ଚନ୍ଦ୍ରଶେଖରପୁର,୧୬/୦୫: ନିର୍ବାଚନ ସମୟ ପାଖେଇ ଆସିଲାଣି । ହାତରେ ମାତ୍ର ଆଉ ୧୦ ଦିନ ବାକି । ତେଣୁ ପ୍ରାର୍ଥୀମାନେ ଆରପାର୍ ଲଢେଇକୁ ଓହ୍ଲାଇଛନ୍ତି । ଉତ୍ତର ନିର୍ବାଚନମଣ୍ଡଳୀ ରାଜନୀତି ଆସନ୍ତା ୧୭ରେ ଆହୁରି କମ୍ପିବ । ବିଜେଡି ଆଉ ବିଜେପି ପକ୍ଷରୁ ଧୂଆଁଦାର ପ୍ରଚାର କରାଯିବ । ମଇଦାନକୁ ଆସିବେ ବିଜେଡିର ଷ୍ଟାର ପ୍ରଚାରକ ଭିକେ ପାଣ୍ଡିଆନ୍ । ସାଲିଆ ସାହିରେ ବିରାଟ ନିର୍ବାଚନ ସଭା କରି ପ୍ରଚାର କରିବେ ।
ସେହିପରି ବିଜେପି ବି ସାଂସଦ ତଥା ବଲିଉଡ୍ ଡ୍ରିମଗାର୍ଲ ହେମା ମାଳିନୀଙ୍କୁ ସାଲିଆ ସାହି ପ୍ରଚାର ମଇଦାନକୁ ଓହ୍ଲାଇବ । ସକାଳେ ହେମା ମାଳିନୀ, ସନ୍ଧ୍ୟାରେ ପାଣ୍ଡିଆନ୍ ସଭା କରିବେ । ଉଭୟ ଦଳର ନଜର ରହିଛି ବସ୍ତି ଭୋଟ୍ ଉପରେ । ସାଲିଆ ସାହିର ୪ଟି ୱାର୍ଡରେ ପ୍ରାୟ ୩୮ ହଜାର ଭୋଟର ରହୁଥିବାରୁ ଉଭୟ ଦଳ ସେମାନଙ୍କୁ ଭିଡିବାକୁ ଚେଷ୍ଟା କରିବେ । ସକାଳେ ହେମା ମାଳିନୀଙ୍କ ସଭାରେ ବିଜେପି ବିଧାୟକ ପ୍ରାର୍ଥୀ ପ୍ରିୟଦର୍ଶୀ ମିଶ୍ର ଓ ସାଂସଦ ଅପରାଜିତା ଷଡ଼ଙ୍ଗୀଙ୍କ ସହ ବରିଷ୍ଠ ନେତାମାନେ ଉପସ୍ଥିତ ରହିବେ ।
ସେହିପରି ପାଣ୍ଡିଆନଙ୍କ ସଭାରେ ବିଜେଡି ବିଧାୟକ ସୁଶାନ୍ତ ରାଉତ, ସାଂସଦ ପ୍ରାର୍ଥୀ ମନ୍ମଥ ରାଉତରାୟ ଯୋଗଦେବେ । ସେହିଦିନ ସନ୍ଧ୍ୟାରେ ପାଣ୍ଡିଆନ୍ ଉତ୍ତର ନିର୍ବାଚନମଣ୍ଡଳୀ କଲ୍ୟାଣପୁର ପଞ୍ଚାୟତର ନୂଆବନ୍ତ ମେଡିକାଲ ପଡିଆ ଓ ୱାର୍ଡ ନଂ.୪ ନହରକଣ୍ଟା ଷ୍ଟାଡିୟମ ପଡିଆରେ ଆୟୋଜିତ ସଭାରେ ଯୋଗଦେଇ ପ୍ରାର୍ଥୀଙ୍କ ପାଇଁ ପ୍ରଚାର କରିବେ।