ନୂଆଦିଲ୍ଲୀ: ଇଣ୍ଡିଆନ ପ୍ରିମିୟର ଲିଗ (ଆଇପିଏଲ)ର ଦୁଇ ମ୍ୟାଚ୍ର ତାରିଖ ପରିବର୍ତ୍ତନ ନେଇ ମଙ୍ଗଳବାର ଘୋଷଣା କରିଛି ବିସିସିଆଇ । କୋଲକାତା ନାଇଟ ରାଇଡର୍ସ (କେକେଆର) ଏବଂ ରାଜସ୍ଥାନ ରୟାଲ୍ସ (ଆରଆର) ମ୍ୟାଚ୍ ତାରିଖ ଏପ୍ରିଲ ୧୬କୁ ଘୁଞ୍ଚାଇ ଦିଆଯାଇଛି । ଏହି ମ୍ୟାଚ୍ ଏପ୍ରିଲ ୧୭ ତାରିଖରେ ହେବ ବୋଲି ପୂର୍ବରୁ ଧାର୍ଯ୍ୟ ହୋଇଥିଲା । ସେହିଭଳି ଏପ୍ରିଲ ୧୬ ତାରିଖରେ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ହେବାକୁ ଥିବା ଗୁଜରାଟ ଟାଇଟନ୍ସ (ଜିଟି) ଏବଂ ଦିଲ୍ଲୀ କ୍ୟାପିଟାଲ୍ସ (ଡିସି) ମ୍ୟାଚ୍କୁ ଗୋଟିଏ ଦିନ ଆଗକୁ ଅର୍ଥାତ ଏପ୍ରିଲ ୧୭କୁ ଘୁଞ୍ଚାଇ ଦେଇଛି ବିସିସିଆଇ ।
ତାରିଖ ପରିବର୍ତ୍ତନ ପଛରେ ପ୍ରକୃତ କାରଣ ନେଇ କୌଣସି ସୂଚନା ଦେଇନାହିଁ ବିସିସିଆଇ । ହେଲେ ଏପ୍ରିଲ ୧୭ରେ ରାମ ନବମୀ ଥିବାରୁ ପଞ୍ଚିମବଙ୍ଗ କ୍ରିକେଟ ଆସୋସିଏସନର ଅନୁରୋଧ କ୍ରମେ ବିସିସିଆଇ ଏଭଳି ନିଷ୍ପତ୍ତି ନେଇଥିବା କୁହାଯାଉଛି । କୋଲକାତାର ଇଡେନ୍ ଗାର୍ଡେନ୍ରେ କେକେଆର ଏବଂ ଆରଆର ମ୍ୟାଚ୍ ହେବାର ଥିଲା । ହେଲେ ଏବେ ଏହି ମ୍ୟାଚ୍ ଏପ୍ରିଲ ୧୬ରେ ଅନୁଷ୍ଠିତ ହେବ ।
ସୂଚନାଯୋଗ୍ୟ, ଲୋକସଭା ନିର୍ବାଚନକୁ ଆଖି ଆଗରେ ରଖି ବିସିସିଆଇ ଦୁଇଟି ଚରଣରେ ମ୍ୟାଚ୍ ସୂଚୀ ଜାରି କରିଥିଲା । ଦ୍ବିତୀୟ ଚରଣର ମ୍ୟାଚ୍ ଏପ୍ରିଲ ୮ରୁ ଆରମ୍ଭ ହେବ । ଏହି ଦିନ ଚେନ୍ନାଇ ସୁପର କିଙ୍ଗ୍ସ, କୋଲକାତା ନାଇଟ ରାଇଡର୍ସକୁ ଭେଟିବ । ଏପ୍ରିଲ ୮ ତାରିଖ ରାତି ୭.୩୦ରେ ମୁହାଁମୁହିଁ ହେବେ ସିଏସ୍କେ ଏବଂ କେକେଆର । ସେହିଭଳି ପ୍ରଥମ ଚରଣର ପ୍ରଥମ ମ୍ୟାଚ୍ରେ ଚେନ୍ନାଇ ହିଁ ଖେଳିଥିଲା । ମାର୍ଚ୍ଚ ୨୨ରେ ବେଙ୍ଗାଲୁରୁ ବିପକ୍ଷରେ ଆଇପିଏଲ-୨୦୨୪ ଅଭିଯାନ ଆରମ୍ଭ କରିଥିଲା ସିଏସକେ । ଏହି ମ୍ୟାଚ୍ରେ ୪ ଓ୍ବିକେଟରେ ସିଏସକେ ବିଜୟୀ ହୋଇଥିଲା ।
ଚଳିତ ଆଇପିଏଲ୍ ସିଜନରେ ରାଜସ୍ଥାନ ପଏଣ୍ଟ ଟେବୁଲ୍ରେ ଶୀର୍ଷରେ ରହିଛି। ଏହା ପଛକୁ କେକେଆର, ସିଏସକେ ଏବଂ ଜିଟି ରହିଛି । ସେହିଭଳି ପଏଣ୍ଟ ଟେବୁଲ୍ର ତଳଆଡ଼ୁ ମୁମ୍ବାଇ ଇଣ୍ଡିଆନ୍ସ, ରୟାଲ ଚ୍ୟାଲେଞ୍ଜର୍ସ ବେଙ୍ଗାଲରୁ ଏବଂ ପଞ୍ଜାବ କିଙ୍ଗ୍ସ ରହିଛି ।
