ନୂଆଦିଲ୍ଲୀ, ୦୧/୦୩: କେନ୍ଦ୍ର ସରକାର ବ୍ୟାଙ୍କ କର୍ମଚାରୀଙ୍କୁ ବଡ଼ ଉପହାର ଦେଇ ପାରନ୍ତି । ପ୍ରଥମ ୬ ମାସରେ ସପ୍ତାହକୁ ୫ ଦିନ କାର୍ଯ୍ୟ ଦିବସ ପ୍ରସ୍ତାବକୁ ସ୍ୱୀକାର କରି ପାରନ୍ତି ସରକାର । କେନ୍ଦ୍ର ସରକାର ପ୍ରସ୍ତାବ ସ୍ୱୀକାର କଲେ ବ୍ୟାଙ୍କ କର୍ମଚାରୀ ସପ୍ତାହକୁ ୨ ଦିନ ଛୁଟି ପାଇବେ । ଏହାଛଡ଼ା ବ୍ୟାଙ୍କ କର୍ମଚାରୀଙ୍କ ଦରମା ବି ବୃଦ୍ଧି ପାଇବ ।
ରିପୋର୍ଟ ଅନୁସାରେ, ଅର୍ଥ ମନ୍ତ୍ରଣାଳୟର ଅନୁମୋଦନ ପରେ ବ୍ୟାଙ୍କ କର୍ମଚାରୀଙ୍କୁ ସପ୍ତାହକୁ ୫ ଦିନ କାର୍ଯ୍ୟ ଦିବସ ମିଳିବା ସହ ଜୁନରେ ବଢ଼ିପାରେ ଦରମା । ବ୍ୟାଙ୍କ କର୍ମଚାରୀଙ୍କ ସଂଗଠନ ୟୁନାଇଟେଡ୍ ଫୋରମ୍ ଅଫ୍ ବ୍ୟାଙ୍କୁ ୟୁନିଅନ୍ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ବ୍ୟାଙ୍କିଂ କ୍ଷେତ୍ରରେ ୫ ଦିନିଆ କାର୍ଯ୍ୟ ଦିବସ ଲାଗି ଚିଠି ଲେଖିଛନ୍ତି । ଯାହାର ସମୀକ୍ଷା କରୁଛି ଅର୍ଥ ମନ୍ତ୍ରଣାଳୟ ।
ଏବେର ସ୍ଥିତି
ବର୍ତ୍ତମାନ ସମୟରେ ବ୍ୟାଙ୍କ ଶାଖା ଗୁଡ଼ିକ ଦ୍ୱିତୀୟ ଓ ଚତୁର୍ଥ ଶନିବାର ବନ୍ଦ ରହୁଛି । ଦୀର୍ଘ ଦିନରୁ ବ୍ୟାଙ୍କ କର୍ମଚାରୀ ସପ୍ତାହକୁ ୨ ଦିନ ଛୁଟି ଲାଗି ଦାବି କରି ଆସୁଛନ୍ତି । ତେବେ ଅନୁମାନ କରାଯାଉଛି, ଶୀଘ୍ର ହିଁ ବ୍ୟାଙ୍କ କର୍ମଚାରୀଙ୍କୁ ୨ ଦିନ ଛୁଟି ମିଳିପାରେ ।
ଏଥିସହ ବ୍ୟାଙ୍କ କର୍ମଚାରୀଙ୍କ ଦରମା ବଢ଼ିପାରେ । ଗତବର୍ଷ ଆଇବିଏ ଓ ବ୍ୟାଙ୍କ କର୍ମଚାରୀଙ୍କ ୟୁନିଅନ୍ ଦେଶର ସମସ୍ତ ସାର୍ବଜନିକ ବ୍ୟାଙ୍କରେ ୧୭ ପ୍ରତିଶତ ଦରମା ବୃଦ୍ଧି ପାଇଁ ଚୁକ୍ତି କରିଥିଲା । ଯାହାକି ୧୨୪୪୯ କୋଟି ଟଙ୍କା ଥିଲା । କେନ୍ଦ୍ର ସରକାର ବେତନ ବୃଦ୍ଧି ପ୍ରସ୍ତାବକୁ ଅନୁମୋଦନ ଦେଲେ ପ୍ରାୟ ୯ ଲକ୍ଷ କର୍ମଚାରୀ ଉପକୃତ ହେବେ ।