ଭୁବନେଶ୍ୱର,୨୯/୦୮: ରାଜଧାନୀରୁ ଜବତ ହୋଇଛି କଲରାପତରିଆ ବାଘ ଛାଲ । ୱାଇଲ୍ଡ ଲାଇଫ୍ କ୍ରାଇମ୍ କଣ୍ଟ୍ରୋଲ ବ୍ୟୁରୋ (ଡବ୍ଲୁଏଲ୍ସିସିବି) ଓ ଭୁବନେଶ୍ୱର ରେଞ୍ଜର ବନ କର୍ମଚାରୀମାନେ ତମାଣ୍ଡୋ କାଶିପୁରରେ ମିଳିତ ଚଢ଼ଉ କରି ଜଣେ ବନ୍ୟଜନ୍ତୁ ତସ୍କରକୁ ଧରିବା ସହ କଲରାପତରିଆ ବାଘ ଛାଲ ଜବତ କରିଛନ୍ତି । ତାକୁ ପାତ୍ରପଡ଼ା ରେଞ୍ଜ କାର୍ଯ୍ୟାଳୟରେ ଅଟକ ରଖି ପଚରାଉଚରା କରାଯାଉଛି । ଏହି ବାଘଛାଲ କାରବାରରେ ଏକ ବଡ଼ ଧରଣର ର୍ୟାକେଟ୍ କାମ କରୁଥିବା ଟିମ୍ ସୂଚନା ପାଇଛି । ତେଣୁ ର୍ୟାକେଟରେ ସଂପୃକ୍ତ ଥିବା ଅନ୍ୟମାନଙ୍କୁ ଧରିବାକୁ ରାତିରେ ବିଭିନ୍ନ ସ୍ଥାନରେ ଚଢ଼ଉ କରାଯାଉଛି ।
ମିଳିଥିବା ସୂଚନା ଅନୁଯାୟୀ, ଧରାପଡ଼ିଥିବା ତସ୍କର ନୟାଗଡ଼ ବାହାଡ଼ାଝୋଲା ଅଞ୍ଚଳର । ସେ ଓ ଅନ୍ୟମାନେ ମିଶି କଲରାପତରିଆ ବାଘ ଛାଲ କାରବାର କରୁଥିବା ଡବ୍ଲୁଏଲ୍ସିସିବି ସୂଚନା ପାଇଥିଲା । ଏହି ର୍ୟାକେଟ୍ ଭୁବନେଶ୍ୱରରେ ରହି ବାଘ ଛାଲ ବିକିବାକୁ ଯୋଜନା କରୁଥିବା ସୂଚନା ମିଳିବା ପରେ ଡବ୍ଲୁଏଲ୍ସିବି ଭୁବନେଶ୍ୱର ରେଞ୍ଜର ବନ କର୍ମଚାରୀମାନେ ଗ୍ରାହକ ସାଜି ଧରାପଡ଼ିଥିବା ତସ୍କର ସହ ମୋବାଇଲରେ ଯୋଗାଯୋଗ କରିଥିଲେ । ବାଘ ଛାଲ ଦେଖାଇବା ପରେ ମୂଲଚାଲ ହେବ ବୋଲି ତାକୁ କହିଥିଲେ ।
ବୁଧବାର ଅପରାହ୍ଣ ସାଢ଼େ ଗୋଟାଏ ବେଳେ ତସ୍କର ଜଣଙ୍କ ଏକ ବାଇକ୍ରେ କଲରାପତରିଆ ବାଘ ଛାଲ ଧରି ତମାଣ୍ଡୋ କାଶିପୁର ସ୍କୁଲ ନିକଟ ଖେଳପଡ଼ିଆରେ ପହଞ୍ଚିଥିଲା । ପୂର୍ବରୁ କିଛି କର୍ମଚାରୀ କାଶିପୁର ସ୍କୁଲ ଖେଳପଡ଼ିଆ ଚାରିପଟରେ ଛକି ରହିଥିଲେ । ଏହି ସମୟରେ ୨ କର୍ମଚାରୀ ତସ୍କର ପାଖକୁ ଯିବା ପରେ ସେ ବାଇକ୍ ଡିକିରୁ ଛାଲ ବାହାର କରିଥିଲା । ଏହି ସମୟରେ ଚାରିପଟୁ ଘେରି ରହିଥିବା ଟିମ୍ ତସ୍କୁରକୁ କାବୁ କରିବା ସହ ତା’ ନିକଟରୁ ୫ ଫୁଟ ଲମ୍ବର ଏକ କଲରାପତରିଆ ବାଘ ଛାଲ ଜବତ କରିଥିଲେ ।
ତସ୍କରକୁ ପାତ୍ରପଡ଼ାସ୍ଥିତ ଭୁବନେଶ୍ୱର ରେଞ୍ଜ ଅଫିସକୁ ନେଇ ପଚରାଉଚରା ଚାଲିଛି । ବାଘ ଛାଲ କାରବାରରେ ଏକ ବଡ଼ଧରଣର ର୍ୟାକେଟ୍ କାମ କରୁଥିବା ସୂଚନା ମିଳିଛି । ସିଟି ଡିଏଫ୍ଓ ଅଜିତ ଶତପଥିଙ୍କ କହିବା ଅନୁଯାୟୀ, ଏହି ବାଘ ଛାଲ କାରବାରରେ ସଂପୃକ୍ତ ଥିବା ଅନ୍ୟମାନଙ୍କୁ ଧରିବାକୁ ଆଜି ରାତିରେ ବିଭିନ୍ନ ସ୍ଥାନରେ ଚଢ଼ଉ ଚାଲିଛି । ଆସନ୍ତାକାଲି ସାମ୍ବାଦିକ ସମ୍ମିଳନୀରେ ଏ ନେଇ ସୂଚନା ଦିଆଯିବ ବୋଲି ସେ କହିଛନ୍ତି ।
