ନୂଆଦିଲ୍ଲୀ,୨୪/୦୩: କୋଲକତା ନାଇଟ୍ ରାଇଡର୍ସର ଷ୍ଟାର୍ ଅଲରାଉଣ୍ଡର ଆଣ୍ଡ୍ରେ ରସେଲ୍ ସନ୍ରାଇଜର୍ସ ହାଇଦ୍ରାବାଦ ବିରୁଦ୍ଧରେ ଇଡେନ ଗାର୍ଡେନରେ ଖେଳାଯାଇଥିବା ମ୍ୟାଚ୍ରେ ଦମଦାର ଅର୍ଦ୍ଧଶତକ ହାସଲ କରିଥିଲେ। ସେହି ଇନିଂସରେ ରସେଲ୍ ସତୋଟି ଛକା ମାରିଥିଲେ। ତେବେ ଏହି ପରିପ୍ରେକ୍ଷିରେ ସେ ଆଇପିଏଲ୍ ଇତିହାସରେ ୨୦୦ ଛକା ପୂରଣ କରିଛନ୍ତି। ଶନିବାର ମ୍ୟାଚ୍‌ରେ ହାଇଦ୍ରାବାଦକୁ ୪ ରନ୍‌ରେ ହରାଇଥିଲା କୋଲକାତା। ରୋମାଞ୍ଚକର ମୁକାବିଲାରେ ଟିମ୍‌ ହାଇଦ୍ରାବାଦ କେକେଆରକୁ ବଡ଼ ଚ୍ୟାଲେଞ୍ଜ ଦେଇଥିଲା। ଆଣ୍ଡ୍ରେ ରସେଲ୍‌ ସବୁଠାରୁ କମ୍‌ ବଲ୍‌ରେ ୨୦୦ ଛକା ହାସଲ କରିଥିବା ଖେଳାଳୀ ହୋଇପାରିଛନ୍ତି। 

କେକେଆର୍‌ର ଷ୍ଟାର ଅଲରାଉଣ୍ଡର ଆଣ୍ଡ୍ରେ ରସେଲ ୨୦୦ ଛକା ହାସଲ କରିବାରେ କ୍ରିସ୍‌ ଗେଲ୍‌ଙ୍କ ରେକର୍ଡ ଭାଙ୍ଗିଛନ୍ତି। ଆଣ୍ଡ୍ରେ ରସେଲ୍‌ ୯୭ ଇନିଂସରେ ୨୦୦ ଛକା ହାସଲ କରିଛନ୍ତି। ଆଇପିଏଲ୍‌ରେ ସବୁଠାରୁ ଅଧିକ ଛକା ହାସଲ କରିବାର ରେକର୍ଡ କ୍ରିସ୍‌ ଗେଲ୍‌ଙ୍କ ନାଁରେ ରହିଛି। ସେ ୧୪୧ ମ୍ୟାଚ୍‌ରେ ୩୫୭ ଛକା ହାସଲ କରିଛନ୍ତି। କେକେଆର ଇନିଂସର ୧୯ ଓଭରରେ ଭୁବନେଶ୍ବର କୁମାରଙ୍କ ବଲ୍‌ରେ ରସେଲ୍‌ ଛକା ମାରି ଏହି ରେକର୍ଡ ହାସଲ କରିଛନ୍ତି। 

ବିରାଟ କୋହଲି, ଡେଭିଡ୍‌ ଓ୍ବାର୍ଣ୍ଣର ଏବଂ ସୁରେଶ ରୈନା ମଧ୍ୟ ଟି୨୦ ଟୁର୍ଣ୍ଣେମେଣ୍ଟ ଇତିହାସରେ ୨୦୦ ରୁ ଅଧିକ ଛକା ଲଗାଇଛନ୍ତି। ମୁମ୍ବାଇ ଇଣ୍ଡିଆନ୍ସର ପୂର୍ବତନ ଅଧିନାୟକ ରୋହିତ ଶର୍ମା ୨୩୮ ଇନିଂସରେ ୨୫୭ ଛକା ମାରିଛନ୍ତି। ଏବି ଡେଭିଲିୟର୍ସ ୧୭୦ ଇଂନିସରେ ୨୫୧ ଛକା ହାସଲ କରିଛନ୍ତି। ସେହିପରି ଏମ୍‌.ଏସ୍.ଧୋନୀ ୨୧୮ ଇନିଂସରେ ୨୩୯ ଛକା ହାସଲ କରିଛନ୍ତି। ବିରାଟ କୋହଲି ୨୩୦ ପାଳିରେ ୨୩୫ ଛକାହାସଲ କରିଥିବା ବେଳେ ଡେଭିଡ୍‌ ଓ୍ବାର୍ଣ୍ଣର ୧୭୭ ପାଳିରେ ୨୨୮ ଛକା ମାରିଛନ୍ତି।