ତେଲକୋଇ,୩୦/୦୮: ଦିନେ କି ଦୁଇ ଦିନ ନୁହେଁ, ତିନି ଦିନ ଧରି ନିଖୋଜ ହୋଇଥିଲେ ନାବାଳକ । ଦୀର୍ଘ ୭୨ ଘଣ୍ଟା ପରେ ଲଟା ବୁଦା ଭିତରୁ ଚେତାଶୁନ୍ୟ ଅବସ୍ଥାରେ ଉଦ୍ଧାର ହେଲେ ନିଖୋଜ ନାବାଳକ ।  ନିଖୋଜ ନାବାଳକ ଜଣକ  ଲିଙ୍କି ପାତ୍ର ଓ ସଞ୍ଜୟ ପାତ୍ରଙ୍କ ୧୨ ବର୍ଷର ପୁଅ ଶାନ୍ତନୁ ପାତ୍ର ବୋଲି ଜଣା ପଡ଼ିଛି । ରଶ୍ମି ପାତ୍ର ଓ ଡିଲ ପାତ୍ର ଶାନ୍ତନୁକୁ ଅପହରଣ କରିଥିଲେ । କେନ୍ଦୁଝର ଜିଲ୍ଲା ତେଲକୋଇ ଥାନା କରଦାଙ୍ଗି ଗ୍ରାମରେ ଏଭଳି ଘଟଣା ଘଟିଛି । 

ସୂଚନା ଅନୁଯାୟୀ, ତେଲକୋଇ ଥାନା କରଦାଙ୍ଗୀ ଗ୍ରାମର ଲିଙ୍କି ପାତ୍ର ଓ ସଞ୍ଜୟ ପାତ୍ରଙ୍କ ୧୨ ବର୍ଷର ପୁଅ ଶାନ୍ତନୁ ଅଗଷ୍ଟ ୨୭ ତାରିଖ ଅର୍ଥାତ ମଙ୍ଗଳବାରଠାରୁ ନିଖୋଜ ହୋଇଥିଲେ । ଏନେଇ ଶାନ୍ତନୁଙ୍କ ପରିବାର ଲୋକେ ଥାନାରେ ଅଭିଯୋଗ କରିଥିଲେ । କିଛି ଟଙ୍କା ପାଇଁ ସେହି ଗ୍ରାମର ରଶ୍ମି ପାତ୍ର ଓ ଡିଲ ପାତ୍ର ଶାନ୍ତନୁକୁ ଅପହରଣ କରି ଥିବା ଶାନ୍ତନୁଙ୍କ ପରିବାର ପକ୍ଷରୁ ଅଭିଯୋଗ ଆସିଥିଲା । ଅଗଷ୍ଟ ୨୯ ତାରିଖ ଅର୍ଥାତ ଗୁରୁବାର ଗଣ ମାଧ୍ୟମରେ ଏହି ଘଟଣା ବଷୟରେ ଖବର ପ୍ରକାଶ ପାଇବା ପରେ ଜିଲ୍ଲା ପୋଲିସ ପ୍ରଶାସନ ପକ୍ଷରୁ ତନା ଘନା ଆରମ୍ଭ ହୋଇଥିଲା । ଜିଲ୍ଲା ଆରକ୍ଷୀ ଅଧିକ୍ଷକ ଏହି ଘଟଣାର ହସ୍ତକ୍ଷେପ କରି ବିଭିନ୍ନ ଦିଗରେ ତଦନ୍ତ ଆରମ୍ଭ କରିଥିଲେ । ନିଖୋଜ ଶାନ୍ତନୁକୁ ଖୋଜାଖୋଜି ପାଇଁ ବିଭିନ୍ନ ବର୍ଗର ପୋଲିସ କରଦାଙ୍ଗି ଗ୍ରାମରେ ଛାଉଣୀ ହୋଇଯାଇଥିଲେ । ମାତ୍ର ନିଖୋଜ ଶାନ୍ତନୁର କୌଣସି ପତ୍ତା ମିଳିପାରିନଥିଲେ । ତେବେ ଶୁକ୍ରବାର  ସକାଳ ସମୟରେ ରଶ୍ମି ଓ ଡିଲ ପାତ୍ରଙ୍କ ଘର ପଛ ପଟେ ଥିବା ପାଳ ଭାଡ଼ି ନିକଟ ଲଟା ବୁଦା ଭିତରୁ ସ୍ଥାନୀୟ ଲୋକେ ଶାନ୍ତନୁକୁ ଚେତା ଶୂନ୍ୟ ଅବସ୍ଥାରେ ଉଦ୍ଧାର କରିଥିଲେ । ଶାନ୍ତନୁଙ୍କ ଅବସ୍ଥା ଗୁରୁତର ରହିଥିବାରୁ ପ୍ରଥମେ ତେଲକୋଇ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଏବଂ ପରେ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ପୋଲିସ ଏହି ଘଟଣାରେ ତଦନ୍ତ ଆରମ୍ଭ କରିଛି ।

ତେବେ ସ୍ଥାନୀୟ ଲୋକଙ୍କ କହିବା କଥା ଯେ, ଅଗଷ୍ଟ ୨୯ ଅର୍ଥାତ୍ ଗୁରୁବାର ଉକ୍ତ ଅଞ୍ଚଳର ଚତୁର୍ପାର୍ଶ୍ଵ ପୋଲିସ ଓ ସ୍ଥାନୀୟ ଲୋକଙ୍କ ଦ୍ଵାରା ଖୋଜା ଖୋଜି କରାଯାଇଥିଲା କିନ୍ତୁ ଶାନ୍ତନୁଙ୍କ ପତ୍ତା ମିଳି ନଥିଲା । ତେବେ ଗୋଟିଏ ରାତିରେ ପାଳ ଗଦା ନିକଟସ୍ଥ ଲଟା ବୁଦା ଭିତରୁ ଚେତା ଶୂନ୍ୟ ଅବସ୍ଥାରେ ଶାନ୍ତନୁ ଉଦ୍ଧାର ହେବା ପୋଲିସ ପାଇଁ ଅଡ଼ୁଆ ସୃଷ୍ଟି କରିଛି । ଏହି ଘଟଣାର ବିଭିନ୍ନ ଦିଗକୁ ନେଇ ପୁଲିସ ତଦନ୍ତ ଚଳାଇଛି ।