ୱବିଦ୍ୟାଳୟରେ ଅଧ୍ୟୟନ କରୁଛନ୍ତି । ସପ୍ତାହରେ ତାଙ୍କୁ ଦୁଇଟି କ୍ଲାସ୍ କରିବାକୁ ପଡ଼େ । ସେ କାଲଗରୀରେ ରହିଥିବାବେଳେ ତାଙ୍କ କଲେଜ ଭାଙ୍କୁଭରରେ ଅବସ୍ଥିତ । ସେଠାରେ ଘର ଭଡ଼ା ବହୁତ ଅଧିକ । ତେଣୁ ସେଠାରେ ରହିବା ପରିବର୍ତ୍ତେ ବିମାନ ଯାତ୍ରା କରିବା ଯୋଗୁ ଟିମ୍ଙ୍କର ଅର୍ଥ ସଞ୍ଚୟ ହୋଇଯାଉଛି ।
ଥରେ ବିମାନ ଯାତ୍ରାରେ ତାଙ୍କର ୧୫୦ ଡଲାର ଖର୍ଚ୍ଚ ହେଉଛି । ସେହି ହିସାବରେ ମାସ ସାରା ବିମାନ ଯାତ୍ରାରେ ତାଙ୍କର ୯୯,୬୩୧ ଟଙ୍କା ଖର୍ଚ୍ଚ ହେଉଛି । କିନ୍ତୁ ଭାଙ୍କୁଭରରେ ଗୋଟିଏ ଶୟନକକ୍ଷଯୁକ୍ତ ଆପାର୍ଟମେଣ୍ଟର ଭଡ଼ା ୧,୭୪,୩୫୮ ଟଙ୍କା ବୋଲି ଟିମ୍ ସୋସିଆଲ ମିଡିଆରେ ଶେୟାର କରିଛନ୍ତି । ସେ ସପ୍ତାହରେ କେବଳ ମଙ୍ଗଳବାର ଓ ଗୁରୁବାର କଲେଜ ଯାଇଥାନ୍ତି । ସକାଳେ ସେ ବିମାନ ଯୋଗେ ଭାଙ୍କୁଭର ଯାତ୍ରା କରନ୍ତି ଏବଂ ରାତିରେ କାଲଗରୀ ଫେରନ୍ତି । ଏଥିପାଇଁ ସେ କେବଳ ଏୟାର କାନାଡ଼ା ବିମାନରେ ଯାତ୍ରା କରନ୍ତି । ଗତ ଜାନୁଆରୀ ମାସରେ ସେ କଲେଜ ପାଇଁ ୭ ଥର ବିମାନ ଯାତ୍ରା କରିଛନ୍ତି । ଏଥିରୁ ଭଡ଼ା ବାବଦକୁ ତାଙ୍କର ଅର୍ଥ ସଞ୍ଚୟ ହୋଇଥିବା ସେ ସ୍ପଷ୍ଟ କରିଛନ୍ତି । ବେଳେବେଳେ ଟିକିଏ ଅଧିକ ଖର୍ଚ୍ଚ ହେଉଛି, କିନ୍ତୁ ତାହା ଭାଙ୍କୁଭର୍ରେ ଭଡ଼ା ଘର ନେଇ ରହିବାଠୁ କମ୍ ବୋଲି ଟିମ୍ କହିଛନ୍ତି ।