ନୂଆଦିଲ୍ଲୀ: ଜଣେ ପିଏଚଡି (Phd) ଛାତ୍ରର ଆତ୍ମହତ୍ୟା ପାଇଁ ଦାୟୀ କରି ଜଣେ ପ୍ରଫେସରଙ୍କୁ କାର୍ଯ୍ୟରୁ ନିଲମ୍ବନ କରିଛି ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଆଇଆଇଟି) ମାଡ୍ରାସ । ଗତ ମାର୍ଚ୍ଚ ମାସରେ ଛାତ୍ର ଜଣକ ଆତ୍ମହତ୍ୟା କରିଥିଲେ । ଏହି ଘଟଣାରେ ଏକ ଯାଞ୍ଚ କମିଟି ଗଠନ କରାଯାଇଥିଲା । ବୋର୍ଡ ଅଫ୍ ଗଭର୍ନର୍ସଙ୍କ ନିର୍ଦ୍ଦେଶକୁ ଆଧାର କରି ପ୍ରଫେସର ଆଶିଷ ସେନଙ୍କୁ ନିଲମ୍ବିତ କରାଯାଇଛି । ଅନୁଷ୍ଠାନ ସମସ୍ତ ପ୍ରକ୍ରିୟା ଅନୁସରଣ କରୁଛି ବୋଲି ଏକ ବିବୃତ୍ତିରେ ଅନୁଷ୍ଠାନ କହିଛି । ଖବର ଅନୁଯାୟୀ, ପ୍ରଫେସର ସେନଙ୍କୁ ଗତ ସପ୍ତାହରେ ଗଭର୍ନର୍ସ ବୋର୍ଡ ଦ୍ୱାରା ନିଲମ୍ବିତ କରାଯାଇଥିଲା।
ପାଞ୍ଚ ଜଣିଆ ଅନୁସନ୍ଧାନ ପ୍ୟାନେଲର ସୁପାରିଶ କ୍ରମେ ପ୍ରିମିୟର୍ ଇନଷ୍ଟିଚ୍ୟୁଟ୍ ପ୍ରଫେସର ସେନଙ୍କୁ ନିଲମ୍ବିତ କରିଛି । ପ୍ରଫେସର ଆଶିଷ କୁମାର ସେନ୍ ଏହି ଅନୁଷ୍ଠାନର ମେକାନିକାଲ୍ ଇଞ୍ଜିନିୟରିଂ ବିଭାଗର ଶିକ୍ଷକ ଅଟନ୍ତି । ୨୦୨୩ ଏପ୍ରିଲ୍ ୨୫ ରେ ତାମିଲନାଡୁର ପୂର୍ବତନ ପୋଲିସ ମହାନିର୍ଦ୍ଦେଶକ (ଡିଜିପି) ଜି ତିଲକାବତୀଙ୍କ ଅଧ୍ୟକ୍ଷତାରେ ଏକ ପାଞ୍ଚ ଜଣିଆ ଅନୁସନ୍ଧାନ କମିଟି ଗଠନ କରାଯାଇଥିଲା। ବିଭିନ୍ନ ରିପୋର୍ଟ ଅନୁଯାୟୀ, ଅନ୍ୟ ଛାତ୍ରମାନେ ପ୍ରଫେସରଙ୍କ ଦ୍ୱାରା ନିର୍ଯ୍ୟାତନା ନିଶ୍ଚିତ ହେବା ପରେ ତଦନ୍ତ କମିଟି ତାଙ୍କୁ ନିଲମ୍ବନ କରିବାକୁ ସୁପାରିଶ କରିଥିଲା ।
ମାର୍ଚ୍ଚ ୩୧ ରେ ଅନୁସନ୍ଧାନକାରୀ ଛାତ୍ର ସଚିନ କୁମାର ଜୈନ ଆତ୍ମହତ୍ୟା କରିଥିଲେ । ଏହା ଶିକ୍ଷାନୁଷ୍ଠାନକୁ ଚକିତ କରି ଦେଇଥିଲା । ଏହା ପରେ ଛାତ୍ରଛାତ୍ରୀ ସଂଗଠନ ତଥା ସାମାଜିକ କାର୍ଯ୍ୟକର୍ତ୍ତାଙ୍କ ଦ୍ବାରା ପୂରା ଶିକ୍ଷାନୁଷ୍ଠାନକୁ ଆକ୍ରମଣ କରାଯାଇଥିଲା। ପରେ ଏପ୍ରିଲରେ, ସଚିନଙ୍କ ଭାଇ ଭବେଶ କୁମାର ଜୈନ ପ୍ରଫେସର ସେନଙ୍କ ଦ୍ୱାରା ନିର୍ଯ୍ୟାତନା ଅଭିଯୋଗ ଏବଂ ତାଙ୍କ ଭାଇଙ୍କ ଆତ୍ମହତ୍ୟା ପରିସ୍ଥିତି ସମ୍ପର୍କରେ ବିସ୍ତୃତ ଅନୁସନ୍ଧାନ କରିବାକୁ ଦାବି କରିଥିଲେ । ସେ ତାଙ୍କ ଗାଇଡ୍ (ପିଏଚଡି ସୁପରଭାଇଜର) ଙ୍କ ଅମାନୁଷିକ ବ୍ୟବହାରକୁ ଆତ୍ମହତ୍ୟା କରିବାର କାରଣ ବୋଲି ଦାୟୀ କରିଥିଲେ ଏବଂ ଦାୟୀ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ ।
ତାଙ୍କ ଅଭିଯୋଗରେ ସେ ଅଭିଯୋଗ କରିଥିଲେ ଯେ ମାର୍ଚ୍ଚ ୩୧, ୨୦୨୩ ଦିନ ସଚିନ ତାଙ୍କ ଗାଇଡଙ୍କ ସହ ଏକ ବୈଠକ କରିଥିଲେ, ଏହା ପରେ ସେ ଘରକୁ ଫେରି ହ୍ବାଟସ୍ ଆପ୍ ପୋଷ୍ଟ କରିଥିଲେ "ମୁଁ ଦୁଖିତ, ମୁଁ ସେତେ ଭଲ ନୁହେଁ"।