ନୂଆଦିଲ୍ଲୀ,୧୨/୦୯: ଟିମ୍ ଇଣ୍ଡିଆର ୱିକେଟ୍ କିପର ବ୍ୟାଟର ଇଶାନ୍ କିଶାନ୍ ଦଲିପ୍ ଟ୍ରଫିରେ ଏକ ଚମତ୍କାର ଶତକ ହାସଲ କରିଛନ୍ତି। କହିରଖୁଛୁ ଯେ, ଇଶାନ କିଶନ ଦୀର୍ଘ ଦିନ ଧରି ଟିମ୍ ଇଣ୍ଡିଆରୁ ବାହାର ଅଛନ୍ତି। ଏହା ବ୍ୟତୀତ ବିସିସିଆଇ ଇଶାନ କିଶନଙ୍କ କେନ୍ଦ୍ରୀୟ ଚୁକ୍ତିନାମାକୁ ରଦ୍ଦ କରିଦେଇଛି, କିନ୍ତୁ ଏହି ୱିକେଟ୍ କିପର ବ୍ୟାଟର କ୍ରମାଗତ ଭାବେ ଘରୋଇ ମ୍ୟାଚ୍ରେ ରନ୍ ସ୍କୋର କରୁଛନ୍ତି। ଦଲିପ୍ ଟ୍ରଫିରେ ଇଶାନ୍ କିଶାନ୍ ୧୨୧ ବଲରେ ଶତକ ହାସଲ କରିଥିଲେ। କିନ୍ତୁ ଇଶାନ କିଶନ ଏହି ଶତକ ପରେ ଟିମ୍ ଇଣ୍ଡିଆକୁ ଫେରିବେ କି ନାହିଁ ତାହା ଏକ ବଡ଼ ପ୍ରଶ୍ନ। ଭାରତୀୟ ଦଳରେ ଇଶାନ କିଶନଙ୍କ ପ୍ରତ୍ୟାବର୍ତ୍ତନକୁ ନେଇ ଅନେକ କଳ୍ପନାଜଳ୍ପନା ଲାଗି ରହିଛି।
ଶତକୀୟ ପାଳି ଖେଳିବା ପରେ ପାଭିଲିୟନ ଫେରିଥିଲେ ଇଶାନ:
ଇଣ୍ଡିଆ-ସି ପାଇଁ ଖେଳୁଥିବା ଇଶାନ କିଷନ ୧୨୧ ବଲରେ ୧୧୧ ରନ୍ର ଚମତ୍କାର ଇନିଂସ ଖେଳିଥିଲେ। ସେ ନିଜ ଇନିଂସରେ ୧୪ ଚୌକା ଓ ୩ ଛକା ମାରିଥିଲେ। ଏକ ଶତକୀୟ ପାଳି ଖେଳିବା ପରେ ମୁକେଶ କୁମାରଙ୍କ ଦ୍ୱାରା ଇଶାନ କିଷନ ଆଉଟ୍ ହୋଇଥିଲେ। ଖବର ଲେଖା ସରିବା ସୁଦ୍ଧା ଇଣ୍ଡିଆ ସି ସ୍କୋର ୩ ୱିକେଟ୍ ବିନିମୟରେ ୨୯୬ ରନ୍ ଅଟେ। ଇଶାନ କିଶନ ପ୍ରଥମ ମ୍ୟାଚ୍ରେ ଆହତ କାରଣରୁ ଖେଳି ପାରି ନ ଥିଲେ। ପୁଣି ଦ୍ଵିତୀୟ ମ୍ୟାଚ୍ ପାଇଁ ଫିଟ୍ ନ ଥିଲେ। ମାତ୍ର ମ୍ୟାଚ୍ ଠିକ୍ ପୂର୍ବରୁ ତାଙ୍କୁ ଚୂଡ଼ାନ୍ତ ଏକାଦଶରେ ସାମିଲ କରାଯାଇଥିଲା।
ଇଶାନ କିଶନ ଭାରତ ପାଇଁ ୨ଟି ଟେଷ୍ଟ ଖେଳିଛନ୍ତି। ଏହା ବ୍ୟତୀତ ୨୭ ଦିନିକିଆ ଓ ୩୨ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ଦିନିକିଆ କ୍ରିକେଟ୍ରେ ସେ ଗୋଟିଏ ଶତକ ହାସଲ କରିଛନ୍ତି, ଯାହା ଦ୍ଵିଶତକ ଥିଲା। ପ୍ରଥମ ଶ୍ରେଣୀ କ୍ରିକେଟ୍ର ୫୦ ମ୍ୟାଚ୍ରୁ ୬ ଶତକ ଏବଂ ଟି-୨୦ ଅନ୍ତର୍ଜାତୀୟ ମୁକାବିଲ ୬ ଅର୍ଦ୍ଧଶତକ ଅର୍ଜନ କରିଛନ୍ତି।
