ଢେଙ୍କାନାଳ,୦୫/୦୮: ଅଣ୍ଡିରା ହାତୀ ଛୁଆର ମୃତ ଦେହ ଠାବ। ଢେଙ୍କାନାଳ ଜିଲ୍ଲା ହିନ୍ଦୋଳ ବନାଞ୍ଚଳ ରାସୋଳ ସେକ୍ସନ ଆମ୍ବଲୁଣ୍ଡି ଗ୍ରାମରୁ ହାତୀ ଛୁଆର ମୃତଦେହ ଉଦ୍ଧାର କରାଯାଇଛି। ସୋଲାର ବିଦ୍ୟୁତ ଆଘାତରେ ହାତୀ ଛୁଆର ମୃତ୍ୟୁ ଘଟିଥିବା ସନ୍ଦେହ କରାଯାଉଛି। 

ସୂଚନା ଅନୁଯାୟୀ, ରବିବାର ରାତିରେ ଏକ ହାତୀପଲ ହିନ୍ଦୋଳ ବନାଞ୍ଚଳ ରାସୋଳ ସେକ୍ସନ ଆମ୍ବଲୁଣ୍ଡି ଗ୍ରାମ ପାର୍ଶ୍ଵ ଧାନ କ୍ଷେତ ଦେଇ ଯାଉଥିଲେ । ଏହି ସମୟରେ କୌଣସି କାରଣବଶତଃ ହାତୀ ଛୁଆଟି ଗୋଠରୁ ଅଲଗା ହୋଇଯାଇଥିଲା । ଉକ୍ତ ଅଞ୍ଚଳରେ ଗ୍ରାମର ସୁରକ୍ଷା ପାଇଁ ସୋଲାର ବାଡ଼ ଲଗାଯାଇଥିଲା । ଏହି ସୋଲାର ବାଡ଼ ସଂସ୍ପର୍ଶରେ ଆସି ହାତୀ ଛୁଆର ମୃତ୍ୟୁ ଘଟିଥିବା ନେଇ ବନବିଭାଗ ସନ୍ଦେହ କରୁଛି । ବନବିଭାଗ ଅଧିକାରୀ ଘଟଣା ସ୍ଥଳରେ ପହଞ୍ଚି ହାତୀ ଛୁଆର ମୃତଦେହକୁ ଜବତ କରିବା ସହ ତଦନ୍ତ ଚଳାଇଛି । ତଦନ୍ତ ପରେ ହାତୀ ଛୁଆଟୀର ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ବୋଲି କୁହାଯାଉଛି। ହାତୀ ଛୁଆଟିର ବୟସ ୫ ବର୍ଷ ହେବ ବୋଲି ଅନୁମାନ କରାଯାଉଛି।