ନୂଆଦିଲ୍ଲୀ, ୦୧/୦୪: କଂଗ୍ରେସକୁ ବଡ଼ ଆଶ୍ୱସ୍ତି ଦେଇଛନ୍ତି ସୁପ୍ରିମକୋର୍ଟ । ୩୫୦୦ କୋଟିର ଡିମାଣ୍ଡ ନୋଟିସକୁ ନେଇ ଏବେ ଆୟକର ବିଭାଗ କୌଣସି ପଦକ୍ଷେପ ନେବ ନାହିଁ । ସୋମବାର ସୁପ୍ରିମକୋର୍ଟ କଂଗ୍ରେସ ପକ୍ଷରୁ ଆୟକର ବିଭାଗ ବିରୋଧରେ କରିଥିବା ଆବେଦନର ଶୁଣାଣି କରିଛନ୍ତି । ଉଭୟ ପକ୍ଷର ଦସ୍ତାବିଜ୍ ଓ ତଥ୍ୟ ଶୁଣିଲା ପରେ ଜୁନ୍ ସୁଦ୍ଧା ପକ୍ଷ ରଖିବାକୁ ଆୟକର ବିଭାଗକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ଜୁଲାଇ ୨୪ରେ ମାମଲାର ପରବର୍ତ୍ତୀ ଶୁଣାଣି ହେବ ।

ଶୁଣାଣି ବେଳେ ଆୟକର ବିଭାଗ କହିଛି, ଆମେ ୧୭୦୦ କୋଟିର ନୋଟିସ୍ ପଠାଇଛୁ । ଏବେ ନିର୍ବାଚନ ଚାଲିଥିବାରୁ ଆୟକର ବିଭାଗ ଟଙ୍କା ରିକଭରି ଲାଗି କୌଣସି ପଦକ୍ଷେପ ନେବ ନାହିଁ ବୋଲି କୋର୍ଟରେ ଭରସା ଦେଇଛି । ସଲିସିଟର ଜେନେରାଲ୍ ତୁଷାର ମେହେଟ୍ଟା କହିଛନ୍ତି, ମାମଲାର ଶୁଣାଣି ଜୁନରେ ହେବା ପର୍ଯ୍ୟନ୍ତ କୌଣସି ପଦକ୍ଷେ ନିଆଯିବ ନାହିଁ । 

ତେବେ ସୁପ୍ରିମକୋର୍ଟ ପଚାରିଥିଲା ମଗା ଯାଇଥିବା ରାଶିକୁ କଣ ସ୍ଥଗିତ କରି ଦିଆଯିବ କି ? ତାହା ଉପରେ ସଲିସିଟର ଜେନେରାଲ୍ କହିଥିଲେ, ଆମେ କେବଳ ନିର୍ବାଚନ ସରିବା ପର୍ଯ୍ୟନ୍ତ କୌଣସି ପଦକ୍ଷେପ ନେବୁ ନାହିଁ । ମାମଲାର ଶୁଣାଣି ଜୁନ୍ ଦ୍ୱିତୀୟ ସପ୍ତାହରେ କରାଯାଉ ।

କଂଗ୍ରେସ ପକ୍ଷରୁ ଆଇନଜୀବୀ ଅଭିଷେକ ମନୁ ସିଂଘବୀ କହିଥିଲେ, ୧୯୯୫-୯୬ରୁ ଏବେ ପର୍ଯ୍ୟନ୍ତ ୩୫୦୦ ଡିମାଣ୍ଡ କରାଯାଇଛି । ଯେତେବେଳେ କି ପୂର୍ବରୁ କୋର୍ଟରେ ଆବେଦନ ପଡ଼ି ରହିଛି । ମାମଲାର ଶୁଣାଣି ଅଗଷ୍ଟ ମାସରେ ହେଉ । ସେ ପର୍ଯ୍ୟନ୍ତ ଆୟକର ବିଭାଗ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରୁ ।