ଫୁଲବାଣୀ,୨୭/୩  : ନିର୍ବାଚନ ପୂର୍ବରୁ ବଳ ଗୋଟାଉଛି କଂଗ୍ରେସ। ଗତ କିଛି ବର୍ଷ ହେଲା ହାତଛଡା ହୋଇଥିବା କନ୍ଧମାଳ ଭଳି ପୁରୁଣା ଦୁର୍ଗକୁ ଫେରି ପାଇବା ପାଇଁ ଉଦ୍ୟମ ଜାରି ରହିଛି। ଦଳ ପ୍ରତି ବିମୂଖ ହୋଇଥିବା ପୁରୁଣା ନେତା ଏବେ ପୁଣି କଂଗ୍ରେସ ମୁହାଁ ହେଉଥିବା ଦେଖିବାକୁ ମିଳୁଛି। ଏହି ପରିପ୍ରେକ୍ଷୀରେ ଆଜି ଫୁଲବାଣୀ ଠାରେ ଏକ ମିଶ୍ରଣ ପର୍ବର ଆୟୋଜନ ହୋଇଛି। ନୂତନ ଭାବେ ନିର୍ମିତ ଜିଲା କଂଗ୍ରେସ କାର୍ଯ୍ୟାଳୟ ଉଦଘାଟନ ସହ ବିଭିନ୍ନ ଦଳରୁ ଅନେକ ନେତା ଓ କର୍ମୀଙ୍କୁ ଦଳରେ ସାମିଲ କରାଯାଇଛି। ନୂତନ କାର୍ଯ୍ୟାଳୟକୁ ଭର୍ଚ୍ଚୁଆଲ ମୋଡରେ ଉଦଘାଟନ କରିଥିଲେ ପିସିସି ସଭାପତି ଶରତ ପଟ୍ଟନାୟକ। ପରେ ଆୟୋଜିତ ହୋଇଥିଲା ମିଶ୍ରଣ ପର୍ବ। ଏ ଅବସରରେ ଭୂତପୂର୍ବ ସାଂସଦ ରାଧାକାନ୍ତ ଦିଗାଲ ପୁଣିଥରେ କଂଗ୍ରେସରେ ସାମିଲ ହୋଇଛନ୍ତି।

 ସୂଚନାଯୋଗ୍ୟ, ଶ୍ରୀ ଦିଗାଲ ୧୯୮୪ରୁ ୧୯୮୯ ପର୍ଯ୍ୟନ୍ତ ଫୁଲବାଣୀ ସାଂସଦ ଥିଲେ। ଗତବର୍ଷ ସେ ବ୍ୟକ୍ତିଗତ କାରଣରୁ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଥିଲେ। ଆଜି ସେ ଆନୁଷ୍ଠାନିକ ଭାବେ ଦଳକୁ ଫେରିବା ସହ ଆଜୀବନ କଂଗ୍ରେସ ପାଇଁ କାମ କରିବେ ବୋଲି କହିଛନ୍ତି। ଆଜିର ମିଶ୍ରଣ ପର୍ବ ଅବସରରେ ବିଭିନ୍ନ ବ୍ଲକର ଶତାଧିକ ନେତା, କର୍ମୀ ଓ ଦଳୀୟ ପଦାଧିକାରୀ କଂଗ୍ରେସରେ ସାମିଲ ହୋଇଛନ୍ତି। ଜିଲ୍ଲା ସଭାପତି  ଚନ୍ଦ୍ର ଶେଖର ପରିଡାଙ୍କ ଅଧ୍ୟକ୍ଷତାରେ ଅନୁଷ୍ଠିତ କାର୍ଯ୍ୟକ୍ରମରେ ପୂର୍ବତନ ଜିଲ୍ଲା ସଭାପତି ଅନାମ ନାୟକ, ପୂର୍ବତନ ବିଧାୟକ ଅଭିମନ୍ୟୁ ବେହେରା, ଜାକବ ପ୍ରଧାନ, ଅଜୟନ୍ତୀ ପ୍ରଧାନ,ଯୁବ କଂଗ୍ରେସ ସଭାପତି ଚନ୍ଦନ ପଣ୍ଡା, ଶ୍ରମିକ ନେତା ଘନକୁମାର ଶବର, ବ୍ଲକ ସଭାପତି ପ୍ରତିଭା କହଁର, ନଗର ସଭାପତି ଶିବଶଙ୍କର ବେହେରାଙ୍କ ସମେତ ବହୁ ନେତା ଓ ଦଳୀୟ ପଦାଧିକାରୀ ସାମିଲ ଥିଲେ।