ରାଉରକେଲା ୨୧/୧୧: ଉତ୍ତରାଖଣ୍ଡର ଉତ୍ତରକାଶୀରେ ନିର୍ମାଣାଧୀନ ସୁଡ଼ଙ୍ଗ ଧସିବା ଯୋଗୁ ୯ ଦିନ ହେଲା ଫସି ରହିଛନ୍ତି ୪୧ ଜଣ ଶ୍ରମିକ। ଏହି ଶ୍ରମିକମାନଙ୍କୁ ଉଦ୍ଧାର ଲାଗି ପ୍ରଧାନମନ୍ତ୍ରୀ କାର୍ଯ୍ୟାଳୟର ନିର୍ଦ୍ଦେଶକ୍ରମେ ରାଉରକେଲା ଇସ୍ପାତ କାରଖାନା (ଆରଏସ୍ପି) ରୁ ସ୍ୱତନ୍ତ୍ର ସ୍ପାଇରାଲ ୱେଲ୍ଡ ପାଇପ ବାୟୁସେନାର ବିମାନ ଯୋଗେ ଉତ୍ତରକାଶୀକୁ ସୋମବାର ପଠାଯାଇଛି ।
ସୋମବାର ରାଉରକେଲାକୁ ବାୟୁସେନାର ଦୁଇଟି ବିମାନ ଆସିଥିବା ବେଳେ ଆଜି ଆଉ ଦୁଇଟି ବିମାନ ଆସିବ ବୋଲି ଜଣାପଡ଼ିଛି । ସୁଡ଼ଙ୍ଗ ଧସିବା ପରେ ଶ୍ରମିକମାନଙ୍କୁ ଉଦ୍ଧାର ଲାଗି ଏନ୍ଡିଆରଏଫ୍, ଏସ୍ଡିଆରଏଫ୍ ଏବଂ ସେନାର ଯବାନମାନେ ମୁତୟନ ହୋଇଛନ୍ତି । ଫସି ରହିଥିବା ଶ୍ରମିକମାନଙ୍କ ମଧ୍ୟରେ ପ୍ରାୟ ୫ ଜଣ ଓଡ଼ିଆ ଶ୍ରମିକ ଅଛନ୍ତି । ଉଦ୍ଧାର କାର୍ଯ୍ୟରେ ସମସ୍ତ ଆବଶ୍ୟକ ମେସିନ ଯୋଗାଇ ଦିଆଯାଇଛି । ଶ୍ରମିକମାନଙ୍କୁ ସୁରକ୍ଷିତ ଉଦ୍ଧାର କରିବା ଲାଗି ସ୍ୱତନ୍ତ୍ର ସ୍ପାଇରାଲ ୱେଲ୍ଡ ପାଇପ ଆବଶ୍ୟକ ପଡ଼ୁଛି । ଏହି ପାଇପ କେବଳ ଆରଏସ୍ପିରେ ତିଆରି ହେଉଥିବାରୁ ଆଜି ସକାଳେ ପିଏମ୍ଓ କାର୍ଯ୍ୟାଳୟ ପକ୍ଷରୁ ଏକ ନିର୍ଦ୍ଦେଶନାମା ସେଲ୍ କର୍ତ୍ତୃପକ୍ଷଙ୍କ ନିକଟକୁ ଆସିଥିଲା । ଏହି ନିର୍ଦ୍ଦେଶନାମା ଆରଏସ୍ପି କର୍ତ୍ତୃପକ୍ଷ ପାଇବା ପରେ ପାଇପଗୁଡ଼ିକୁ ତୁରନ୍ତ ଟ୍ରେଲରରେ ଲୋଡ଼ କରାଯାଇ ରାଉରକେଲା ବିମାନ ବନ୍ଦରକୁ ନିଆଯାଇଥିଲା ।
ବାୟୁସେନାର ପ୍ରଥମ ବିମାନ ସକାଳ ୯.୪୦ ମିନିଟ୍ରେ ବିମାନ ବନ୍ଦରରେ ପହଞ୍ଚିଥିଲା । ସେଥିରେ ୬ଟି ୧୨ ଫୁଟ ଲମ୍ବର ପାଇପ ଲୋଡ଼ କରାଯାଇଥିଲା । ଦିନ ୧୨ଟା ସମୟରେ ପାଇପ ନେଇ ବିମାନ ଉତ୍ତରକାଶୀ ଅଭିମୁଖେ ବାହାରିଥିଲା । ଏହା ପରେ ଦ୍ୱିତୀୟ ବିମାନ ଅପରାହ୍ନ ୧.୩୦ ମିନିଟ୍ ସମୟରେ ଏଠାରେ ପହଞ୍ଚିଥିଲା । ସେଥିରେ ମଧ୍ୟ ୬ଟି ପାଇପ୍ ଲୋଡ଼ କରାଯାଇଥିଲା । ଅପରାହ୍ନ ୪ଟା ସମୟରେ ବିମାନ ଘଟଣା ସ୍ଥଳକୁ ଯାଇଥିଲା । ସଂଧ୍ୟାରେ ଆଉ ଏକ ବିମାନ ଆସି ବିମାନ ବନ୍ଦରରେ ପହଞ୍ଚିଛି । ରାତି ହୋଇଯାଇଥିବାରୁ ପାଇପ ଲୋଡ଼ ହୋଇ ପାରିନଥିଲା । ମଙ୍ଗଳବାର ସକାଳେ ପାଇପ୍ ନେଇ ବିମାନ ଉଡ଼ିବ ବୋଲି ଜଣାପଡ଼ିଛି ।
ମିଳିଥିବା ସୂଚନାନୁସାରେ ସ୍ପାଇରାଲ ୱେଲ୍ଡ ପାଇପର ଡାଏମିଟର ବଡ଼ ଥିବାରୁ ଜଣେ ମଣିଷ ସେହି ପାଇପ ଦେଇ ଭିତରକୁ ପଶି ପାରିବ। ସୁଡ଼ଙ୍ଗର ଯେଉଁ ସ୍ଥାନରେ ଶ୍ରମିକମାନେ ଫସି ରହିଛନ୍ତି ସେହି ସ୍ଥାନରେ ଏହି ପାଇପ ବ୍ୟବହାର କରାଯିବ । ଉତ୍ତରକାଶୀକୁ ମୋଟ ୨୫ଟି ପାଇପ ଯିବ । ଗୋଟିଏ ଦିନରେ ଦୁଇଟି ବିମାନ ଯୋଗେ ୧୨ଟି ପାଇପ ଯାଇଛି । ବାକି ପାଇପ ଆଜି ଦୁଇଟି ବିମାନରେ ଯିବ ବୋଲି ଜଣାପଡ଼ିଛି ।