ଭୁବନେଶ୍ୱର,୨୫/୦୮: ଦୂରଦର୍ଶନରେ ପ୍ରସାରିତ ଭାରତର ପ୍ରଥମ ଲୋକ ସଙ୍ଗୀତ ରିଆଲିଟି ସୋ’ ‘ଭାରତ କା ଅମ୍ରିତ କଳସ’ର ଗ୍ରାଣ୍ଡ୍ ଫିନାଲେରେ ପହଞ୍ଚିଛନ୍ତି ଓଡ଼ିଆ ଝିଅ ତଥା ଗାୟିକା ବର୍ଣ୍ଣାଳୀ ହୋତା । ୨୮ଟି ରାଜ୍ୟ ଏବଂ ୮ଟି କେନ୍ଦ୍ର ଶାସିତ ଅଞ୍ଚଳର ବିଭିନ୍ନ ପ୍ରତିଯୋଗୀଙ୍କୁ ପଛରେ ପକାଇ ବର୍ଣ୍ଣାଳୀ ଅନ୍ୟମାନଙ୍କ ସହ ଶେଷ ପର୍ଯ୍ୟାୟରେ ପହଞ୍ଚିଥିଲେ । ରବିବାର ସୋ’ ଫାଇନାଲ୍ ଥିବାରୁ ସେ ଟାଇଟଲ୍ ବଜାୟ ରଖିବେ ବୋଲି ଆଶା ରହିଛି ।
ତାଙ୍କ ସହିତ ରାଜସ୍ଥାନ, ମହାରାଷ୍ଟ୍ର ଏବଂ ଅନ୍ୟାନ୍ୟ ରାଜ୍ୟର ଲୋକ ସଙ୍ଗୀତ କଳାକାରମାନେ ମଧ୍ୟ ଅଛନ୍ତି । ଭଗବାନଙ୍କ ଆଶୀର୍ବାଦ ଓ ବିଚାରକଙ୍କ ବିଚାର ଯାହା ସପକ୍ଷରେ ଯିବ ସେ ସୋ’ ବିଜେତା ହେବ । କିନ୍ତୁ ଘୋଷଣା ପର୍ଯ୍ୟନ୍ତ ଅପେକ୍ଷା କରିବାକୁ ହେବ । ଏହି କାର୍ଯ୍ୟକ୍ରମରେ ଓଡ଼ିଶାର ଅନେକଗୁଡ଼ିଏ ଲୋକପ୍ରିୟ ପାରମ୍ପରିକ ସଙ୍ଗୀତ ସହ ବିଭିନ୍ନ ସ୍ଥାନୀୟ ଭାଷାର ପ୍ରସିଦ୍ଧ ସଙ୍ଗୀତ ଗାଇ ବର୍ଣ୍ଣାଳୀ ଚର୍ଚ୍ଚାରେ ରହିବା ସହ ଜାତୀୟସ୍ତରରେ ଦୃଷ୍ଟିଆକର୍ଷଣ କରିଥିଲେ ଏବଂ ବିଚାରକଙ୍କ ହୃଦୟ ଜିଣିଥିଲେ । ବର୍ଣ୍ଣାଳୀ ମହାପ୍ରଭୁ ଶ୍ରୀଜଗନ୍ନାଥଙ୍କ ବହୁ ଚର୍ଚ୍ଚିତ ଭଜନ, ଜଣାଣ ଏହି ମଞ୍ଚରେ ଚମତ୍କାର ସ୍ୱରରେ ପରିବେଷଣ କରିଛନ୍ତି । ଏହି ଯାତ୍ରାରେ ତାଙ୍କ ସଫଳତା ନେଇ ପରିବାର ସଦସ୍ୟ, ଗୁରୁ, ସାଥୀ ଓ ତାଙ୍କ ସହ ଜଡ଼ିତ ବିଭିନ୍ନ ସାଂସ୍କୃତିକ ଅନୁଷ୍ଠାନ ଠାକୁରଙ୍କ ପାଖରେ ପ୍ରାର୍ଥନା କରିଛନ୍ତି ।
