ଚନ୍ଦାହାଣ୍ଡି,୬/୯ : ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକରେ ମହିଳାମାନଙ୍କ ସୁଭଦ୍ରା ଯୋଜନାରେ ଆବେଦନ କରିବା ପାଇଁ ଆଧାର ଲିଙ୍କ, ସଂଶୋଧନ କରିବା ପାଇଁ ଚନ୍ଦାହାଣ୍ଡି ଜନସେବା କେନ୍ଦ୍ରରେ ଉପଯୁକ୍ତ ସେବା  ନ ମିଳୁନାହିଁ । ପ୍ରଶାସନିକ ଅଧିକାରୀ ଏବଂ କର୍ମଚାରୀଙ୍କ ସହଯୋଗର ଆନ୍ତରିକତା ଅଭାବ ଫଳରେ ଚନ୍ଦାହାଣ୍ଡି ବ୍ଲକର ମହିଳା ମାନେ ଛତିଶଗଡ଼ ମୁହାଁ ହେଉଛନ୍ତି । ଫଳରେ ଛତିଶଗଡର  ଜନସେବା କେନ୍ଦ୍ରମାନଙ୍କରେ ପ୍ରବଳ ଭିଡ଼ ଦେଖିବାକୁ ମିଳୁଛି l ଏ ଦିଗରେ ଜିଲ୍ଲା ପ୍ରଶାସନ ତୁରନ୍ତ ଦୃଷ୍ଟି  ଦେବାକୁ ଅଞ୍ଚଳବାସୀ ଦାବି କରିଛନ୍ତି l

ସୂଚନା ମୁତାବକ   ଚନ୍ଦାହାଣ୍ଡି ବ୍ଲକରେ  ମୋଟ ୧୫୫ଟି ଜନସେବାକେନ୍ଦ୍ର ରହିଥିବାବେଳେ ୧୫ଟି ଗ୍ରାମାଞ୍ଚଳ ଡାକ ଘର  ରହିଛି l ଦଳବେଡା, କୋଇଲିମୁଣ୍ଡା, ଫଟକି, ଫଳସାପଡା ଏବଂ ଅନକାବେଡା   ଗ୍ରାମାଞ୍ଚଳ ଡାକ ଘରମାନଙ୍କୁ  ଆଧାର ଲିଙ୍କ ଏବଂ ସଂଶୋଧନ କରିବା ପାଇଁ ଆଇଡି ପ୍ରଦାନ କରାଯାଇଥିବା ନେଇ  ଚନ୍ଦାହାଣ୍ଡି  ସବ -ପୋଷ୍ଟମାଷ୍ଟର ପ୍ରକାଶ ବୈରାଗୀ ଗଣମାଧ୍ୟମ କୁ ସୂଚନା ଦେଇଛନ୍ତି l ଆଧାର ଲିଙ୍କ କରୁଥିବା ଗ୍ରାମାଞ୍ଚଳ ଡାକ କର୍ମଚାରୀମାନେ ଲୋକଙ୍କୁ ସଠିକ ସୂଚନା ଦେଉ ନ ଥିବାରୁ ଏହାର ଫାଇଦା କିଛି ବେସରକାରୀ କମ୍ପ୍ୟୁଟର କେନ୍ଦ୍ରମାନଙ୍କରେ ଲିଙ୍କ ପିଛା ୧୦୦ରୁ ୧୫୦ଟଙ୍କା ନେଇ ମାଲେମାଲ l ଏପଟେ ଆଧାର ଲିଙ୍କ ପିଛା   ୫୦ଟଙ୍କା ନେବାର ସରକାରୀ ନିୟମ ରହିଛି l 

ବର୍ତ୍ତମାନ ସୁଭଦ୍ରା ଯୋଜନାରେ ଆଧାରରେ ମୋବାଇଲ ଲିଙ୍କ କରିବାକୁ ପଡୁଥିବାରୁ ଆଧାରରେ ମୋବାଇଲ ଲିଙ୍କ ନ ଥିବା ମହିଳାମାନେ ବିଶେଷ ହଇରାଣ ହେବା ଦେଖିବାକୁ ମିଳୁଛି l ଚନ୍ଦାହାଣ୍ଡିରେ ଆଧାର ମୋବାଇଲ ଲିଙ୍କ ପାଇଁ ହାତଗଣତି ୨ ରୁ ୩ଟି ଜନସେବାକେନ୍ଦ୍ରମାନଙ୍କରେ କରାଯାଉଥିବାରୁ ସେଠାରେ ପ୍ରବଳ ଭିଡ଼ ହେଉଛି l ଏଠାକାର ଲୋକେ ପଡୋଶୀ ଛାତିଶଗଡ଼ ରାଜ୍ୟର ଧରାକୋଟ, ସିତିଲିଜୋର ଗ୍ରାମଞ୍ଚଳ ଡାକଘରମାନଙ୍କରେ ପ୍ରବଳ ଭିଡ଼ ଜମାଉଥିବା ଦେଖିବାକୁ ମିଳୁଛି l ସେଠାରେ ଗୋଟିଏ ଆଧାର ମୋବାଇଲ ଲିଙ୍କ ପିଛା ୧୦୦ଟଙ୍କା  ଦେବା ସହ ବର୍ଷା ଦିନେ ଗର୍ଭବତୀଠାରୁ ଆରମ୍ଭ କରି ପ୍ରସୂତୀ ମହିଳା ପର୍ଯ୍ୟନ୍ତ ହଇରାଣ ହେଉଛନ୍ତି । ଏପଟେ ଓଡିଶା ମୋବାଇଲ ଆଧାର ଲିଙ୍କ ପାଇଥିବା ଡାକ ଘର କର୍ମଚାରୀମାନେ ଆଖି ବନ୍ଦ କରି ଦେଖୁଛନ୍ତି l  

ଚନ୍ଦାହାଣ୍ଡି ବ୍ଲକ ରେ ଶତକଡା ୭୦ପ୍ରତିଶତ ମହିଳାଙ୍କ ମୋବାଇଲ ଆଧାର ଲିଙ୍କ ନ ଥିବା ଜଣାପଡିଛି l ମୋବାଇଲ ଆଧାର ଲିଙ୍କ ଅଭାବରେ ସେମାନେ ବିଭିନ୍ନ ସୁବିଧା ପାଇବାରୁ ବଞ୍ଚିତ ହେଉଥିବା ନେଇ ଏଠାରେ ତୀବ୍ର ଅସନ୍ତୋଷ ଦେଖାଦେଇଛି l ଏ ଦିଗରେ ଜିଲ୍ଲା ପ୍ରଶାସନ ତୁରନ୍ତ ଦୃଷ୍ଟିଦେଇ ପଦକ୍ଷେପ ନେବାକୁ ବିଭିନ୍ନ ମହଲରେ ଦାବି କରାଯାଇଛି l